પહેલા ઉમેશ કોલ્હેનું ગળું કાપીને હત્યા કરી, પછી મૌલવી અને અરબાઝે કરી ડિનર પાર્ટી

ઉમેશ કોલ્હે હત્યા કેસમાં NIAએ કોર્ટમાં મોટો ખુલાસો કર્યો છે. તપાસ એજન્સીએ કોર્ટને જણાવ્યું કે ધરપકડ કરાયેલા મૌલવી અને અરબાઝે ઉમેશ કોલ્હેની હત્યા કર્યા બાદ ઉજવણી કરી ડિનર પાર્ટીનું આયોજન કર્યું હતું. NIAએ મહારાષ્ટ્રના અમરાવતીમાં ઉમેશ કોલ્હે હત્યા કેસમાં મુશ્ફિક અહેમદ અને અબ્દુલ અરબાઝ નામના વધુ બે આરોપીઓની ધરપકડ કરી છે. મુશ્ફિક અહેમદ મૌલવી છે અને અબ્દુલ અરબાઝ રહેબર NGOમાં એમ્બ્યુલન્સનો ડ્રાઈવર છે.

NIAએ બંને આરોપીઓને આજે કોર્ટમાં રજૂ કર્યા ત્યારે તેમણે કોર્ટને જણાવ્યું કે આ આરોપીઓએ આ હત્યાના માસ્ટરમાઇન્ડ ઈરફાન ખાન અને અન્ય આરોપીઓને હત્યા બાદ છુપાવવામાં મદદ કરી હતી. આ સિવાય NIAએ કહ્યું કે આ આરોપીઓએ ઉમેશ કોલ્હેની હત્યા કર્યા બાદ ડિનર પાર્ટીનું આયોજન કર્યું હતું. આ પાર્ટીમાં બીજા લોકોને પણ બોલાવવામાં આવ્યા હતા. હવે તેઓએ એ જાણવું પડશે કે આ ડિનર પાર્ટીમાં બીજું કોણ સામેલ હતું. બંને આરોપીઓને 12 ઓગસ્ટ સુધી NIA રિમાન્ડ પર મોકલવામાં આવ્યા છે.

નેશનલ ઇન્વેસ્ટિગેશન એજન્સી (NIA) એ બુધવારે અમરાવતીના ફાર્માસિસ્ટ ઉમેશ કોલ્હેની હત્યાના કેસમાં વધુ બે લોકોની ધરપકડ કરી છે. પોલીસના સૂત્રોએ આ માહિતીની જાણકારી આપી હતી. બુધવારે વધુ બેની ધરપકડ કરવામાં આવ્યા બાદ આ કેસના સંબંધમાં અત્યાર સુધીમાં નવની ધરપકડ કરવામાં આવી છે. સૂત્રોના જણાવ્યા અનુસાર, ધરપકડ કરાયેલા મૌલવી મુશ્ફિક અહેમદ (41) અને અબ્દુલ અરબાઝ (23) પર હત્યા માટે પૈસા ભેગા કર્યા અને અન્ય આરોપીઓને આશ્રય આપ્યાની શંકા હતી.

ભાજપના સસ્પેન્ડ કરાયેલા પ્રવક્તા નુપુર શર્માના સમર્થનમાં સોશિયલ મીડિયા પર કથિત રીતે પોસ્ટ કરવા બદલ ઉમેશ કોલ્હેની 21 જૂને હત્યા કરવામાં આવી હતી. 54 વર્ષીય કોલ્હે પર 21 જૂનની રાત્રે ત્રણ શખ્સોએ કથિત રીતે છરી વડે હુમલો કર્યો હતો. હોસ્પિટલમાં સારવાર દરમિયાન તેનું મોત નીપજ્યું હતું. પોલીસના જણાવ્યા અનુસાર, કેમિસ્ટ ઉમેશ કોલ્હેએ નૂપુર શર્માના સમર્થનમાં સોશિયલ મીડિયા પર એક પોસ્ટ મૂકી હતી. નુપુર શર્માએ મે મહિનામાં એક ટીવી ડિબેટમાં પૈગંબર મોહમ્મદ વિશે વિવાદાસ્પદ ટિપ્પણી કરી હતી. આ મામલાની તપાસ નેશનલ ઇન્વેસ્ટિગેશન એજન્સી (NIA) કરી રહી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.