ટ્રમ્પ અને મસ્ક વચ્ચે અસલી તાકાત કોની પાસે છે? આ ચર્ચાનો બંને નેતાઓએ આપ્યો જવાબ

ડોનાલ્ડ ટ્રમ્પ અમેરિકી રાષ્ટ્રપતિની ચૂંટણીમાં જીત્યા પછીથી સમાચારોમાં છવાયેલા છે. તેમણે શપથ લેતા પહેલા જ તેમની કેબિનેટની પસંદગી કરી લીધી છે. તેમની કેબિનેટના કેન્દ્રમાં અબજોપતિ એલોન મસ્ક છે. આવી સ્થિતિમાં, હવે એવું કહેવામાં આવી રહ્યું છે કે, નવી અમેરિકન સરકારમાં અસલી સત્તા મસ્કના હાથમાં હશે, પરંતુ હવે રાષ્ટ્રપતિ ટ્રમ્પે આના પર પ્રતિક્રિયા આપી છે.

ટ્રમ્પે એરિઝોનામાં કહ્યું કે, મસ્ક ખૂબ જ આશાસ્પદ અને મહેનતુ વ્યક્તિ છે. પરંતુ નવી સરકારમાં તેમની પાસે અસલી સત્તા નહીં હોય. આગામી ચૂંટણીમાં મસ્કના રાષ્ટ્રપતિ બનવાની સંભાવના પર નવા ચૂંટાયેલા રાષ્ટ્રપતિ ટ્રમ્પે પણ કહ્યું કે, મસ્ક અમેરિકાના રાષ્ટ્રપતિ નહીં બની શકે, કારણ કે તેમની પાસે રાષ્ટ્રપતિ બનવાનો બંધારણીય અધિકાર નથી, કારણ કે તેઓ આ દેશમાં જન્મ્યા નથી.

ટ્રમ્પે કહ્યું કે મને સ્માર્ટ લોકો ગમે છે. મસ્કે સારું કામ કર્યું છે. આવા વિશ્વાસપાત્ર લોકોની જરૂર છે જે સ્માર્ટ પણ હોય. પરંતુ અમેરિકાના રાષ્ટ્રપતિ બનવા માટે આ દેશમાં જન્મ લેવો જરૂરી છે.

ટ્રમ્પનું આ નિવેદન ડેમોક્રેટ્સની એવી ટીકા કર્યા પછી આવ્યું છે, જેમાં કહેવામાં આવી રહ્યું હતું કે, નવી સરકારમાં મસ્કની ભૂમિકા ટ્રમ્પ કરતા મોટી હશે. તેના પર ટ્રમ્પે કહ્યું કે, આ ડેમોક્રેટ્સની ચાલ છે. તેઓ હકીકતમાં એવો સંદેશ આપવા માંગે છે કે, નવી સરકારમાં મસ્ક સર્વોચ્ચ હશે. પરંતુ તે (મસ્ક) રાષ્ટ્રપતિ બનવાના નથી. હું સુરક્ષિત છું.

જ્યારે, મસ્કે સ્પષ્ટ કર્યું છે કે, તેણે શરૂઆતથી જ ટ્રમ્પનું સમર્થન કર્યું છે. ટ્રમ્પના કાર્યકાળ દરમિયાન તેઓ અમેરિકાને ફરીથી મહાન બનાવવા માટે કામ કરવાનું ચાલુ રાખશે.

અહીં તમને જણાવી દઈએ કે, દક્ષિણ આફ્રિકામાં જન્મેલા મસ્ક ફોર્બ્સ મેગેઝિન અનુસાર વિશ્વના સૌથી અમીર વ્યક્તિ છે. 2024ની રાષ્ટ્રપતિની ચૂંટણીમાં તેઓ ટ્રમ્પના સૌથી મોટા સમર્થક હતા. તેમણે જાહેર સ્તરે ટ્રમ્પને ખુલ્લેઆમ સમર્થન આપ્યું હતું અને પ્રચાર કર્યો હતો.

