મર્સિડીઝે લોન્ચ કરી G-ક્લાસ EV, 32 મિનિટ ચાર્જમાં 473 Km ભાગશે, કિંમત ના પૂછતા

અગ્રણી જર્મન લક્ઝરી કાર ઉત્પાદક મર્સિડીઝ-બેન્ઝે આજે નવી ઇલેક્ટ્રિક G-ક્લાસ (G 580) લોન્ચ કરીને ભારતીય બજારમાં તેની EV શ્રેણીનો વિસ્તાર કર્યો. આ ઇલેક્ટ્રિક SUVની શરૂઆતની કિંમત 3 કરોડ રૂપિયા (એક્સ-શોરૂમ) છે. આ એક ફુલ્લી લોડેડ ઇલેક્ટ્રિક SUV છે. કંપનીએ આ કારનું બુકિંગ શરૂ કરી દીધું છે અને તેને આવતા અઠવાડિયે ઇન્ડિયા મોબિલિટી ગ્લોબલ એક્સ્પો દરમિયાન પણ પ્રદર્શિત કરવામાં આવશે.

તે મૂળભૂત રીતે G-ક્લાસમાંથી તેનું બોક્સી સિલુએટ મેળવે છે. EQ બેજ ઉપરાંત, હવાના પડદા સાથેનો થોડો ઊંચો હૂડ તેને અલગ પાડે છે. છતના આગળના ભાગમાં નવી A-પિલર ડિઝાઇન અને આગળ ઉપરની તરફ સ્પોઇલર લિપ આપવામાં આવ્યું છે. પાછળના વ્હીલ-આર્ચ ફ્લેર્સમાં પણ એર કર્ટેન્સ મળે છે. કંપનીએ એરોડાયનેમિક્સ અને કેબિનનો અવાજ ઘટાડવા માટે આ કર્યું છે.

આ SUVનું કેબિન મોટાભાગે G-ક્લાસ જેવું જ છે. જોકે, ઇલેક્ટ્રિક SUV તરીકે, કેટલાક સ્વીચો વગેરેમાં ચોક્કસ ફેરફારો જોવા મળે છે. તેમાં મર્સિડીઝ બેન્ઝની MBUX મલ્ટીમીડિયા સિસ્ટમ આપવામાં આવી છે. જેમાં 12.3 ઇંચની ડ્યુઅલ સ્ક્રીનનો સમાવેશ થાય છે. જેનો ઉપયોગ ડ્રાઇવર ડિસ્પ્લે અને ટચસ્ક્રીન ઇન્ફોટેનમેન્ટ યુનિટ તરીકે થઇ શકશે. ટચસ્ક્રીનની નીચે હીટિંગ, વેન્ટિલેશન અને AC કંટ્રોલ બટનો જોવા મળે છે.

મર્સિડીઝ-બેન્ઝે આ ઇલેક્ટ્રિક SUVમાં EQS જેવો જ બેટરી સેટઅપ આપ્યો છે. પરંતુ કોષોને અલગ આકારના પેકમાં ફીટ કરવામાં આવ્યા છે અને ચેસિસ રેલ્સ વચ્ચે સંગ્રહિત કરવામાં આવે છે. કંપનીએ આ SUVમાં 116kWh બેટરી પેક આપ્યો છે. એવો દાવો કરવામાં આવે છે કે, તે એક જ ચાર્જ પર 473 Km (WLTP સાયકલ)ની ડ્રાઇવિંગ રેન્જ આપે છે. ફાસ્ટ ચાર્જર સાથે, તેની બેટરી માત્ર 32 મિનિટમાં 10થી 80 ટકા સુધી ચાર્જ થઈ શકે છે.

તેની વોટર વેડિંગ ક્ષમતા 850 mm છે, જે સ્ટાન્ડર્ડ G-ક્લાસ કરતા 100 mm વધુ છે. જોકે, G 580નું સૌથી લોકપ્રિય કાર્ય G-ટર્ન આપવામાં આવેલું છે, જે આ SUVને એક જ જગ્યાએ 360 ડિગ્રી ફેરવવાની મંજૂરી આપે છે. તેમાં એક G-સ્ટીયરિંગ ફીચર પણ આપવામાં આવ્યું છે. જે એક પૈડાંને ચારેય બાજુ ફેરવવાથી વળાંકના વર્તુળને ઘટાડે છે.

આ SUV પિક-અપની દ્રષ્ટિએ પણ ઘણી સારી છે. કંપનીનો દાવો છે કે, આ ઇલેક્ટ્રિક SUV માત્ર 4.7 સેકન્ડમાં 0થી 100 Km પ્રતિ કલાકની ઝડપ પકડી શકે છે. તેની ટોપ સ્પીડ 180 Km પ્રતિ કલાક છે. તેની ઇલેક્ટ્રિક મોટર 587 hp પાવર અને 1,164 Nm ટોર્ક જનરેટ કરે છે.

G-ક્લાસ તેની શક્તિશાળી ઑફરોડિંગ ક્ષમતાઓ માટે વિશ્વભરમાં જાણીતી છે. તેનું આગળનું સસ્પેન્શન જાળવી રાખવામાં આવ્યું છે. જોકે, તેમાં પાછળનો કઠોર એક્સલ અને વર્ચ્યુઅલ મિકેનિકલ ડિફરન્શિયલ લોક છે, જે ઑપ્ટિમાઇઝ્ડ ટોર્ક વેક્ટરિંગ પ્રદાન કરે છે. તેમાં લો-રેન્જ ટ્રાન્સમિશન અને ઓફ-રોડ ક્રોલ ફંક્શન પણ આપવામાં આવેલું છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.