શિંદેને હોમ મિનિસ્ટ્રી મળશે કે નહીં? દેવેન્દ્ર ફડણવીસે કરી દીધું ક્લિયર

મહારાષ્ટ્રમાં નવી સરકારના શપથ લીધા પછી ગૃહ વિભાગને લઈને સસ્પેન્સ અકબંધ છે. તો સવાલ એ ઉભો થાય છે કે, શું આ વિભાગ લેવા પર અડગ રહેલા DyCM એકનાથ શિંદેની માંગ BJP પૂરી કરશે? આ અંગે CM દેવેન્દ્ર ફડણવીસની પ્રતિક્રિયા સામે આવી છે. CM ફડણવીસે કહ્યું છે કે, આ અંગે ટૂંક સમયમાં નિર્ણય લેવામાં આવશે.

મહારાષ્ટ્રમાં નવી મહાયુતિ સરકારના રાજ્યાભિષેક પછી તમામની નજર ગૃહ વિભાગ પર ટકેલી છે. વિભાગોની વહેંચણી પહેલા રાજ્યના નવા CM બનેલા દેવેન્દ્ર ફડણવીસે સંકેત આપ્યા છે કે, ગૃહ વિભાગ તેમની પાસે રહેશે. એક ઈન્ટરવ્યુમાં CM ફડણવીસે કહ્યું કે, ગૃહમંત્રીએ કેન્દ્ર સાથે સંકલન કરવું પડશે. મંત્રાલયે મુંબઈ શહેરની સુરક્ષા, નક્સલવાદ વગેરે જેવા મુદ્દાઓ પર કેન્દ્ર સાથે નિયમિત સંપર્કમાં રહેવું પડશે. કેન્દ્રમાં BJPના નેતા ગૃહમંત્રી હોવાથી અને પક્ષના નેતા હોવાના કારણે મારા સંપર્કો વધુ છે, તેથી જ ગૃહ મંત્રાલય અમને જોઈએ છે. જો કે, ત્યાર પછી તેમણે એમ પણ કહ્યું કે, DyCM એકનાથ શિંદે સાથે ગૃહમંત્રી સહિત ઘણા મંત્રાલયો પર ચર્ચા કરી રહ્યા છીએ અને ટૂંક સમયમાં આ અંગે નિર્ણય લેવામાં આવશે.

CM ફડણવીસનું આ નિવેદન એવા સમયે આવ્યું છે, જ્યારે મહાયુતિના પ્રથમ કાર્યકાળમાં CM રહી ચૂકેલા DyCM એકનાથ શિંદે હવે આ વિભાગની માંગ કરી રહ્યા છે. શપથ લેતા પહેલા સંજય શિરસાટે આ અંગે નિવેદન પણ આપ્યું હતું. જ્યારે CM ફડણવીસને ગૃહ વિભાગ વિશે પૂછવામાં આવ્યું ત્યારે તેમણે સંકેત આપ્યો કે આ વિભાગ BJP પાસે જ રહેશે. આવી સ્થિતિમાં DyCM શિંદેને અન્ય વિભાગો મળવાની આશા છે. મહાયુતિના પ્રથમ કાર્યકાળમાં ગૃહ વિભાગ દેવેન્દ્ર ફડણવીસ પાસે રહ્યું હતું.

અન્ય એક પ્રશ્નના જવાબમાં CM ફડણવીસે કહ્યું કે, કેબિનેટનું વિસ્તરણ 16 ડિસેમ્બર પહેલા થઇ જશે. મહારાષ્ટ્રમાં, નવા ચૂંટાયેલા 288 ધારાસભ્યોને શપથ લેવડાવવા અને અધ્યક્ષની પસંદગી કરવા માટે 7 ડિસેમ્બરથી વિધાનસભાનું ત્રણ દિવસનું વિશેષ સત્ર બોલાવવામાં આવ્યું છે. આ પછી નાગપુરમાં વિધાનસભાનું શિયાળુ સત્ર શરૂ થશે. મહારાષ્ટ્રમાં, DyCM એકનાથ શિંદે અને DyCM અજિત પવારે હાલમાં જ CM દેવેન્દ્ર ફડણવીસ સાથે DyCM તરીકે શપથ લીધા છે. બાકીના મંત્રીઓના શપથ લેવાના બાકી છે. આ વખતે BJPના 21 અને શિવસેનાના 12 મંત્રીઓ કેબિનેટમાં સામેલ થવાની આશા છે. DyCM અજિત પવારની આગેવાની હેઠળની NCPને 10 મંત્રી પદ મળી શકે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.