2025 Honda Activa 125 ભારતમાં લોન્ચ, જાણો શું છે નવા ફીચર્સ, કિંમત કેટલી...

હોન્ડાએ ભારતીય બજારમાં તેનું નવું એક્ટિવા 125 સ્કૂટર લોન્ચ કર્યું છે. આ સ્કૂટર નવા કલર અને ઘણી આધુનિક સુવિધાઓથી સજ્જ છે. તેમાં બ્લૂટૂથ કનેક્ટિવિટી, નેવિગેશન અને USB ટાઇપ-C ચાર્જિંગ પોર્ટ જેવા ફીચર્સ સામેલ છે. આ સ્કૂટર OBD2B માપદંડોને અનુરૂપ છે અને વધુ સારી માઈલેજ આપે છે.

Honda Motorcycle and Scooterએ તેના નવા Activa 125 સ્કૂટરનું નવું વર્ઝન લોન્ચ કર્યું છે. નવું એક્ટિવા 125 નવા રંગ વિકલ્પો તેમજ અદ્યતન સુવિધાઓ સાથે આવે છે અને તે OBD2B સુસંગત છે. તેની પ્રારંભિક એક્સ-શોરૂમ કિંમત 94,422 રૂપિયા છે, જે DLX વેરિઅન્ટની કિંમત છે અને H-Smartના ટોપ વેરિઅન્ટની એક્સ-શોરૂમ કિંમત 97,146 રૂપિયા છે. કંપનીનો ઉદ્દેશ્ય ગ્રાહકોને વધુ સારી ટેક્નોલોજી અને સ્ટાઇલિશ ડિઝાઇન પ્રદાન કરવાનો છે. હોન્ડાને આશા છે કે, આ નવું મોડલ માર્કેટમાં સારું પ્રદર્શન કરશે.

2025 મોડલની નવી Honda Activa 125માં ઘણી નવી અને શાનદાર સુવિધાઓ ઉમેરવામાં આવી છે. તેનું 123.92 cc સિંગલ-સિલિન્ડર એન્જિન હવે OBD2B ધોરણોને અનુસરે છે. આ એન્જિન 6.20 કિલોવોટનો પાવર અને 10.5 ન્યૂટન મીટરનો ટોર્ક ઉત્પન્ન કરે છે. તેમાં એડવાન્સ્ડ આઈડલિંગ સ્ટોપ સિસ્ટમ પણ છે, જે ઈંધણની બચત કરે છે અને પર્યાવરણ માટે પણ સારી છે. અહીં તમને જણાવી દઈએ કે, OBD2B સ્ટાન્ડર્ડ વાહનોના ઉત્સર્જન પર નજર રાખે છે અને જો કોઈ સમસ્યા ઉત્પન્ન થઇ હોય તો તેની તરત જ ખબર પડી જાય છે. આ વાહનોથી થતા પ્રદૂષણને ઘટાડવામાં મદદ કરે છે. આ ધોરણ એન્જિનની કાર્યક્ષમતા વધારવામાં પણ મદદ કરે છે.

2025 મોડલ Honda Activa સ્કૂટરમાં 4.2-inch TFT ડિસ્પ્લે છે, જેને બ્લૂટૂથની મદદથી સ્માર્ટફોન સાથે કનેક્ટ કરી શકાય છે. Honda RoadSync એપ સાથે, રાઇડર્સ નેવિગેશન, કોલ અને મેસેજ એલર્ટ જેવી સુવિધાઓનો ઉપયોગ કરી શકે છે. મોબાઈલ ચાર્જ કરવા માટે તેમાં USB Type-C ચાર્જિંગ પોર્ટ પણ આપવામાં આવ્યું છે.

હોન્ડાએ નવા 2025 મોડલમાં એક્ટિવા 125ની લોકપ્રિય ડિઝાઇનને પણ જાળવી રાખી છે. જોકે, સીટો અને આંતરિક પેનલમાં નવો વાઇબ્રન્ટ બ્રાઉન કલર ઉમેરવામાં આવ્યો છે. આ સ્કૂટર DLX અને H-Smart જેવા બે વેરિઅન્ટમાં ઉપલબ્ધ છે અને ગ્રાહકો તેને પર્લ ઇગ્નીયસ બ્લેક, મેટ એક્સિસ ગ્રે મેટાલિક, પર્લ ડીપ ગ્રાઉન્ડ ગ્રે, પર્લ સિરેન બ્લુ, રિબેલ રેડ મેટાલિક અને પર્લ પ્રિશિયસ વ્હાઇટ જેવા 6 આકર્ષક કલર વિકલ્પોમાં ખરીદી શકે છે.

નવી 2025 Honda Activa 125 હવે સમગ્ર દેશમાં Honda મોટરસાઇકલ અને સ્કૂટર ઇન્ડિયા ડીલરશિપ પર ઉપલબ્ધ છે. હોન્ડાને આશા છે કે, એક્ટિવાનું નવું મોડલ તેની સ્ટાઈલ, પરફોર્મન્સ અને ટેક્નોલોજીના ઉત્તમ કોમ્બોને કારણે ભારતીય બજારમાં સારું પ્રદર્શન કરશે અને ગ્રાહકોને તે પસંદ આવશે.

એક્ટિવા 2025 મૉડલના લૉન્ચ પ્રસંગે બોલતા, હોન્ડા મોટરસાઇકલ એન્ડ સ્કૂટર ઇન્ડિયાના પ્રેસિડેન્ટ અને CEO, MD, સુત્સુમુ ઓટાનીએ જણાવ્યું હતું કે, 'અમે નવી OBD2B- સુસંગત એક્ટિવા 125 રજૂ કરતાં અત્યંત ખુશ છીએ. આ અપડેટેડ મોડલ દ્વારા, અમે ગ્રાહકોની જરૂરિયાતો અને સંતોષને ધ્યાનમાં રાખીને 125cc સેગમેન્ટમાં નવીનતાનું નવું ધોરણ સ્થાપિત કરી રહ્યા છીએ. આ દરમિયાન, HMSI સેલ્સ અને માર્કેટિંગ ડિરેક્ટર યોગેશ માથુરે જણાવ્યું હતું કે, Activa 125 સ્કૂટર હંમેશા ગ્રાહકોનું પ્રિય રહ્યું છે અને તેનું નવું વર્ઝન તેને વધુ સારું બનાવી રહ્યું છે. માથુરના મતે, નવા રંગો અને આધુનિક ટેક્નોલોજી સાથે આ સ્કૂટર માર્કેટમાં પોતાની મજબૂત સ્થિતિ જાળવી રાખશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.