ગાંધીનગરના રેલવે સ્ટેશનની વોચ કોણ રાખે છે? એ PM મોદીના મંત્રી છે

 ગાંધીનગરમાં બની રહેલી ફાઇવસ્ટાર હોટલ અને આધુનિક રેલવે સ્ટેશનની કામગીરીમાં વોચ ગોઠવવામાં આવી છે. આ બન્ને પ્રોજેક્ટમાં વિલંબ થઇ રહ્યો હોવાથી કેન્દ્રની નરેન્દ્ર મોદીની સરકારના એક અધિકારી વોચ રાખી રહ્યાં છે. તેઓ કામગીરીની સમીક્ષા પણ કરી રહ્યાં છે. આ બન્ને પ્રોજેક્ટ મોદીના ડ્રીમ પ્રોજેક્ટ હોવાથી કેન્દ્રની નજર છે. રાજ્ય સરકારની ધીમી કામગીરી સામે કેન્દ્રએ જાતે જ આ કામ હાથ પર ઉપાડી લીધું છે.

ભારતનું સૌપ્રથમ એરપોર્ટ જેવું રેલવે સ્ટેશન ગાંધીનગરમાં બની રહ્યું છે. આ રેલવે પ્રોજેક્ટની સમીક્ષા કરવાનું કામ મોદીએ તેમના રેલવે મંત્રી પીયૂષ ગોયલને આપ્યું છે. તેમણે રેલવેના અધિકારીઓ સાથે બેઠક કરી આ પ્રોજેક્ટ વહેલીતકે પૂર્ણ થાય તેની તાકીદ કરી છે. પીયૂષ ગોયલે કહ્યું છે કે ગાંધીનગરનું રેલવે સ્ટેશન વિશ્વસ્તરીય મુસાફરોને અદ્યતન સુવિધા આપશે.

તેમણે આ પ્રોજેક્ટ માટે બનાવેલી કંપની ગરૂડના અધિકારીઓને તાકીદ કરી હતી કે આ રેલવે સ્ટેશન અને હોટલનું નિર્માણ કાર્ય ડિસેમ્બર 2020 સુધીમાં થઇ જવું જોઇએ. જો કે આ અગાઉ 2019ના અંતમાં પ્રોજેક્ટ પૂર્ણ કરવાનું કહેવામાં આવ્યું હતું પરંતુ હવે તેમાં એક વર્ષનો ઉમેરો થયો છે. આ પ્રોજેક્ટનું નેતૃત્વ ભારતીય રેલવે સ્ટેશન વિકાસ નિગમ કરી રહ્યું છે.

આ રેલવે સ્ટેશનના ટ્રેક પર ફાઇવસ્ટાર હોટલ બની રહી છે. દેશની એક મોટી કંપની લીલા ગ્રુપ આ હોટલ બનાવે છે અને તે ચલાવશે. આ હોટલની આસપાસ દુકાનો, મોલ્સ, બિગબજાર સહિતની સુવિધાઓ હશે. આ પ્રોજેક્ટમાં વધુ એક ફુડકોર્ટનો પણ સમાવેશ કરવામાં આવ્યો છે. ગાંધીનગર ઉપરાંત ભોપાલમાં હબીબીગંજ રેલવે સ્ટેશનનો પણ પુનવિકાસ ડિસેમ્બર 2020 સુધીમાં પૂર્ણ થશે.