iPhone અને એન્ડ્રોઇડ ફોનમાં ઓલા-ઉબરના ભાડા અલગ કેમ? કેન્દ્રએ કંપનીને નોટિસ આપી

વિવિધ મોડેલના મોબાઇલ ફોન માટે અલગ અલગ ભાડાના દર બતાવવા બદલ મુખ્ય કેબ એગ્રીગેટર્સ ઓલા અને ઉબેરને નોટિસ મોકલવામાં આવી છે. કેન્દ્રીય ગ્રાહક બાબતોના મંત્રી પ્રહલાદ જોશીએ ટ્વીટ કરીને આ માહિતી આપી હતી. મંત્રીએ કહ્યું કે, તેમને પાછલાં દિવસોમાં જ આવી ફરિયાદો મળી હતી જેમાં એવું જોવા મળ્યું હતું કે, કેબ એગ્રીગેટર્સ iPhone અને Android પર સમાન અંતર માટે અલગ અલગ ભાડા વસૂલતા હતા.

મંત્રીએ કહ્યું, 'તાજેતરમાં એવું જોવા મળ્યું છે કે, વિવિધ મોબાઇલ મોડેલો (આઇફોન/એન્ડ્રોઇડ)ના આધારે ભાડામાં તફાવત બતાવી રહ્યો છે. આ અંગે કાર્યવાહી કરતા, ગ્રાહક બાબતોના વિભાગે, સેન્ટ્રલ કન્ઝ્યુમર પ્રોટેક્શન ઓથોરિટી (CCPA) દ્વારા, મોબાઇલ ફોનના ભાડામાં તફાવત સામે પગલાં લીધાં છે. અમે ઓલા અને ઉબેર જેવા મુખ્ય કેબ એગ્રીગેટર્સને નોટિસ ફટકારી છે, અને તેમના જવાબો માંગ્યા છે.' જોશીએ ગયા મહિને કહ્યું હતું કે, 'ગ્રાહકોના શોષણ પ્રત્યે શૂન્ય સહિષ્ણુતા' રહેશે અને CCPAને આરોપોની સંપૂર્ણ તપાસ કરવા જણાવ્યું હતું. તેમણે આવી પ્રવૃત્તિઓને પ્રથમ દ્રષ્ટિએ અન્યાયી વેપાર પ્રથા અને ગ્રાહકોના પારદર્શિતાના અધિકારની 'ઘોર અવગણના' ગણાવી હતી.

As a follow-up to the earlier observation of apparent #DifferentialPricing based on the different models of mobiles (#iPhones/ #Android) being used, Department of Consumer Affairs through the CCPA, has issued notices to major cab aggregators #Ola and #Uber, seeking their…

— Pralhad Joshi (@JoshiPralhad) January 23, 2025

આ નોટિસનો હેતુ એ સમજવાનો છે કે, શું ખરેખર મોબાઇલ ફોનના મોડેલના આધારે ભાડામાં કોઈ તફાવત રાખવામાં આવી રહ્યો છે. જો આવું થઈ રહ્યું છે, તો તે ગ્રાહકોના અધિકારોનું ઉલ્લંઘન હોઈ શકે છે. તાજેતરના સમયમાં, ગ્રાહકોએ ફરિયાદ કરી હતી કે, આઇફોન અને એન્ડ્રોઇડ વપરાશકર્તાઓને એક જ અંતર માટે અલગ અલગ ભાડા બતાવવામાં આવી રહ્યા છે. એવો આરોપ છે કે, ઓલા અને ઉબેરના અલ્ગોરિધમ્સ ગ્રાહકોના ફોન મોડેલનું વિશ્લેષણ કરી રહ્યા છે અને તેમની ચુકવણી ક્ષમતાના આધારે કિંમતો નક્કી કરી રહ્યા છે. ચાલો અહીં તમને જણાવી દઈએ કે, iPhone અને Android બંને સ્માર્ટફોન છે. તેમના હાર્ડવેર અને સોફ્ટવેરમાં તફાવત હોય છે. આઇફોન એપલની iOS ઓપરેટિંગ સિસ્ટમ પર ચાલે છે, જ્યારે એન્ડ્રોઇડ ફોન ગૂગલની એન્ડ્રોઇડ ઓપરેટિંગ સિસ્ટમ પર ચાલે છે.

સેન્ટ્રલ કન્ઝ્યુમર પ્રોટેક્શન ઓથોરિટી (CCPA)એ આ મામલાની તપાસ શરૂ કરી દીધી છે. જો તપાસમાં આરોપો સાચા સાબિત થશે, તો આ કંપનીઓને કાનૂની કાર્યવાહીનો સામનો કરવો પડી શકે છે. અત્યાર સુધી આ બાબતે ઓલા અને ઉબેર તરફથી કોઈ સત્તાવાર નિવેદન બહાર આવ્યું નથી. નોટિસનો જવાબ મળ્યા પછી જ તેમનું વલણ સ્પષ્ટ થઈ શકશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.