સૌથી મહત્ત્વની ટેસ્ટના સૌથી મહત્ત્વના દિવસે જૈસવાલની શરમજનક હેટ્રિક

ક્રિકેટના મેદાન પર બોલર 3 વિકેટ લઈને હેટ્રિક લઈને ટીમને મજબૂતી અપાવે અને બધા તેની વાહવાહી કરે છે, પણ હાલમાં ચાલી રહેલી બોર્ડર-ગાવસ્કર ટ્રોફીની ચોથી ટેસ્ટના ચોથા દિવસે ભારતીય ખેલાડી યશસ્વી જૈસવાલે એવી હેટ્રિક લીધી છે કે લોકો તેની ઝાટકણી કાઢી રહ્યા છે. મહત્ત્વની મેચના સૌથી મહત્ત્વના દિવસે યશસ્વી જૈસવાલે ઓસ્ટ્રેલિયાના ખેલાડીઓના 3 કેચ છોડી દીધા હતા અને ઓસ્ટ્રેલિયાએ 329 રનની લીડ મેળવી લીધી છે. આવી ફીલ્ડિંગને કારણે જૈસવાલની સોશિયલ મીડિયા પર બરાબર ઝાટકણી કાઢવામાં આવી છે.

પહેલા જૈસવાલે ઉસ્માન ખ્વાજાનો કેચ છોડ્યો હતો, ત્યાર બાદ તેણે માર્નસ લાબુશેનનો કેચ છોડ્યો જો લાબુશેનનો કેચ પકડી લીધો હોત તો ભારત મજબૂત સ્થિતિમાં હોત. ત્યાર બાદ જૈસવાલે ઓસ્ટ્રેલિયન કેપ્ટન પેટ કમિન્સનો પણ કેચ છોડી દીધો હતો. આ જોયા બાદ કેપ્ટન રોહિત શર્માએ પણ તેને ઝાટકી નાખ્યો હતો.

બોર્ડર-ગાવસ્કર ટ્રોફી હેઠળ ભારતીય ટીમ અને ઓસ્ટ્રેલિયા વચ્ચે 5 મેચોની ટેસ્ટ શ્રેણીની ચોથી મેચ મેલબોર્નમાં રમાઈ રહી છે. મેચના ચોથા દિવસે (29 ડિસેમ્બર) ખૂબ જ રોમાંચક રમત જોવા મળી હતી. ભારતીય ટીમે બીજા દાવમાં શરૂઆતથી જ ઓસ્ટ્રેલિયા પર મજબૂત પકડ જમાવી હતી.

પરંતુ રમતના અંત સુધીમાં ઓસ્ટ્રેલિયાએ છેલ્લી વિકેટ માટે મજબૂત ભાગીદારી કરીને આખી બાજી પલટી દીધી હતી. ચોથા દિવસની રમતના અંત સુધીમાં યજમાન ઓસ્ટ્રેલિયાએ 9 વિકેટ ગુમાવીને 228 રન બનાવી લીધા હતા. જ્યારે પ્રથમ દાવમાં તેને 105 રનની લીડ મળી હતી.

આ રીતે ઓસ્ટ્રેલિયાએ બીજા દાવમાં કુલ મળીને 333 રનની લીડ મેળવી લીધી છે. જ્યારે છેલ્લી વિકેટ પાડવાની હજુ બાકી છે. એક સમયે ભારતીય ટીમે 173 રનમાં 8મી વિકેટ લઈને મેચ પર મજબૂત પકડ જમાવી હતી. તે સમયે ઓસ્ટ્રેલિયા પાસે માત્ર 278 રનની લીડ હતી.

આ પછી કેચ ડ્રોપ અને નો બોલની ભૂલોએ ભારતીય ટીમને ઘણી પાછળ પાડી દીધી. ઓસ્ટ્રેલિયાને 174ના સ્કોર પર સમેટી લેવાની સુવર્ણ તક હતી, પરંતુ એક કેચ ડ્રોપએ તે છીનવી લીધું. હકીકતમાં ઇનિંગની 66મી ઓવર મોહમ્મદ સિરાજે ફેંકી હતી.

