185 વર્ષ જૂની મસ્જિદનો થોડો ભાગ કેમ તોડી પાડવામાં આવ્યો?

ઉત્તર પ્રદેશના ફતેહપુર જિલ્લામાં સ્થિત '185 વર્ષ જૂની' નૂરી મસ્જિદનો એક ભાગ સ્થાનિક વહીવટીતંત્ર દ્વારા તોડી પાડવામાં આવ્યો હતો. અધિકારીઓએ કહ્યું છે કે, મસ્જિદનો એક ભાગ બાંદા-બહરાઈચ હાઈવે પર બાંધવામાં આવેલું 'ગેરકાયદે બાંધકામ' હતું. મસ્જિદ પ્રબંધન સમિતિએ આ કાર્યવાહીને લઈને અલ્હાબાદ હાઈકોર્ટનો સંપર્ક કર્યો છે.

મીડિયા સાથે સંકળાયેલા સૂત્રોના જણાવ્યા અનુસાર, બહરાઈચ-બાંદા રોડ (SH-13) પહોળો કરવાનો હતો. વહીવટીતંત્રે દાવો કર્યો હતો કે મસ્જિદનો એક ભાગ બાંદા-ફતેહપુર રોડ પર 'અતિક્રમણ' કરી રહ્યો છે. આ માટે, પબ્લિક વર્ક્સ ડિપાર્ટમેન્ટ (PWD)એ 17 ઓગસ્ટ, 2024ના રોજ મસ્જિદ મેનેજમેન્ટ સાથે 139 લોકોને 'ગેરકાયદે બાંધકામ' દૂર કરવા માટે નોટિસ પાઠવી હતી. 24મી સપ્ટેમ્બરે કાર્યવાહી પણ કરવામાં આવી હતી, ઘણી દુકાનો દૂર કરવામાં આવી હતી. આ સમય દરમિયાન, મસ્જિદ મેનેજમેન્ટે વહીવટીતંત્ર પાસે માંગ કરી હતી કે, તેમને થોડો વધુ સમય આપવામાં આવે જેથી કરીને તેઓ અતિક્રમણ કરેલા હિસ્સાને જાતે તોડી શકે, પરંતુ તેમ થયું નહીં.

આવી સ્થિતિમાં 10 ડિસેમ્બરના રોજ વહીવટીતંત્ર અને PWDએ મળીને બુલડોઝરની મદદથી મસ્જિદનો 20 મીટરનો ભાગ તોડી પાડ્યો હતો. આ સમયગાળા દરમિયાન, પોલીસની રેપિડ એક્શન ફોર્સ તૈનાત રહી હતી, જેથી વિસ્તારમાં કાયદો અને વ્યવસ્થા જળવાઈ રહે.

એક અખબારમાં છપાયેલા સમાચાર અનુસાર, એડિશનલ ડિસ્ટ્રિક્ટ મેજિસ્ટ્રેટ (ADM) અવિનાશ ત્રિપાઠીએ કહ્યું, 'મસ્જિદ મેનેજમેન્ટે અગાઉ તેની સાથે જોડાયેલ દુકાનો હટાવી દીધી હતી. પરંતુ તાજેતરમાં થયેલું બાંધકામ ગેરકાયદેસર હોવાથી તેને દૂર કરવું ફરજિયાત બન્યું છે. સેટેલાઇટ અને ઐતિહાસિક ફોટોગ્રાફ્સ પરથી સ્પષ્ટ થાય છે કે, આ બાંધકામ બે-ત્રણ વર્ષ પહેલાં થયું હતું. મસ્જિદ કમિટીએ હાઈકોર્ટમાં અરજી દાખલ કરી છે, પરંતુ તે હજુ સુધી સુનાવણી માટે સૂચિબદ્ધ નથી. મસ્જિદનો માત્ર અતિક્રમણ કરાયેલો ભાગ જ હટાવવામાં આવ્યો છે, બાકીની મસ્જિદ સુરક્ષિત છે.'

બીજી તરફ, મસ્જિદ પ્રબંધન સમિતિએ આ મામલે અલ્હાબાદ હાઈકોર્ટનો સંપર્ક કર્યો હતો. PWDના દાવાને નકારી કાઢતા, નૂરી મસ્જિદ પ્રબંધન સમિતિના વડા મોહમ્મદ મોઈન ખાને કહ્યું, 'નૂરી મસ્જિદ 1839માં બનાવવામાં આવી હતી, જ્યારે રોડનું નિર્માણ 1956માં થયું હતું. તેમ છતાં PWD તેને ગેરકાયદે ગણાવી રહ્યું છે.'

આ બનાવથી વિસ્તારમાં ચકચાર મચી જવા પામી છે. મસ્જિદ મેનેજમેન્ટ અને વહીવટીતંત્ર વચ્ચે આક્ષેપો અને પ્રતિઆક્ષેપો ચાલુ છે, ત્યારે સ્થાનિક લોકો અને મેનેજમેન્ટ મસ્જિદને તોડી પાડવાને લઈને નારાજ છે. જ્યારે વહીવટીતંત્ર તેને 'રોડ પહોળો કરવાનો અને વિકાસના કામ'નો ભાગ ગણાવી રહ્યું છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.