ICCની T20 ટીમ ઓફ ધ યર જાહેર, રોહિત બન્યો કેપ્ટન, આ 3 ભારતીય ખેલાડીઓનો પણ સમાવેશ

ઇન્ટરનેશનલ ક્રિકેટ કાઉન્સિલ (ICC)એ 2024ની મેન્સ T20 ટીમ ઓફ ધ યરની જાહેરાત કરી છે. રોહિત શર્માને આ ટીમનો કેપ્ટન બનાવવામાં આવ્યો છે. રોહિતની કેપ્ટનશીપમાં જ ભારતીય ટીમે 2024નો T20 વર્લ્ડ કપ જીત્યો હતો. જોકે, T20 વર્લ્ડ કપ સમાપ્ત થયા પછી તરત જ, રોહિતે T20 ઇન્ટરનેશનલને અલવિદા કહી દીધું હતું.
ICCની આ T20 ટીમમાં ભારતના સૌથી વધુ ચાર ખેલાડીઓનો સમાવેશ કરવામાં આવ્યો છે. આમાં રોહિત શર્મા, જસપ્રીત બુમરાહ, અર્શદીપ સિંહ અને હાર્દિક પંડ્યાના નામનો સમાવેશ થાય છે. આ ટીમમાં ઓસ્ટ્રેલિયા, ઈંગ્લેન્ડ, પાકિસ્તાન, ઝિમ્બાબ્વે, શ્રીલંકા, અફઘાનિસ્તાન અને વેસ્ટ ઈન્ડિઝના એક-એક ખેલાડીને પણ સ્થાન મળ્યું છે.
રોહિત શર્માએ 2024ના T20 વર્લ્ડ કપમાં શાનદાર પ્રદર્શન કર્યું અને ત્રણ અડધી સદી ફટકારી. આ દરમિયાન તેણે ઓસ્ટ્રેલિયા સામે 92 રનની આક્રમક ઇનિંગ પણ રમી. પોતાની બેટિંગ ઉપરાંત, રોહિતે કેપ્ટનશીપમાં પણ શ્રેષ્ઠ પ્રદર્શન કર્યું અને ભારતીય ટીમને ચેમ્પિયન બનાવવામાં મહત્વપૂર્ણ ભૂમિકા ભજવી. રોહિતે ગયા વર્ષે 11 T20 મેચમાં 42.00ની સરેરાશથી 378 રન બનાવ્યા હતા.
ઓલરાઉન્ડર હાર્દિક પંડ્યાની વાત કરીએ તો, તેણે ગયા વર્ષે T20 ઇન્ટરનેશનલમાં બોલ અને બેટથી પોતાની છાપ છોડી હતી. હાર્દિકે 2024માં ભારત માટે 17 T20 મેચોમાં 352 રન બનાવવા ઉપરાંત 16 વિકેટ લીધી હતી. ભારતીય ટીમને વિશ્વ ચેમ્પિયન બનાવવામાં તેણે પણ મહત્વપૂર્ણ ભૂમિકા ભજવી હતી. 2024ના T20 વર્લ્ડ કપમાં, હાર્દિકે 144 રન બનાવ્યા અને 11 વિકેટ પણ લીધી હતી.
ગયા વર્ષે T20 આંતરરાષ્ટ્રીય ક્રિકેટમાં ઝડપી બોલર જસપ્રીત બુમરાહનું શાનદાર પુનરાગમન થયું હતું. ભારતીય ફાસ્ટ બોલિંગ યુનિટનું નેતૃત્વ કરતા, બુમરાહે 2024ના T20 વર્લ્ડ કપ દરમિયાન કુલ 8 મેચોમાં 8.26ની પ્રભાવશાળી સરેરાશથી 15 વિકેટ લીધી. બીજી તરફ, અર્શદીપ સિંહ 2024માં T20 આંતરરાષ્ટ્રીય ક્રિકેટમાં ભારતનો સૌથી સફળ બોલર હતો. ડાબા હાથના આ ઝડપી બોલરે ગયા વર્ષે 18 T20 મેચમાં 13.50ની પ્રભાવશાળી સરેરાશથી 36 વિકેટ લીધી હતી. અર્શદીપનું શ્રેષ્ઠ પ્રદર્શન 2024ના T20 વર્લ્ડ કપમાં રહ્યું હતું, જેમાં તેણે આઠ મેચમાં 17 વિકેટ લીધી હતી.
Congratulations to the elite players selected for the ICC Men’s T20I Team of the Year 2024 🙌 pic.twitter.com/VaPaV6m1bT
— ICC (@ICC) January 25, 2025
ICC મેન્સ T20I ટીમ ઓફ ધ યર 2024: રોહિત શર્મા (કેપ્ટન)-ભારત, ટ્રેવિસ હેડ-ઓસ્ટ્રેલિયા, ફિલ સોલ્ટ-ઇંગ્લેન્ડ, બાબર આઝમ-પાકિસ્તાન, નિકોલસ પૂરન (વિકેટકીપર)-વેસ્ટ ઇન્ડીઝ, સિકંદર રઝા-ઝિમ્બાબ્વે, હાર્દિક પંડ્યા-ભારત, રાશિદ ખાન-અફઘાનિસ્તાન, વાનિન્દુ હસરંગા-શ્રીલંકા, જસપ્રીત બુમરાહ-ભારત, અર્શદીપ સિંહ-ભારત.
નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.
તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.
લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.
ગુજરાતનું અગ્રેસર ન્યૂઝ પોર્ટલ, અહીં વાત થાય છે માત્ર ગુજરાત અને ગુજરાતનાં હિતની... Download Khabarchhe APP www.khabarchhe.com/downloadApp