મોહમ્મદ શમીને લઈને આવ્યું મોટું અપડેટ, જાણો ઓસ્ટ્રેલિયા રમવા જશે કે નહીં

ઓસ્ટ્રેલિયા સામેની ચોથી ટેસ્ટ મેચ પહેલા ભારત માટે ઝટકા સમાન સમાચાર આવ્યા છે. મોહમ્મદ શમી બાકીની બે મેચ રમવા માટે ઓસ્ટ્રેલિયા જઈ શકશે નહીં. પહેલા એવી વાત ચાલી રહી હતી કે, મોહમ્મદ શમી એકદમ ફીટ થઈ ગયો છે. તેણે રણજી ટ્રોફીમાં પણ સારું પ્રદર્શન કર્યું હતું, પરંતુ તે ઈજામાંથી સંપૂર્ણપણે ફીટ થઈ શક્યો નથી, જેને કારણે BCCIની મેડિકલ ટીમે સ્પષ્ટ કરી દીધું છે કે, મોહમ્મદ શમી ઓસ્ટ્રેલિયા ટેસ્ટ રમવા જઈ શકશે નહીં.

BCCIએ પોતાની પ્રેસ રીલિઝમાં જણાવ્યું હતું કે, મેડિકલ ટીમ ભારતીય ફાસ્ટ બોલર મોહમ્મદ શમીની જમણી એડીની સર્જરી બાદ તેની રિકવરી પર નજીકથી કામ કરી રહી છે. શમી આ હીલની સમસ્યામાંથી સંપૂર્ણ રીતે બહાર આવી ગયો છે.

શમીએ નવેમ્બરમાં મધ્ય પ્રદેશ સામે બંગાળ માટે રણજી ટ્રોફી મેચમાં 43 ઓવર ફેંકી હતી. આને કારણે તે સૈયદ મુશ્તાક અલી ટ્રોફીની તમામ નવ ગેમ રમ્યો હતો, જ્યાં તેણે ટેસ્ટ મેચો માટે તૈયાર થવા માટે તેનો બોલિંગ લોડ વધારવા માટે વધારાના બોલિંગ સેશનમાં પણ ભાગ લીધો હતો. જો કે, તેના ડાબા ઘૂંટણમાં તેના બોલિંગ વર્કલોડથી વધતા જોઇન્ટ લોડિંગને કારણે નજીવો સોજો દેખાયો છે. લાંબા સમય પછી બોલિંગમાં વધારો થવાને કારણે સોજો અપેક્ષિત રેખાઓ પર છે.

વર્તમાન તબીબી મૂલ્યાંકનના આધારે BCCIની મેડિકલ ટીમે નક્કી કર્યું છે કે તેના ઘૂંટણને બોલિંગ લોડના નિયંત્રિત એક્સપોઝર માટે વધુ સમયની જરૂર છે. પરિણામે, તે બોર્ડર-ગાવસ્કર ટ્રોફીની બાકીની બે ટેસ્ટ માટે રમવા જઈ શકશે નહીં.

ઉલ્લેખનીય છે કે, ઓસ્ટ્રેલિયા સામે બૂમરાહ સિવાય તમામ બોલરો કંઈ ખાસ ઉકાળી શક્યા નથી, ખાસ કરીને મોહમ્મદ સીરાજ બધી મેચ રમ્યો છે, પણ તે અપેક્ષા મુજબનું પ્રદર્શન કરી શક્યો નથી. હવે જોઈએ ચોથી ટેસ્ટમાં શું થાય છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.