ઉત્સવપ્રિય સરકારે બે વર્ષમાં 3 ઉત્સવોમાં 43 કરોડ ખર્ચ્યા

ગુજરાતની ઉત્સવપ્રિય ભાજપની સરકારે છેલ્લા બે વર્ષમાં ઉત્સવો પાછળ 43 કરોડનો ખર્ચ કર્યો છે. આ ખર્ચ મુખ્યત્વે પતંગોત્સવ અને નવરાત્રી મહોત્સવમાં થયો છે. ગુજરાત સરકારે 2016-2017ના વર્ષમાં રણોત્સવ પાછળ 533.72 લાખનો ખર્ચ કર્યો છે, જ્યારે 2017-18માં 317.63 લાખનો ખર્ચ કર્યો છે. એવી જ રીતે આ બન્ને વર્ષમાં અનુક્રમે પતંગોત્સવ પાછળ સરકારે 730.65 લાખ અને 851.61 લાખનો ખર્ચ કર્યો છે જ્યારે નવરાત્રી મહોત્સવ પાછળ બે વર્ષમાં અનુક્રમે 881.53 લાખ અને 977.67 લાખનો ખર્ચ કર્યો છે.

પ્રવાસન વિભાગ કહે છે કે આ મહોત્સવોમાં રાજ્ય બહારના અને વિદેશી મહેમાનો માટે રહેવા, જમવા તેમજ ટ્રાન્સપોર્ટેશન માટે બે વર્ષમાં સરકારે 416.23 લાખનો ખર્ચ કર્યો છે. મહેમાનો પાછળ થયેલા ખર્ચના આંકડા જોઇએ તો પતંગોત્સવમાં 351.63 લાખ અને નવરાત્રી મહોત્સવમાં 56.05 લાખનો ખર્ચ થયો છે. આ ખર્ચમાં સરકારે મહેમાનોને સાચવ્યા હોવાનો દાવો કરવામાં આવે છે.