નાણાપ્રધાન બનવાનો પ્રસ્તાવ અડધી રાતે આવ્યો હતો, મનમોહન સિંહે તેને 'મજાક' ગણ્યો

પૂર્વ PM ડૉ.મનમોહન સિંહનું નિધન થયું છે. ભારતીય અર્થવ્યવસ્થાની દિશા હંમેશને માટે બદલનાર ડૉ. મનમોહન સિંહ નાણામંત્રી તરીકે રાજકારણમાં આવવાની વાર્તા ખૂબ જ રસપ્રદ છે. ડૉ. મનમોહન સિંહને P.V. નરસિમ્હા રાવ સરકારમાં નાણામંત્રી બનવાની ઓફર મોડી રાત્રે ઊંઘમાંથી ઉઠાડીને આપવામાં આવી હતી, જે તેમણે સાચું માન્યું ન હતું અને તેઓ બીજા દિવસે સવારે તેમની ઓફિસ નીકળી ગયા હતા, પરંતુ તેમને શપથ લેવા માટે રાષ્ટ્રપતિ ભવન જવાનું હતું. પેંગ્વિન રેન્ડમ હાઉસ ઈન્ડિયા દ્વારા પ્રકાશિત AK ભટ્ટાચાર્યના પુસ્તક ઈન્ડિયાઝ ફાયનાન્સ મિનિસ્ટર્સઃ સ્ટમ્બલિંગ ઇનટુ રિફોર્મ્સ (1977 થી 1998)માં આનો ઉલ્લેખ કર્યો છે.

વર્ષ 1990માં, મનમોહન સિંહ દક્ષિણ કમિશનના મહાસચિવ તરીકે તેમનું કાર્ય પૂર્ણ કર્યા પછી ભારત આવ્યા હતા. તેમણે VP સિંહ સરકારની ટોચની આર્થિક નીતિ ટીમનો ભાગ બનવાનું હતું. PMએ ડૉ. મનમોહન સિંહને તેમની આર્થિક સલાહકાર પરિષદના અધ્યક્ષ બનવા માટે કહ્યું હતું. તેમણે આ પદ સ્વીકાર્યું પણ હતું. પરંતુ તે પહેલા જ VP સિંહની સરકાર પડી ગઈ હતી. આ પછી કોંગ્રેસના સમર્થનથી ચંદ્રશેખરની સરકાર બની હતી. ચંદ્રશેખરે ડૉ. મનમોહન સિંહને PM કાર્યાલયમાં આર્થિક સલાહકારનું પદ આપ્યું હતું. ચંદ્રશેખરની સરકાર પણ 1991માં પડી હતી. આ સમયે UGC (યુનિવર્સિટી ગ્રાન્ટ કમિશન)ના અધ્યક્ષનું પદ ખાલી હતું. આવી સ્થિતિમાં ડૉ. મનમોહન સિંહને ત્યાં નિમણૂક કરવામાં આવી હતી.

ચંદ્રશેખરની સરકારના પતન પછી નરસિમ્હા રાવ PM બન્યા. તે સમયે અર્થવ્યવસ્થાની સ્થિતિ ખૂબ જ ખરાબ થઈ રહી હતી. આગામી નાણામંત્રી કોણ હોવું જોઈએ તે અંગે ચર્ચા થઈ હતી. શરૂઆતમાં ભારતીય રિઝર્વ બેંકના પૂર્વ ગવર્નર IG પટેલના નામ પર સૌ સહમત થયા હતા. પરંતુ પટેલે આ પદ લીધું ન હતું. ત્યાર પછી ડો.મનમોહન સિંહનું નામ આગળ મૂકવામાં આવ્યું હતું. શપથ ગ્રહણ સમારોહના એક દિવસ પહેલા રાવે PC એલેક્ઝાન્ડરને ડૉ. મનમોહન સિંહનો સંપર્ક કરવા કહ્યું. જો કે, આ નિર્ણય લેવાયો ત્યાં સુધીમાં રાત થઈ ગઈ હતી અને 20 જૂન 1991ની મોડી રાત્રે નેધરલેન્ડથી પાછા ફરેલા ડૉ. સિંહ સૂઈ રહ્યા હતા. એલેક્ઝાંડરે તેમણે ફોન કર્યો અને કહ્યું કે, તેઓ હમણાં જ તેમને મળવા માંગે છે.

આ પછી એલેક્ઝાન્ડર રાત્રે જ મનમોહન સિંહના ઘરે પહોંચ્યો અને રાવની સરકારમાં નાણામંત્રી બનવાનું કહ્યું. ડૉ. મનમોહન સિંહને એલેક્ઝાંડર પર વિશ્વાસ આવ્યો નહીં અને તેઓ સવારે UGC ઓફિસ જવા માટે નીકળી ગયા. બીજી તરફ, શપથ સમારોહ માટે ડૉ. મનમોહન સિંહની રાહ જોવાઈ રહી હતી. જ્યારે તે ફંક્શનમાં જોવા ન મળ્યા તો તેમની શોધખોળ શરૂ થઈ. ત્યારપછી તેમને ફોન પર પૂછવામાં આવ્યું કે, શું તેઓ આગામી નાણામંત્રી તરીકે શપથ લેવા આવશે?

ડૉ. મનમોહન સિંહને વિશ્વાસ ન થયો. ત્યારપછી તેમને ઘરે જવા, તૈયાર થવા અને શપથ સમારોહમાં હાજરી આપવા માટે કહેવામાં આવ્યું. આ સમારોહમાં ડૉ. મનમોહન સિંહને નાણા મંત્રાલયનું પદ સોંપવામાં આવ્યું ન હતું. જો કે, શપથ સમારોહ પછી, તેમને નોર્થ બ્લોક ઓફિસથી નાણાં પ્રધાન તરીકે કામ શરૂ કરવા માટે કહેવામાં આવ્યું હતું. ત્યાર પછી એક જાહેરાત બહાર પાડીને, ડૉ. મનમોહન સિંહને સત્તાવાર રીતે નાણાં મંત્રાલય આપવામાં આવ્યું હતું.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.