4 દિવસથી ગુમ રિસેપ્શનિસ્ટ યુવતીનું મર્ડર, BJP નેતાના પુત્રની ધરપકડ

રિસેપ્શનિસ્ટ અંકિતા ભંડારીની પૌડી ગઢવાલ જિલ્લાના યમકેશ્વર વિધાનસભા વિસ્તારના એક ખાનગી રિસોર્ટમાં હત્યા કરવામાં આવી છે. 19 વર્ષની અંકિતા 18-19 સપ્ટેમ્બર સુધી ગુમ હતી. સોશિયલ મીડિયા પર  અંકિતાની તરફેણમાં ઝુંબેશ ચાલી રહી હતી. જો કે હજુ સુધી તેણીનો મૃતદેહ મળ્યો નથી. પોલીસ અને SDRFની ટીમો જિલ્લા પાવર હાઉસ પાસે શક્તિ કેનાલમાં સર્ચ ઓપરેશન ચલાવી રહી છે.

પોલીસે આ કેસમાં બીજેપી નેતાના પુત્ર પુલકિત આર્ય સહિત ત્રણ લોકોની ધરપકડ કરી છે. અંકિતા જ્યાં કામ કરતી હતી તે રિસોર્ટનો પુલકિત આર્ય સંચાલક હતો. યુવતી ગુમ થયા બાદથી રિસોર્ટના સંચાલક અને મેનેજર ફરાર હતા. પોલીસ ટૂંક સમયમાં સમગ્ર મામલે ખુલાસો કરશે.

પૌરી ગઢવાલના શ્રીકોટ ગામની રહેવાસી અંકિતા ભંડારી થોડા મહિનાઓથી ગંગા ભોગપુરના એક ખાનગી રિસોર્ટમાં રિસેપ્શનિસ્ટ તરીકે કામ કરતી હતી.

રિસોર્ટના સંચાલક પુલકિત આર્યએ પોલીસને જણાવ્યું,  હતું કે, રિસેપ્શનિસ્ટ અંકિતા ભંડારી એક અલગ રૂમમાં રહેતી હતી. તે થોડા દિવસોથી માનસિક તણાવમાંથી પસાર થઈ રહી હતી. આ કારણે 18 સપ્ટેમ્બરે તે તેને ઋષિકેશ ફરવા માટે લઇ ગયા હતા. પુલકિતે કહ્યું કે,ત્યાંથી મોડી રાત્રે પરત ફર્યા. આ પછી બધા રિસોર્ટમાં બનેલા અલગ-અલગ રૂમમાં સૂઈ ગયા. પરંતુ, 19 સપ્ટેમ્બરની સવારે અંકિતા તેના રૂમમાંથી ગાયબ હતી.

બીજી તરફ દીકરીના ગુમ થવાની જાણ થતાં તેના પિતા ગંગા ભોગપુર પહોંચી ગયા હતા. આ દરમિયાન યુવતીના પરિવારજનોએ રિસોર્ટમાં હાજર સ્ટાફને પૂછપરછ કરી હતી. આ દરમિયાન બધાએ અલગ-અલગ વાતો કહી. આ પછી, રિસોર્ટના સંચાલક અને કર્મચારીઓની શંકાસ્પદ ભૂમિકા અંગે પોલીસને ફરિયાદ કરવામાં આવી હતી.

આ સિવાય ઉત્તરાખંડના ધારાસભ્ય ઉમેશ કુમાર સહિતના પત્રકારો અને સંગઠનોએ અંકિતા ભંડારીના ગુમ થવાને લઈને સોશિયલ મીડિયા પર અભિયાન શરૂ કર્યું હતું. જેના કારણે પોલીસે સક્રિયતા દાખવીને ત્રણ આરોપી રિસોર્ટના માલિક પુલકિત આર્ય, મેનેજર સૌરભ ભાસ્કર અને આસિસ્ટન્ટ મેનેજર અંકિત ગુપ્તાની ધરપકડ કરી હતી.

ઉત્તરાખંડના મુખ્યમંત્રી પુષ્કર સિંહ ધામીએ કહ્યું છે કે સચિવાલયમાં પોલીસ ડિરેકટર જનરલને ઋષિકેશની ઘટનાને લઈને કડક કાર્યવાહી કરવા સૂચના આપવામાં આવી છે. જેણે પણ આ જઘન્ય ગુનો કર્યો છે તેને સખત સજા કરવામાં આવશે. પોલીસ પોતાનું કામ કરી રહી છે. પીડિતાને ન્યાય અપાશે.

રાજ્યના DGP અશોક કુમારે જણાવ્યું હતું કે, આ ખૂબ જ દુઃખદ ઘટના છે. લક્ષ્મણ ઝુલા પોલીસ સ્ટેશન વિસ્તારની નજીક એક ખાનગી રિસોર્ટ છે. શ્રીકોટ ગામની એક છોકરી તેમાં કામ કરતી હતી. તે 5 દિવસથી ગુમ હતી. , આ વિસ્તાર રેવન્યુ પોલીસ વિસ્તારમાં આવે છે. તેમાં નિયમિત પોલીસની દખલગીરી નથી.

તેમણે વધુમાં જણાવ્યું હતું કે, રેવન્યુ પોલીસમાં ગુમ થવાની ફરિયાદ નોંધવામાં આવી હતી, જે પાછલા દિવસે જ રેગ્યુલર પોલીસમાં ટ્રાન્સફર કરવામાં આવી છે. 24 કલાકમાં મુખ્ય આરોપી પુલકિત આર્ય સહિત ત્રણ આરોપીઓની લક્ષ્મણ ઝુલા પોલીસે ધરપકડ કરી છે.

આ મામલામાં ઉત્તરાખંડ કોંગ્રેસના પ્રવક્તા ગરિમા દાસૌનીએ કહ્યું કે, પૌડી ગઢવાલની રહેવાસી અંકિતા ભંડારી એક ખાનગી રિસોર્ટમાં રિસેપ્શનિસ્ટ તરીકે કામ કરતી હતી. તે રિસોર્ટની અંદરથી ગુમ થઇ જાય છે. 18મી સપ્ટેમ્બરથી દરરોજ પરિવારજનો દ્રારા આજીજી કરવામાં આવી રહી છે. , આ કેસમાં મુખ્ય આરોપી રિસોર્ટના માલિક પુલકિત આર્યના પિતા વિનોદ આર્ય ઉત્તરાખંડ સરકારમાં રાજ્યમંત્રી રહી ચૂક્યા છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.