કાશ પટેલ FBI ચીફ બને તો ગૌતમ અદાણીની ચિંતા કેમ દૂર થઈ, ગ્રુપના શેર ભાગ્યા

ભારતમાં બુધવારની રાત્રે જ્યારે લોકો ગાઢ નિંદ્રામાં હતા, ત્યારે અમેરિકન એજન્સી ફેડરલ બ્યુરો ઓફ ઇન્વેસ્ટિગેશન (FBI)ના ડાયરેક્ટરના રાજીનામાની જાહેરાત કરવામાં આવી હતી. તે સમયે ત્યાં દિવસ હતો. પરંતુ તે જાહેરાતની અસર સાત સમંદર પાર ભારતમાં અદાણી ગ્રુપના શેર પર પણ પડી. ગુરુવારે અદાણી ગ્રુપના શેરમાં જબરદસ્ત ઉછાળો જોવા મળ્યો હતો. જ્યારથી ડોનાલ્ડ ટ્રમ્પ અમેરિકાના નવા રાષ્ટ્રપતિ તરીકે ચૂંટાયા છે, ત્યારથી દરરોજ કોઈને કોઈ મોટા સમાચાર આવી રહ્યા છે. FBI ચીફના રાજીનામાની જાહેરાતના સમાચાર પણ ટ્રમ્પ સાથે જોડાયેલા છે.

અદાણી ગ્રીન એનર્જીએ સૌથી વધુ 6.2 ટકાનો વધારો નોંધાવ્યો હતો. આ પછી અદાણી પાવર 4.6 ટકા વધ્યો હતો. જૂથની મુખ્ય કંપની અદાણી એન્ટરપ્રાઈઝના શેરમાં લગભગ 2 ટકાનો ઉછાળો જોવા મળ્યો હતો. આજે માત્ર અદાણી ગ્રૂપના સિમેન્ટ શેરો જ લાલ નિશાનમાં જોવા મળ્યા હતા. અદાણી ગ્રુપની કુલ માર્કેટ મૂડીમાં અંદાજે રૂ. 25,000 કરોડનો વધારો થયો છે.

એફબીઆઈના ડિરેક્ટર ક્રિસ રેએ તેમના રાજીનામાની યોજનાની જાહેરાત કરી. તેઓ આવતા વર્ષની શરૂઆતમાં પદ છોડવાના છે. આ તે સમય હશે જ્યારે ટ્રમ્પ સત્તા સંભાળી રહ્યા હશે. જો આપણે સમગ્ર દ્રશ્ય પર નજર કરીએ તો એવું કહી શકાય કે, ટ્રમ્પ સત્તાની બાગડોર સંભાળે તે પહેલા જ ક્રિસ રે પોતાની ખુરશી છોડી શકે છે. અહીં તમને જણાવી દઈએ કે, અમેરિકી રાષ્ટ્રપતિ પદ સંભાળતા પહેલા જ ડોનાલ્ડ ટ્રમ્પે FBI ચીફ પદ માટે ભારતીય-અમેરિકન કાશ પટેલને નોમિનેટ કરવાનો સંકેત આપ્યો છે.

ક્રિસ રેનું રાજીનામું ટ્રમ્પ સાથેના તેમના મતભેદોનું પરિણામ હોવાનું માનવામાં આવે છે. જો કે, એ પણ સાચું છે કે, 2017માં ટ્રમ્પે જ ક્રિસ રેને આ પદ પર નિયુક્ત કર્યા હતા. અદાણી ગ્રૂપ સાથે ક્રિસ રેનું જોડાણ એ છે કે, તેમના કાર્યકાળ દરમિયાન અદાણી ગ્રૂપના ચેરમેન ગૌતમ અદાણી અને અન્ય અધિકારીઓ પર અમેરિકામાં ભ્રષ્ટાચારના આરોપો લાગ્યા હતા.

20 નવેમ્બરે US કોર્ટના આદેશ પછી અદાણી ગ્રુપની કંપનીઓની માર્કેટ મૂડી ઘટીને 2.24 લાખ કરોડ રૂપિયા થઈ ગઈ હતી. આ ઘટાડો હિંડનબર્ગ રિપોર્ટ પછીનો સૌથી મોટો ઘટાડો માનવામાં આવે છે.

US સિક્યોરિટીઝ એન્ડ એક્સચેન્જ કમિશન (SEC)એ અદાણી ગ્રુપ પર અમેરિકન રોકાણકારોને છેતરવાનો અને લાંચ લેવાનો આરોપ મૂક્યો છે. આ કમિશન અનુસાર, જુલાઈ 2021 થી ફેબ્રુઆરી 2022 વચ્ચે, અદાણી ગ્રીન અને એઝ્યુર પાવરે ભારતમાં સરકારી અધિકારીઓને સોલાર પ્રોજેક્ટ માટે લાંચ આપી હતી. જો કે અદાણી ગ્રુપે આ તમામ આરોપોને પાયાવિહોણા ગણાવીને ફગાવી દીધા છે. જૂથના પ્રવક્તાએ કહ્યું કે, તેઓ ધોરણોનું પાલન કરે છે અને તમામ નિયમનકારી જોગવાઈઓનું પાલન તેમની પ્રાથમિકતા છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.