તેનો પહેલો જ બોલ, સિરાજે બહારની બાજુએ લેન્થ બોલ ફેંક્યો. તેના પર બોલ નાથન લિયોનના બેટની કિનારી લઈને સીધો હવામાં જતો જોવા મળ્યો હતો. જ્યાં સિરાજની પાસે તેને પકડવાની તક હતી. તેણે હાથ પણ લગાવ્યો, પણ કેચ ન પકડી શક્યો. આ કેચ ડ્રોપ ભારતીય ટીમ માટે ખતરનાક રહ્યું હતું.

In the last over of Day Four, Jasprit Bumrah thought he taken the final wicket.

But it was called a no-ball. #AUSvIND pic.twitter.com/Yc9kjO3bVc

— cricket.com.au (@cricketcomau) December 29, 2024

ત્યારે નાથન લિયોન 5 રન બનાવીને રમી રહ્યો હતો. પરંતુ ચોથા દિવસની રમતના અંત સુધીમાં તેણે અણનમ 41 રન બનાવી લીધા હતા. જ્યારે તેનો પાર્ટનર સ્કોટ બોલેન્ડ 10 રન બનાવીને અણનમ રહ્યો હતો. બંને વચ્ચે 10મી વિકેટ માટે 110 બોલમાં 55 રનની અણનમ ભાગીદારી થઈ હતી. જો સિરાજે કેચ લઇ લીધો હોત તો આ ભાગીદારી થઈ ન હોત.

ચોથા દિવસે જસપ્રીત બુમરાહે રમતની છેલ્લી ઓવર નાખી. આ 82મી ઓવરના ચોથા બોલ પર નાથન લિયોન કેચ આઉટ થયો હતો. બોલ તેના બેટની કિનારી લઈને સ્લિપમાં ઉભેલા KL રાહુલના હાથમાં ગયો. રાહુલે પણ તેને ખૂબ જ મુશ્કેલીથી પકડી લીધો હતો.

પરંતુ અહીં બુમરાહે મોટી ભૂલ કરી. હકીકતમાં, તેનો પગ લાઈનની બહાર પડ્યો હતો, તેને નો-બોલ જાહેર કરવામાં આવ્યો હતો. આ કારણે રાહુલનો કેચ પણ નિરર્થક ગયો અને નાથન લિયોનને બીજું જીવનદાન મળ્યું હતું. જો કે, ચોથા દિવસે રમત અહીં અટકી ગઈ હતી. પરંતુ છેલ્લા દિવસે આ કેચ કેટલો ભારે પડશે તે હવે જોવું રહ્યું.

મેચમાં ટોસ જીત્યા પછી ઓસ્ટ્રેલિયાએ પ્રથમ બેટિંગ કરવાનો નિર્ણય કર્યો અને 474 રનનો મોટો સ્કોર કર્યો. આ પછી ભારતીય ટીમે પ્રથમ દાવમાં 369 રન બનાવ્યા હતા. આ રીતે કાંગારૂ ટીમને પ્રથમ દાવમાં 105 રનની લીડ મળી હતી.

આ પછી ચોથા દિવસની રમતના અંતે ઓસ્ટ્રેલિયાએ 9 વિકેટે 228 રન બનાવી લીધા હતા. નાથન લિયોન 41 રને અણનમ રહ્યો અને બોલેન્ડ 10 રન બનાવીને અણનમ રહ્યો. બંને વચ્ચે 10મી વિકેટ માટે 110 બોલમાં 55 રનની અણનમ ભાગીદારી થઈ હતી. ઓસ્ટ્રેલિયાએ બીજી ઇનિંગમાં અત્યાર સુધી કુલ 333 રનની લીડ મેળવી લીધી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.