OLAએ લોન્ચ કર્યું સૌથી લાંબી રેન્જનું સ્કૂટર, સિંગલ ચાર્જમાં 320 KM, કિંમત છે...

દેશની અગ્રણી ઇલેક્ટ્રિક ટુ-વ્હીલર ઉત્પાદક ઓલા ઇલેક્ટ્રિકે આજે તેના ઇલેક્ટ્રિક સ્કૂટર્સનું ત્રીજી પેઢીનું મોડેલ લોન્ચ કર્યું, જે તેના વાહન પોર્ટફોલિયોમાં એક મોટું અપડેટ છે. કંપનીના આ નવા પોર્ટફોલિયોમાં કુલ ચાર વેરિઅન્ટ આવે છે, જેની શરૂઆતની કિંમત 79,999 રૂપિયા છે. જ્યારે, ઓલાએ તેનું નવું ફ્લેગશિપ ઇલેક્ટ્રિક સ્કૂટર S1 Pro Plus પણ લોન્ચ કર્યું છે, જે દેશનું સૌથી વધુ ડ્રાઇવિંગ રેન્જ ધરાવતું ઇલેક્ટ્રિક સ્કૂટર છે.

ઓલા ઇલેક્ટ્રિકના સ્થાપક અને CEO ભાવિષ અગ્રવાલે જણાવ્યું હતું કે, 'નવા ત્રીજી પેઢીના ઇલેક્ટ્રિક સ્કૂટરમાં ઘણા મોટા ફેરફારો કરવામાં આવ્યા છે. જે તેને પાછલા મોડેલો કરતા વધુ સારું બનાવે છે. ભાવિષએ કહ્યું કે અમે ફરી એકવાર નંબર વન ઇલેક્ટ્રિક સ્કૂટર બ્રાન્ડ બની ગયા છીએ અને હવે કંપની ઇલેક્ટ્રિક ટુ-વ્હીલર સેગમેન્ટમાં 25 ટકા હિસ્સો ધરાવતી થઇ ગઈ છે.' અહીં તમને જણાવી દઈએ કે, સેકન્ડ જનરેશન મોડેલના બે વેરિઅન્ટ, S1X અને S1X Proનું વેચાણ પણ ચાલુ રહેશે.

ઓલા ઇલેક્ટ્રિકનું કહેવું છે કે, નવી ત્રીજી પેઢીનું મોડેલ સંપૂર્ણપણે નવા પ્લેટફોર્મ પર બનાવવામાં આવ્યું છે. તેમાં સંપૂર્ણપણે નવી પાવરટ્રેનનો ઉપયોગ કરવામાં આવ્યો છે. નવા સ્કૂટરમાં હબલેસ મોટરને બદલે નવી મિડ-ડ્રાઇવ ઇલેક્ટ્રિક મોટર છે. જેમાં મોટર કંટ્રોલ યુનિટ (MCU) અને ઇલેક્ટ્રિક મોટર બંને એક જ બોક્સમાં ફીટ કરવામાં આવે છે. કંપનીનો દાવો છે કે આ નવી પાવરટ્રેન પહેલા કરતાં વધુ ડ્રાઇવિંગ રેન્જ પ્રદાન કરશે.

આ ઉપરાંત, કંપનીએ તેના નવા થર્ડ જનરેશન મોડેલમાં બેલ્ટ ડ્રાઇવને બદલે ચેઇન ડ્રાઇવ સિસ્ટમનો ઉપયોગ કર્યો છે. જે સ્કૂટરનું પ્રદર્શન વધુ સારું બનાવે છે. કંપનીએ તેની ચેઇન ડ્રાઇવના અવાજ પર પણ કામ કર્યું છે. બીજી પેઢીના મોડેલમાં બેલ્ટ ડ્રાઇવ સિસ્ટમ આપવામાં આવી છે.

ઓલા ઇલેક્ટ્રિકે ત્રીજી પેઢીના સ્કૂટરમાં તેની પેટન્ટ બ્રેક બાય વાયર ટેકનોલોજીનો ઉપયોગ કર્યો છે. કંપનીનું કહેવું છે કે, જ્યારે કોઈપણ સામાન્ય ટુ-વ્હીલરમાં બ્રેક લગાવવામાં આવે છે, ત્યારે વાહનની ગતિ ઊર્જામાંથી ગરમી ઉત્પન્ન થાય છે. આ બ્રેક પેડના જીવનને અસર કરે છે અને સાથે સાથે માઇલેજને પણ અસર થતી જોવા મળે છે.

