મૈત્રીની જેમ દુશ્મનીનો સ્વાદ પણ ચાખવો જોઈએ
04 Jan, 2016
12:00 AM
PC:
ગયા વરસે આદરેલી વાત આ વરસે પૂરી કરીએ. લાસ્ટ સોમવારનો લેખ ન વાંચ્યો હોય તો વાંચી લેશો, નહીં તો આજનો લેખ ધડ-માથા વિનાનો લાગવાનો.
પંદર ક્વોટ્સ ગયા લેખમાં હતા, બાકીના પંદર આ રહ્યાં. 365 ગુણ્યા 4 માંથી ચૂંટેલા આ ત્રીસ ક્વોટેબલ ક્વોટ્સ છે, મારા મૌલિક વિચારો છે :
- ઉત્તમ સંબંધ એ છે જે તમારામાં રહેલી ઉત્તમ બાબતોને બહાર લાવે, તમારામાંની નકામી વસ્તુઓનો ધીમેધીમે નાશ કરી નાખે.
- કોઈ વ્યક્તિ માટે કોઈ એક સમયે લાગણી જન્મી હોય તો જન્મતાની સાથે જ જીવનની મૂડી બની જાય. ભવિષ્યમાં એ વ્યક્તિ માટે એવી જ લાગણી ન રહે તો એને કારણે મૂળ મૂડીમાંથી કશું ઓછું નથી થતું.
- કોઈને લાગે કે પોતાની અમુક વર્તણૂક કે પોતાના અમુક વિચારો સામેની વ્યક્તિને નહીં ગમે ત્યારે એમની સ્વીકૃતિ મેળવવા એમને જેવું ગમે તેવું સત્ય ઉચ્ચારવામાં આવે તે પણ જુઠ્ઠાણાનો જ એક પ્રકાર થયો.
- મદદની અપેક્ષા હોય અને ન મળે ત્યારે પોતાની લાચારી બદલ ચૂપચાપ, મનોમન બે આંસુ સારી લેવાનાં અને આંખ લૂછી પોતાની પ્રતિભા દ્વારા પોતાની બેહાલી દૂર કરવા પ્રયત્નો શરૂ કરવાના. મદદ ન મળે ત્યારે પ્રતિક્રિયા ન હોય. આખરે તો કોઈએ મદદ જ નથી આપી, તમારો હક તો નથી ડુબાડ્યો.
- કેટલાક લોકો સતત શંકાના, દુઃખના અને ઇર્ષ્યાના વિચારો સાથે જીવે છે અને પોતાનું જીવન દોઝખ બનાવી દે છે.
- કોઈ એક ચોક્કસ કિસ્સામાં કે એક કરતાં વધુ પરિસ્થિતિમાં વ્યક્તિએ પ્રામાણિકતા દેખાડી હોય તો માત્ર એ જ કારણસર એનામાં છુપાઈને બેઠેલી અપ્રમાણિકતા નામશેષ થઈ જતી નથી.
- જીવનમાંથી કોઈક સંબંધની બાદબાકી થઈ જશે કે કોઈક સંબંધ નહીં ઉમેરાય તો જીવન અધૂરું રહી જશે એવી અસલામતીથી પીડાતા લોકો એ સંબંધ સિવાયના એમના જીવનના બાકીના હિસ્સામાંથી મળતા આનંદને માણવાનું ગુમાવી બેસે છે.
- મા-બાપ સહિત સહુ કોઈને તમે લાખોમાં એક હો તો બહુ ગમે. પણ ખરેખર તમે જ્યારે લાખોમાં એક બનવાનો પ્રયત્ન શરૂ કરો છો ત્યારે કહે : આવું તે કંઈ થતું હશે? એનો ગર્ભિત અર્થ એવો કે બાકીના 99,999 લોકો જેવું જ તમારે વિચારવું, અનુભવવું અને કરવું.
