પિંક બોલ ટેસ્ટમાં ટીમ ઈન્ડિયાની 81 ઓવરમાં જ 20 વિકેટ પડી... જાણો હારના વધુ કારણો

ભારત અને ઓસ્ટ્રેલિયા વચ્ચે પાંચ મેચની ટેસ્ટ શ્રેણીની બીજી મેચ એડિલેડમાં રમાઈ હતી. આ મેચમાં ભારતીય ટીમને 10 વિકેટથી હારનો સામનો કરવો પડ્યો હતો. મેચના ત્રીજા દિવસે (8 ડિસેમ્બર) ઓસ્ટ્રેલિયાને જીતવા માટે માત્ર 19 રનનો ટાર્ગેટ આપવામાં આવ્યો હતો, તેથી જીત તેમના માટે માત્ર ઔપચારિકતા રહી ગઈ હતી. હવે બંને ટીમો વચ્ચે શ્રેણીની ત્રીજી મેચ 14 ડિસેમ્બરથી બ્રિસ્બેનમાં રમાશે.

ભારતીય ટીમે પર્થ ટેસ્ટમાં 295 રનથી જીત નોંધાવી હતી. આવી સ્થિતિમાં ભારતીય ચાહકોને આશા હતી કે, તેમની ટીમ એડિલેડમાં પિંક બોલ ટેસ્ટમાં પણ સારું પ્રદર્શન કરશે. પરંતુ અહીં રોહિત શર્માના નેતૃત્વમાં ભારતીય ટીમ પોતાની આગલી જીતને આગળ વધારી શક્યું નહીં. તો આવો એક નજર નાખીએ કે, આ મેચમાં ભારતીય ટીમ શા માટે હારી..

આખી ટેસ્ટ મેચમાં ભારત રમ્યું માત્ર 81 ઓવરઃ આ મેચમાં ભારતીય ટીમના બેટ્સમેનો બંને દાવ સહિત માત્ર 81 ઓવર જ રમી શક્યા હતા. ભારતીય ટીમ પ્રથમ દાવમાં 180 રન અને બીજી ઈનિંગમાં 175 રન જ બનાવી શકી હતી. જો પ્રથમ દાવમાં ઓછામાં ઓછા 300 રન બનાવ્યા હોત તો ઘણો ફાયદો થયો હોત. પરંતુ અહીં ભારતીય ટીમ બંને ઇનિંગ્સને મળીને 355 રન બનાવી શકી હતી. આવી સ્થિતિમાં આપણે જીતની આશા કેવી રીતે રાખી શકીએ?

રોહિત ફરી એક વખત નાકામ રહ્યો : કેપ્ટન રોહિત શર્મા પારિવારિક કારણોસર પર્થ ટેસ્ટમાં રમ્યો ન હતો. તે આ મેચમાં પાછો ફર્યો હતો. જોકે, હિટમેન બંને દાવમાં નિષ્ફળ રહ્યો હતો. રોહિત પ્રથમ દાવમાં 3 રન અને બીજી ઈનિંગમાં 6 રન બનાવી શક્યો હતો. રોહિત આ મેચમાં છઠ્ઠા નંબર પર બેટિંગ કરવા આવ્યો હતો, પરંતુ તેનો નિર્ણય યોગ્ય નહોતો. રોહિતે પ્રથમ ઇનિંગમાં 3 અને બીજી ઇનિંગમાં 6 રન બનાવ્યા હતા.

અશ્વિનનો યોગ્ય ઉપયોગ થયો ન હતો : આ મેચમાં વોશિંગ્ટન સુંદરની જગ્યાએ અનુભવી રવિચંદ્રન અશ્વિનને તક આપવામાં આવી હતી, જોકે તેનું પ્રદર્શન પણ ખાસ રહ્યું ન હતું. આ મેચમાં અશ્વિનનો યોગ્ય ઉપયોગ થયો ન હતો. ઓસ્ટ્રેલિયાની પ્રથમ ઇનિંગ્સ દરમિયાન તે બોલિંગ કરવા માટે ઘણો મોડો આવ્યો હતો. અશ્વિને 18 ઓવર ફેંકી હતી, જેમાં તેણે 53 રન આપીને એક વિકેટ લીધી હતી. બેટિંગથી અશ્વિને પ્રથમ દાવમાં 22 રન અને બીજા દાવમાં સાત રન બનાવ્યા હતા.

પાછલી મેચના સદીવીરો કામ ન આવ્યા : વિરાટ કોહલી અને યશસ્વી જયસ્વાલે પર્થ ટેસ્ટમાં ભારતની બીજી ઇનિંગમાં સદી ફટકારી હતી. પરંતુ આ બંને દિગ્ગજ એડિલેડમાં સંપૂર્ણપણે નિષ્ફળ ગયા. યશસ્વી પ્રથમ દાવમાં પહેલા જ બોલ પર આઉટ થયો હતો, જ્યારે બીજી ઇનિંગમાં તે 24 રન બનાવીને આઉટ થયો હતો. બીજી તરફ કોહલીએ પ્રથમ દાવમાં 7 રન અને બીજા દાવમાં 11 રનનું યોગદાન આપ્યું હતું.

શોર્ટ પિચ બોલનો યોગ્ય ઉપયોગ કરવામાં આવ્યો ન હતોઃ ઓસ્ટ્રેલિયાના ત્રણેય ઝડપી બોલરો મિચેલ સ્ટાર્ક, પેટ કમિન્સ અને સ્કોટ બોલેન્ડે આ મેચમાં શોર્ટ પિચ બોલનો ઉપયોગ કર્યો હતો. આવી સ્થિતિમાં તેમણે સફળતાઓ પણ હાંસલ કરી. તેનાથી ઉલટું, આ મેચમાં ભારતીય બોલરો થોડા નબળા દેખાતા હતા. ટ્રેવિસ હેડ જ્યારે બેટિંગ કરી રહ્યો હતો ત્યારે, શોર્ટ પિચ બોલ નાખીને તેને આઉટ કરી શકતે. તે ઘણી વખત શોર્ટ પિચ બોલ પર આઉટ થયો છે. ભારતીય ટીમે હેડને ઘણી વખત જીવનદાન પણ આપ્યું, જેનો ફાયદો ઉઠાવીને તેણે 140 રન બનાવ્યા.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.