કુનો નેશનલ પાર્કમાં ચોથા બચ્ચાને બચાવવાના પ્રયાસો ચાલુ છે, 3ના મોત થઈ ચૂક્યા છે

મધ્યપ્રદેશના કુનો નેશનલ પાર્ક (KNP)માં જન્મેલા ચોથા ચિત્તાના બચ્ચાની હાલત સ્થિર છે. ગયા વર્ષે સપ્ટેમ્બરમાં નામિબિયાથી KNPમાં લાવવામાં આવેલી જ્વાલા નામની માદા ચિત્તાએ આ વર્ષે માર્ચના છેલ્લા સપ્તાહમાં ચાર બચ્ચાને જન્મ આપ્યો હતો. આ પૈકીના ત્રણ બચ્ચા ત્રણ દિવસ પહેલા મૃત્યુ પામ્યા છે જ્યારે ચોથું બચ્ચું સારવાર હેઠળ છે. જ્વાલા પહેલા સિયાયા તરીકે ઓળખાતી હતી.

KNP ખાતે ત્રણ ભારતીય મૂળના ચિત્તા બચ્ચાઓના મૃત્યુથી પ્રોજેક્ટ ચિત્તાને ફટકો પડ્યો છે, જે દેશમાં ચિત્તાઓના ફરી વખત વસવાટ કરાવવાની મહત્વાકાંક્ષી યોજના છે. KNPના ડાયરેક્ટર ઉત્તમ શર્માએ જણાવ્યું કે, ચોથા ચિત્તાના બચ્ચાની હાલત સ્થિર છે. પરંતુ કોઈ (બીમાર) પ્રાણી બચે છે કે કેમ તે કહેવું ખૂબ મુશ્કેલ છે. અમે તેને બચાવવા માટે દિવસ-રાત કામ કરી રહ્યા છીએ.

વન વિભાગના અન્ય એક અધિકારીએ 23 મેના રોજ ત્રણ બચ્ચાના મોત માટે આગ વરસાવતી ગરમીને જવાબદાર ગણાવી હતી. તેમણે કહ્યું કે, જ્યારે 23 મેના રોજ આ ત્રણ બચ્ચા મૃત્યુ પામ્યા ત્યારે ત્યાંનું તાપમાન 45 ડિગ્રી સેલ્સિયસથી વધુ હતું, જે તેમના માટે અનુકૂળ ન હતું. તેમણે કહ્યું કે, નામીબિયામાં, ચિત્તા વરસાદની મોસમની શરૂઆતમાં તેમના સંતાનોને જન્મ આપે છે, ત્યારબાદ શિયાળો આવે છે. જ્વાલાએ ઉનાળાની શરૂઆતમાં KNP ખાતે ચાર બચ્ચાને જન્મ આપ્યો હતો, જે તાપમાનની દ્રષ્ટિએ બચ્ચા માટે પ્રતિકૂળ સમય હતો. જો કે, ગઈકાલે રાત્રે પડેલા વરસાદને કારણે KNPમાં હવામાન હવે ખુશનુમા છે, એમ તેમણે ઉમેર્યું હતું.

KNP ખાતે 23 મેના રોજ બચ્ચાના મૃત્યુની જાણ કરવામાં આવી હતી. તે જ દિવસે બપોરે બે બચ્ચા પણ મૃત્યુ પામ્યા હતા, પરંતુ તેમના મૃત્યુ બે દિવસ પછી 25 મેના રોજ નોંધાયા હતા. ગુરુવારે જાહેર કરાયેલી માહિતી અનુસાર, 23 મેના રોજ ચિત્તાના બચ્ચાના મૃત્યુ પછી, મોનિટરિંગ ટીમે માદા ચિત્તા જ્વાલા અને તેના બાકીના ત્રણ બચ્ચાની ગતિવિધિઓ પર નજર રાખી હતી. 23 મેના રોજ સર્વેલન્સ ટીમને જાણવા મળ્યું કે ત્રણ બચ્ચાની હાલત સારી નથી અને તેમની સારવાર કરવાનો નિર્ણય લેવામાં આવ્યો હતો. તે સમયે દિવસનું તાપમાન 46 થી 47 ડિગ્રી સેલ્સિયસની આસપાસ હતું. બચ્ચા ગંભીર રીતે ડિહાઇડ્રેટેડ હોવાનું જણાયું હતું અને સારવાર છતાં તેમને બચાવી શકાયા ન હતા. ચોથા બચ્ચાની હાલત સ્થિર છે અને તેની સઘન સારવાર ચાલી રહી છે.

નામીબિયન ચિત્તાઓમાંથી એક, સાશા, 27 માર્ચે કિડનીની બિમારીથી મૃત્યુ પામી હતી, જ્યારે ઉદય, દક્ષિણ આફ્રિકાથી આયાત કરાયેલ ચિત્તો 13 એપ્રિલે મૃત્યુ પામ્યો હતો. જ્યારે, દક્ષિણ આફ્રિકાથી લાવવામાં આવેલી માદા ચિત્તા દક્ષાનું આ વર્ષે 9 મેના રોજ મૃત્યુ થયું હતું.

1947માં છત્તીસગઢના કોરિયા જિલ્લામાં છેલ્લા ચિત્તાના શિકાર પછી જ્વાલાના ચાર બચ્ચા ભારતની ધરતી પર જન્મેલા પ્રથમ હતા. ત્રણ બચ્ચા ઉપરાંત, દક્ષિણ આફ્રિકા અને નામિબિયાથી લાવવામાં આવેલા 20 પુખ્ત ચિત્તાઓમાંથી ત્રણના KNPમાં મૃત્યુ થયા છે. આ ચિત્તાઓને ગયા વર્ષે સપ્ટેમ્બર અને આ વર્ષે ફેબ્રુઆરીમાં અનુક્રમે નામિબિયા અને દક્ષિણ આફ્રિકાથી KNPમાં લાવવામાં આવ્યા હતા.

પૃથ્વી પર સૌથી ઝડપથી દોડતા આ વન્યજીવને 1952માં દેશમાં લુપ્ત જાહેર કરવામાં આવ્યા હતા. 17 સપ્ટેમ્બર, 2022ના રોજ, PM નરેન્દ્ર મોદી દ્વારા આયોજિત એક કાર્યક્રમમાં નામિબિયાથી લાવવામાં આવેલી પાંચ માદા અને ત્રણ નર ચિત્તાઓને KNP ખાતે બિડાણમાં છોડવામાં આવી હતી. ફેબ્રુઆરી 2023માં દક્ષિણ આફ્રિકાથી અન્ય 12 ચિત્તા લાવવામાં આવ્યા હતા અને તેમને અલગ બિડાણમાં રાખવામાં આવ્યા હતા.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.