- બે દેશની સરહદો વચ્ચે અડધો કિલોમીટર પહોળી પટ્ટીનો વિસ્તાર નો-મેન્સ લૅન્ડ. એ જમીન પર બેઉમાંનો કોઈ દેશ દાવો ન કરી શકે એ જમીન તારી નથી, મારી છે. જ્યાં મારું-તારુંના વિવાદને અવકાશ નથી તે પ્રદેશ નો-મેન્સ લૅન્ડ. નો-મેન્સ લૅન્ડનું કામ બે રાષ્ટ્ર વચ્ચેની સાઠમારી ટાળવાનું. તસુએ તસુ જમીનને નકશામાં સમાવી લેવાને બદલે થોડું હું જતું કરો, થોડું તમે જતું કરો એવા ભાવ સાથે દુનિયાના તમામ દેશોએ - પરસ્પર ગમે એટલી દુશ્મનાવટ હોય તો પણ - આ વ્યવસ્થા સ્વીકારી. રોજની કેટલીક ક્ષણોને નો-મેન્સ મોમેન્ટ્સ બનાવી શકીએ? કોઈનેય આધીન ન હોય એવી ક્ષણો, કોઈની જીદ વિનાની હોય, ન એની હોય - ન મારી હોય એવી ક્ષણો. નિર્ભય બનીને ટહેલતી આ સાહજિક ક્ષણોના બફર ઝોનનું કામ બે વિચારો વચ્ચેની સાઠમારી ટાળવાનું.
- મસ્તી અને સુસ્તી વચ્ચે સતત ઝોલાં ખાતું મન, પરિસ્થિતિ એક સરખી હોય તોય, ચોવીસે કલાક ને ત્રણસો પાંસઠ દિવસ એકસરખી પ્રતિક્રિયા આપી શકતું નથી.
- કઈ વ્યક્તિ સાથે કેવું બને એનો આધાર માત્ર નસીબ નથી.
- કોઈકના મૃત્યુ પછી એ વ્યક્તિનાં સારાં પાસાં વિશે વિચારતી વખતે લાગે કે આ જ બધી વાતો એ વ્યક્તિ જીવતી હતી ત્યારે એમને કહી દીધી હોત તો તમને કેટલો સંતોષ મળ્યો હોત.
- આસપાસની દુનિયામાં બધા જ ખરાબ છે, મારા કરતાં ઉતરતા છે, મારા વિચારો સામે બંધબેસે એવું આ દુનિયામાં કોઈ નથી એમ વિચાર્યા કરવાથી માણસનું વ્યક્તિત્વ એક તબક્કે ખાબોચિયા જેવું બની જવાનું.
- મૈત્રીની જેમ દુશ્મનીનો સ્વાદ પણ ચાખવો જોઈએ.
- વર્ષોથી જેની આશંકા (કે પછી આશા) હોય એ ઘટના છેવટે બની રહી હોય તે વખતે બધું જ એકાએક થઈ રહ્યું હોય એવું લાગે છે. પણ કશુંય એકાએક થતું હોતું નથી. કાળનું સર્જન ધીમી પણ નિશ્ચિત ગતિએ સતત થતું રહે છે. આપણું ધ્યાન એ તરફ હોય કે ન હોય, એકાએક બનતી લાગતી ઘટનાઓનું પિંડ વર્ષોથી ઘડાતું આવતું હોય છે.
લાઈફ લાઈન
સારું વાક્ય લખનારને પહેલી સલામ અને બીજી એ વાક્ય ટાંકનારને.
- રાલ્ફ વાલ્ડો એમર્સન
www.facebook.com/saurabh.a.shah
પ્રિય વાચકો,
હાલ પૂરતું મેગેઝીન સેક્શનમાં નવી એન્ટ્રી કરવાનું બંધ છે, દરેક વાચકોને જૂનાં લેખો વાચવા મળે તેથી આ સેક્શન એક્ટિવ રાખવામાં આવ્યું છે.
આભાર