ટ્રમ્પ રાષ્ટ્રપતિ બન્યા પછી, મસ્ક અને ભારતીય મૂળના વિવેક રામાસ્વામીને ડિપાર્ટમેન્ટ ઑફ ગવર્નમેન્ટ એફિશિયન્સી (DOGE)ની જવાબદારી સોંપવામાં આવી. આ વિભાગનું કામ ઘણી જૂની નીતિઓ અને સમિતિઓને નાબૂદ કરવાનું અને સમગ્ર સંઘીય માળખામાં જરૂરી ફેરફારો કરવાનું રહેશે.

ડોનાલ્ડ ટ્રમ્પે રાષ્ટ્રપતિ ચૂંટણી પ્રચાર દરમિયાન જ સ્પષ્ટ કર્યું હતું કે, જો તેઓ રાષ્ટ્રપતિ બનશે તો દેશમાં મોટા પાયે પરિવર્તન આવશે. આ ફેરફારો માટે તેમણે એલોન મસ્ક અને વિવેક રામાસ્વામીને આ વિશેષ ટીમમાં સામેલ કર્યા, જેમની પાસે તેમના એજન્ડામાં ઘણા કાર્યો છે, હવે એ એજન્ડાને અમલમાં મૂકવાના છે.

ટ્રમ્પે રાષ્ટ્રપતિ ચૂંટણી પ્રચાર દરમિયાન કહ્યું હતું કે, વર્તમાન સરકારમાં નોકરશાહીનું વર્ચસ્વ છે. પરંતુ જો તેઓ રાષ્ટ્રપતિ બનશે તો મોટાપાયે ફેરફારો થશે. આવી સ્થિતિમાં, DOGE પ્રથમ અમેરિકન રાજકીય વ્યવસ્થામાં અમલદારશાહીની અંધાધૂંધ પ્રથાને સમાપ્ત કરવા માટે કામ કરશે. મસ્ક અને રામાસ્વામી તેને ખતમ કરવાનો પ્રયાસ કરશે.

પ્રમુખપદની ચૂંટણીના પ્રચાર દરમિયાન ટ્રમ્પ માટે પ્રચાર કરતા મસ્કે કહ્યું હતું કે, તેઓ અમેરિકાના 2 ટ્રિલિયન ડૉલરના ફેડરલ બજેટમાં કાપ મુકવામાં ટ્રમ્પની મદદ કરશે. આવી સ્થિતિમાં આ વિભાગ સરકારના બિનજરૂરી ખર્ચાઓને દૂર કરવાની દિશામાં કામ કરશે.

ચાલો હવે સમજીએ કે DOGE શું છે? અને ટ્રમ્પના આ નવા વિભાગનું નામ ક્યાંથી આવ્યું? હકીકતમાં Dogecoin એક લોકપ્રિય ક્રિપ્ટોકરન્સી છે અને તે વર્ષ 2013માં બનાવવામાં આવી હતી. Dogecoin વર્ષ 2013માં બિલી માર્કસ અને જેક્સન પામર દ્વારા લોન્ચ કરવામાં આવી હતી. તેમાં શિબા ઈનુ ડોગનો ફોટો છે.

રસપ્રદ વાત એ છે કે, બિટકોઈન અને અન્ય ક્રિપ્ટોકરન્સીની મજાક ઉડાડવા માટે ડોગેકોઈનને બનાવવામાં આવી હતી, પરંતુ આ ક્રિપ્ટોકરન્સી વર્ષ 2021માં ચર્ચામાં આવી હતી. તેના ચર્ચામાં આવવાનું કારણ પણ ઈલોન મસ્ક જ હતો.

તેણે આ ચલણ વિશે ટ્વિટ કરવાનું શરૂ કર્યું અને લોકો તેના પર ધ્યાન આપવા લાગ્યા. Dogecoinના લોગોને Doge કહેવામાં આવે છે. તેના મીમ્સ વાયરલ થયા પછી, ક્રિપ્ટોકરન્સી સમુદાયમાં લોકોનો રસ તેના તરફ વધ્યો.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.