‘ઇમરજન્સી’ને થિયેટરમાં રીલિઝ ન કરી હોત તો સારું થાત, કંગનાએ કેમ કહ્યું આવું

કંગના રનૌતની ફિલ્મ 'ઇમર્જન્સી' 17 જાન્યુઆરીએ મોટા પડદા પર રિલીઝ થઈ રહી છે. ઘણા વિવાદો અને વિલંબ પછી આખરે આ ફિલ્મ રિલીઝ થવા જઈ રહી છે. આ ફિલ્મનું દિગ્દર્શન કંગના રનૌત દ્વારા કરવામાં આવ્યું છે, આ તેની પહેલી દિગ્દર્શક ફિલ્મ છે. અગાઉ, કંગના રનૌતે ફિલ્મ મણિકર્ણિકાનો અડધો ભાગ દિગ્દર્શિત કર્યો હતો, કારણ કે મૂળ દિગ્દર્શકે ફિલ્મ અધવચ્ચે જ છોડી દીધી હતી. કંગના રનૌતના ચાહકો તેની ફિલ્મ આખરે રિલીઝ થવા અંગે ઉત્સાહિત છે, ત્યારે કંગનાએ તાજેતરમાં જ સ્વીકાર્યું હતું કે, આ ફિલ્મને ડાયરેક્ટ-ટુ-OTT પ્રીમિયરને બદલે થિયેટરોમાં રિલીઝ કરવી તેની ભૂલ હોઈ શકે છે. તેમણે એમ પણ કહ્યું કે, જો તેમણે OTTનો રસ્તો પસંદ કર્યો હોત, તો ફિલ્મને સેન્સર બોર્ડની ચકાસણીનો સામનો કરવો ન પડત.

મીડિયા સૂત્ર સાથેના એક ઇન્ટરવ્યુ દરમિયાન, કંગનાએ સ્વીકાર કર્યો કે, 'હું ડરી ગઈ હતી', જ્યારે તેને ફિલ્મના વારંવાર વિલંબ થવા વિશે પૂછવામાં આવ્યું ત્યારે તેમણે કહ્યું, 'મને લાગ્યું કે તેને થિયેટરોમાં રિલીઝ કરવાનો નિર્ણય ખોટો હતો. મને લાગ્યું કે મને OTT પર વધુ સારી ડીલ મળી શકી હોત. તો મારે સેન્સરશીપમાંથી પણ પસાર થવું ન પડત અને મારી ફિલ્મનું વિશ્લેષણ ન થયું હોત. મને ખબર નહોતી કે તેઓ (CBFC) શું શું દૂર કરશે અને તેઓ અમને શું શું રાખવા દેશે.'

કંગના રનૌતે કહ્યું, 'મને લાગ્યું કે મેં ઘણા સ્તરો પર ખોટી પસંદગીઓ કરી છે: સૌ પ્રથમ, આ ફિલ્મનું દિગ્દર્શન કરવાની ઇચ્છા. મેં માની લીધું કે, ભલે આપણી પાસે કોંગ્રેસની સરકાર નથી... મેં પહેલા ફિલ્મ કિસ્સા કુર્સી કા વિશે વાત કરી હતી. આજ સુધી કોઈએ તે ફિલ્મ જોઈ નથી અને તે સમયે, તેઓએ બધી પ્રિન્ટ બાળી નાખી હતી. આ ઉપરાંત, શ્રીમતી ગાંધી વિશે કોઈએ ફિલ્મ બનાવી ન હતી. ઇમરજન્સી જોયા પછી, આજની પેઢીને એ વિચારીને આશ્ચર્ય થશે કે, તેઓ આવા તે કેવા બની ગયા; આખરે, તેઓ ત્રણ વાર PM બન્યા. મેં વસ્તુઓને ઓછી આંકી અને વિચાર્યું કે હું ઇમરજન્સી પર ફિલ્મ બનાવીને બચી જઈશ.'

કંગનાએ કહ્યું, 'નિરાશા થઇ હતી પણ અમે તેનો સામનો કર્યો. અમે નાની નાની બાબતોમાં પણ ચકાસણીનો સામનો કર્યા પછી અમે બધા દસ્તાવેજો સબમિટ કર્યા. ઘણા ઇતિહાસકારો અને વિવિધ પ્રાંતો અને સમુદાયોના લોકોએ તેને જોઈ અને તેમને કંઈ વાંધાજનક લાગ્યું નહીં. તેમણે એ પણ સ્વીકાર્યું કે ફિલ્મ ગેરકાયદેસર રીતે રોકી દેવામાં આવી હતી. પરંતુ અમને સરકારી સંસ્થાઓ પ્રત્યે ખૂબ માન છે અને અમે તેમને સંપૂર્ણ સહકાર આપ્યો છે.'

અનુપમ ખેર, શ્રેયસ તલપડે, અશોક છાબરા, મહિમા ચૌધરી, મિલિંદ સોમન, વિશાક નાયર અને સતીશ કૌશિક અભિનીત ફિલ્મ 'ઇમરજન્સી' 17 જાન્યુઆરીએ રિલીઝ થશે. બોક્સ-ઓફિસ પર ડિઝાસ્ટર તેજસ (2023) પછી કંગનાની પહેલી ફિલ્મ 'ઇમરજન્સી' છે. કંગના રનૌતે છેલ્લા 5 વર્ષમાં કોઈ હિટ ફિલ્મ આપી નથી, તેથી તેને આ ફિલ્મ પાસેથી ઘણી અપેક્ષાઓ છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.