પરંતુ આ નવા સ્કૂટરમાં આપવામાં આવતી બ્રેક બાય વાયર ટેકનોલોજી પેટન્ટ કરાયેલ બ્રેક-સેન્સરનો ઉપયોગ કરે છે. આ સેન્સર ફક્ત બ્રેકિંગ પેટર્ન જ નહીં, પરંતુ ઇમરજન્સી બ્રેકિંગ પણ શોધી કાઢે છે. આ ટેકનોલોજી મિકેનિકલ બ્રેકિંગ તેમજ ઇલેક્ટ્રોનિક બ્રેકિંગ જનરેટ કરે છે. આ સમય દરમિયાન ગતિ ઊર્જા વીજળીમાં રૂપાંતરિત થાય છે અને બેટરી ચાર્જ કરે છે. કંપનીનો દાવો છે કે, આ ટેક્નોલોજીની મદદથી સ્કૂટરને માત્ર 15 ટકા વધુ રેન્જ જ નથી મળતી પરંતુ, સ્કૂટરની બ્રેક-પેડ લાઇફ પણ બમણી થઈ જાય છે.

ઓલા થર્ડ જનરેશન બેઝ મોડેલ S1X કુલ ત્રણ બેટરી પેકમાં આવે છે જેમાં 2kW, 3kW અને 4kW બેટરી વિકલ્પો ઉપલબ્ધ હશે. જેની કિંમત અનુક્રમે રૂ. 79,999, રૂ. 89,999 અને રૂ. 99,999 છે. તેની ઇલેક્ટ્રિક મોટર 7KWની પીક પાવર જનરેટ કરે છે અને તેની ટોપ સ્પીડ 123 Km પ્રતિ કલાક છે. આ વેરિઅન્ટ માત્ર 3 સેકન્ડમાં 0 થી 40 Km પ્રતિ કલાકની ઝડપે દોડવા સક્ષમ છે. તેનું સૌથી મોટું બેટરી પેક એક જ ચાર્જમાં 242 કિલોમીટરની ડ્રાઇવિંગ રેન્જ આપવા સક્ષમ છે.

કંપનીએ ફક્ત 4kWh બેટરી પેક સાથે Ola S1X Plus મોડેલ રજૂ કર્યું છે. કંપનીનું કહેવું છે કે, આ સ્કૂટર પર સૌથી વધુ ધ્યાન આપવામાં આવ્યું છે. આ સ્કૂટરમાં આપવામાં આવેલ ઇલેક્ટ્રિક મોટર 11KWની પીક પાવર જનરેટ કરે છે. તેની કિંમત 1,07,999 રૂપિયા નક્કી કરવામાં આવી છે. આ સ્કૂટર માત્ર 2.7 સેકન્ડમાં 0 થી 40 કિલોમીટર પ્રતિ કલાકની ઝડપ પકડી શકે છે. તેની ટોપ સ્પીડ 125 Km/h છે. કંપનીનો દાવો છે કે આ સ્કૂટર એક જ ચાર્જ પર 242 કિલોમીટર સુધીની ડ્રાઇવિંગ રેન્જ આપશે.

ઓલા S1 પ્રો, જે અત્યાર સુધી કંપનીનું ફ્લેગશિપ મોડેલ રહ્યું છે, તેને કંપનીએ બે બેટરી પેક 3kWh અને 4kWh બેટરી પેકની સાથે રજૂ કર્યું છે. જેની કિંમત અનુક્રમે 1,14,999 રૂપિયા અને 1,34,999 રૂપિયા છે. અહીં તમને જણાવી દઈએ કે, બીજી પેઢીમાં, આ સ્કૂટર ફક્ત 4kWh બેટરી પેક સાથે આવતું હતું. કંપનીનો દાવો છે કે, તેની મોટર 11Kwની પીક પાવર જનરેટ કરે છે અને આ સ્કૂટર માત્ર 2.7 સેકન્ડમાં 0 થી 40 Km પ્રતિ કલાકની ઝડપ પકડી શકે છે. આ સ્કૂટર એક જ ચાર્જમાં 242 Kmની ડ્રાઇવિંગ રેન્જ આપશે.

ઓલાની ત્રીજી પેઢીનું સૌથી મોંઘુ અને ફ્લેગશિપ મોડેલ હવે S1 Pro Plus બની ગયું છે. કંપનીએ આ સ્કૂટરને 4kWh અને 5kWh બે બેટરી પેક સાથે લોન્ચ કર્યું છે. જેની કિંમત અનુક્રમે રૂ. 1,54,999 અને રૂ. 1,69,999 છે. તેમાં ડ્યુઅલ-ચેનલ એન્ટી-લોક બ્રેકિંગ સિસ્ટમ સાથે ઘણી અદ્યતન સુવિધાઓ આપવામાં આવી છે. આ દેશનું સૌથી શક્તિશાળી ઇલેક્ટ્રિક સ્કૂટર છે, જેની મોટર 13kWની પીક પાવર જનરેટ કરે છે. આ સ્કૂટર માત્ર 2.1 સેકન્ડમાં 0 થી 40 Km/hની ઝડપ પકડી શકે છે. તેની ટોપ સ્પીડ 141 Km/h છે અને આ સ્કૂટર એક જ ચાર્જમાં 320 Kmની મહત્તમ ડ્રાઇવિંગ રેન્જ આપશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.