43 વર્ષમાં 12 વાર કર્યા પોતાના પતિ સાથે લગ્ન-છૂટાછેડા,કમાયા કરોડો,પકડાયું કૌભાંડ

એક સમય હતો જ્યારે લગ્નના બંધનને જીવનભરનું માનવામાં આવતું હતું, પરંતુ સમય બદલાતાની સાથે આ પવિત્ર સંબંધોની વ્યાખ્યા પણ બદલાઈ ગઈ. હવે, લગ્નો જેટલી ધામધૂમથી થાય છે, છૂટાછેડા પણ એટલી જ સરળતા અને નિખાલસતાથી થાય છે. પરંતુ આજે અમે તમને એક એવી ઘટના વિશે જણાવવા જઈ રહ્યા છીએ, જે આ બધાથી બિલકુલ અલગ અને ચોંકાવનારી છે.

કાયદાનો હેતુ લોકોને ન્યાય આપવાનો છે, પરંતુ કેટલાક લોકો એવા પણ છે જે કાયદામાં છીંડા શોધીને તેનો ઉપયોગ પોતાના ફાયદા માટે કરે છે. ઓસ્ટ્રિયામાં એક અનોખી વાત સામે આવી છે, જ્યાં એક કપલે છેલ્લા 43 વર્ષમાં 12 વાર લગ્ન કર્યા અને એટલી જ વાર છૂટાછેડા પણ લીધા. ઓડિટી સેન્ટ્રલના રિપોર્ટ અનુસાર, વિયેનાના આ વૃદ્ધ કપલનો મામલો એટલો વિચિત્ર છે કે, તે આખી દુનિયામાં ચર્ચાનો વિષય બની ગયો છે.

વિયેનામાં રહેતા આ વૃદ્ધ દંપતીએ 43 વર્ષમાં 12 વખત લગ્ન અને છૂટાછેડા લીધા હતા, તેમના પડોશીઓ અનુસાર, બંને વચ્ચે ગાઢ પ્રેમ અને આદર્શ સંબંધ છે. તેઓ છેલ્લા 43 વર્ષથી કોઈપણ વિવાદ વગર સાથે રહે છે. પરંતુ તેઓ શા માટે છૂટાછેડા લેતા હતા અને દર ત્રણ વર્ષે ફરીથી લગ્ન કરતા હતા તે બધાને આશ્ચર્યમાં મૂકે છે.

મહિલાના પહેલા પતિનું 1981માં અવસાન થયું હતું. આ પછી તેણે અન્ય વ્યક્તિ સાથે લગ્ન કર્યા પરંતુ તેમના વારંવાર છૂટાછેડા અને લગ્ન પાછળનું કારણ જાણવા માટે તમારે આખી વાર્તા સમજવી પડશે.

પોલીસ તપાસમાં જાણવા મળ્યું છે કે, દંપતી છૂટાછેડા લેતા હતા અને દર 2.5-3 વર્ષે ફરીથી લગ્ન કરતા હતા. આનું કારણ કાનૂની છટકબારી હતી, જેના દ્વારા મહિલા વારંવાર 27,000 યુરો (લગભગ રૂ. 28 લાખ) નું છૂટાછેડાનું પેન્શન મેળવી રહી હતી, જે તેને તેના પહેલા પતિના મૃત્યુ પછી પ્રાપ્ત થઈ હતી.

તપાસમાં એ પણ સામે આવ્યું છે કે દંપતીએ આ છેતરપિંડી દ્વારા 43 વર્ષમાં કુલ 3.26 લાખ યુરો (રૂ. 3.41 કરોડ) પેન્શન મેળવ્યું હતું. હવે આ બંને વિરુદ્ધ છેતરપિંડીનો કેસ ચાલી રહ્યો છે, ઑસ્ટ્રિયાના કાયદા અનુસાર, વિધવા જ્યાં સુધી તે ફરીથી લગ્ન ન કરે ત્યાં સુધી તેને આ પેન્શન મળી શકે છે. દંપતીએ આનો ફાયદો ઉઠાવ્યો અને દર ત્રણ વર્ષે છૂટાછેડા લીધા અને મહિલાને પેન્શનના પૈસા મળ્યા.

આ મામલો મે 2022માં પ્રકાશમાં આવ્યો, જ્યારે પેન્શન ઇન્સ્યોરન્સ સંસ્થાએ મહિલાને વિધવા પેન્શન આપવાનો ઇનકાર કર્યો. તપાસમાં જાણવા મળ્યું કે, આ દંપતીએ છેલ્લા 43 વર્ષમાં 12 વખત લગ્ન કર્યા અને છૂટાછેડા લીધા અને તે પણ માત્ર કાગળ પર.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.