સરકાર લાવશે માસિક ટોલ ટેક્સ સ્માર્ટ કાર્ડ, બધા ટોલ બૂથ પર માન્ય, મળશે ડિસ્કાઉન્ટ

દેશભરમાં નેશનલ હાઇવે ઓથોરિટી ઓફ ઇન્ડિયા (NHAI)ના ટોલ પ્લાઝાનો ઉપયોગ કરતા વાહન ચાલકો માટે એક સારા સમાચાર છે. કેન્દ્ર સરકાર 'માસિક ટોલ ટેક્સ સ્માર્ટ કાર્ડ' રજૂ કરવાનું વિચારી રહી છે. કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી આ યોજનાને સમગ્ર ભારતમાં લાગુ કરવાના પક્ષમાં છે. આ સ્માર્ટ કાર્ડ દેશના તમામ ટોલ પ્લાઝા પર માન્ય રહેશે અને કાર્ડધારકને ટોલ ટેક્સમાં મુક્તિ પણ મળશે. સરકારના આ પગલાથી ખાસ કરીને કોમર્શિયલ વાહનો અને એક્સપ્રેસવે પર વારંવાર મુસાફરી કરતા લોકોને મોટી રાહત મળી શકે છે. સૂત્રોના જણાવ્યા અનુસાર, નીતિન ગડકરી આ યોજનાને ટૂંક સમયમાં લાગુ કરવા પર ગંભીરતાથી વિચાર કરી રહ્યા છે.

દિલ્હીમાં બેરિયર-લેસ ટોલિંગ પર એક રાઉન્ડ ટેબલ કોન્ફરન્સમાં બોલતા, તેમણે કહ્યું કે, ટોલ આવકનો 74 ટકા ભાગ વાણિજ્યિક વાહનોમાંથી આવે છે, જ્યારે ખાનગી વાહનોનો હિસ્સો ફક્ત 26 ટકા છે. તેથી, અમે ખાનગી વાહનો માટે માસિક અથવા વાર્ષિક પાસ રજૂ કરવાનું વિચારી રહ્યા છીએ. તેમણે કહ્યું, 'કુલ ટોલ વસૂલાતમાં ખાનગી વાહનોનો હિસ્સો ફક્ત 26 ટકા છે, તેથી પાસ બનાવીને સરકારને કોઈ નુકસાન થશે નહીં.'

સરકાર ટોલ વસૂલાત માટે ગ્લોબલ નેવિગેશન સેટેલાઇટ સિસ્ટમ (GNSS) લાગુ કરવા તરફ કામ કરી રહી છે, તો પ્રશ્ન એ ઊભો થાય છે કે, આ સ્માર્ટ કાર્ડ કેવી રીતે કામ કરશે? આ અંગે અધિકારીઓએ જણાવ્યું હતું કે, GNSS સિસ્ટમને સમગ્ર દેશમાં લાગુ કરવામાં સમય લાગશે. GNSS સિસ્ટમ લાગુ થયા પછી, વાહનોમાં એક નાનું મશીન સ્થાપિત કરવામાં આવશે, જે ટોલ રોડ પર વાહન દ્વારા કાપવામાં આવેલા અંતર મુજબ ટોલ ફી કાપશે. જોકે, સેટેલાઇટ ટોલ સિસ્ટમમાં સ્માર્ટ કાર્ડ સુવિધા પણ ઉમેરવામાં આવશે, જેથી વારંવાર મુસાફરી કરતા વાહનો માસિક પાસના આધારે જ ટોલ ચૂકવી શકે.

મંત્રાલયના સૂત્રોએ આ અંગે સ્પષ્ટ જવાબ આપ્યો ન હતો કે જે લોકો માસિક પાસ નથી લેતા તેમને હાલની ટોલ સિસ્ટમ હેઠળ જ ટોલ ચૂકવવો પડશે કે તેમને પણ કોઈ પ્રકારની છૂટ આપવામાં આવશે. જોકે, સ્માર્ટ કાર્ડ યોજના હેઠળ રોજિંદી અવર-જવર કરતા મુસાફરોને ટોલ ટેક્સમાં મોટી રાહત મળવાની અપેક્ષા છે.

નિષ્ણાતો માને છે કે, આ સ્માર્ટ કાર્ડ ખાસ કરીને ધંધાદારી વાહનો માટે ફાયદાકારક સાબિત થશે, જે ઘણીવાર લાંબા અંતરની મુસાફરી કરે છે. આનાથી ટોલ ચુકવણીની પ્રક્રિયા ન ફક્ત સરળ બનશે, પરંતુ નિયમિત મુસાફરોના ખર્ચમાં પણ ઘટાડો થશે. સરકારની આ યોજના અંગે અંતિમ નિર્ણય ટૂંક સમયમાં જ લેવામાં આવી શકે છે અને એકવાર તે લાગુ થઈ ગયા પછી, દેશભરના લાખો મુસાફરોને ટોલ ટેક્સમાં રાહત મળવાની શક્યતા છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.