180 કરોડમાં વેચાયા 3 એપાર્ટમેન્ટ, લગભગ 11 કરોડ સરકારને મળ્યા, કોણ છે લેનાર

ગોદરેજ ઈન્ડસ્ટ્રીઝના ચેરમેન નાદિર ગોદરેજ અને તેમના પરિવારે દક્ષિણ મુંબઈમાં રહેણાંક પ્રોજેક્ટમાં ત્રણ લક્ઝરી એપાર્ટમેન્ટ ખરીદ્યા છે. આ ડીલ 180 કરોડ રૂપિયામાં થઈ છે. ગોદરેજ પરિવારે રૂપારેલ હાઉસમાં આ ખરીદી કરી છે, જે મલબાર હિલમાં JSW ગ્રૂપની રિયલ એસ્ટેટ સબસિડિયરી દ્વારા બનાવવામાં આવી રહ્યો છે. આ લક્ઝરી એપાર્ટમેન્ટ્સમાંથી અરબી સમુદ્રના અદભૂત દૃશ્યો દેખાઈ છે. JSW રિયલ્ટી આ સુપર લક્ઝરી રેસિડેન્શિયલ પ્રોજેક્ટ રિજ રોડ, મલબાર હિલ પર નિર્માણાધીન વિકસાવી રહી છે. ગોદરેજ પરિવારે આ ટાવરના છઠ્ઠા, સાતમા અને આઠમા માળે એપાર્ટમેન્ટ ખરીદ્યા છે. આ કુલ 13,836 ચોરસ ફૂટમાં ફેલાયેલા છે. તેમાં 1,029-સ્ક્વેર-ફૂટની વિશિષ્ટ ડેક અને ઢંકાયેલી બાલ્કનીનો સમાવેશ થાય છે.

મીડિયા સૂત્રો દ્વારા મેળવેલા દસ્તાવેજો અનુસાર, ડીલ 12 જૂનના રોજ નોંધવામાં આવી હતી. નાદિર ગોદરેજ અને તેમના બે પુત્રોએ નોંધણી માટે સ્ટેમ્પ ડ્યુટી તરીકે રૂ. 10.79 કરોડ ચૂકવ્યા હતા. ડીલ મુજબ, ગોદરેજ પરિવારને એક્સક્લુઝિવ ટાવરમાં 12 કાર પાર્કિંગ સ્લોટ મળશે. તેમાં 14 રેસિડેન્શિયલ લેવલ છે અને દરેક ફ્લોર પર માત્ર એક એપાર્ટમેન્ટ છે. નાદિર ગોદરેજે દરેક એપાર્ટમેન્ટ માટે રૂ. 3.5 કરોડની સ્ટેમ્પ ડ્યુટી ચૂકવી છે. આ સંબંધમાં ગોદરેજને મોકલવામાં આવેલા પ્રશ્નોનો કોઈ જવાબ મળ્યો નથી. મલબાર હિલ દેશના કેટલાક સૌથી ધનિક ઉદ્યોગપતિઓનું ઘર છે. આ પ્રોજેક્ટ ડિસેમ્બર 2027 સુધીમાં પૂર્ણ થવાની ધારણા છે. સ્ટેમ્પ ડ્યુટી અને GST સહિતની ડીલ વેલ્યુ 1.44 લાખ પ્રતિ ચોરસ ફૂટ છે. આમ, તે દેશના સૌથી મોંઘા સોદાઓમાંની એક છે.

જાણીતા રોકાણકાર સ્વર્ગસ્થ રાકેશ ઝુનઝુનવાલાની પત્ની રેખા ઝુનઝુનવાલાએ માર્ચમાં એક બિલ્ડિંગમાં લગભગ તમામ યુનિટ ખરીદ્યા હતા જેથી મલબારમાં તેમના ઘરમાંથી અરબી સમુદ્રનો નજારો જોવામાં અવરોધ ન આવે. કેપિટલ માર્કેટ ટ્રેડિંગ અને ઇન્વેસ્ટમેન્ટ ફર્મ પરમ કેપિટલના ડિરેક્ટર આશા મુકુલ અગ્રવાલે ગયા વર્ષે મુંબઈના લોઢા મલબારમાં રૂ. 263 કરોડમાં ત્રણ એપાર્ટમેન્ટ ખરીદ્યા હતા. આ એપાર્ટમેન્ટ્સ લોઢા મલબાર, બાલ્કેશ્વર રોડ અને મલબાર હિલમાં સ્થિત છે.

મધ્યમ આવક, પ્રીમિયમ અને લક્ઝરી સેગમેન્ટમાં મજબૂત માંગને કારણે ટોચના આઠ શહેરોમાં હાઉસિંગનું વેચાણ 2023માં સર્વકાલીન ઉચ્ચ સ્તરે પહોંચ્યું હતું. મુંબઈ દેશના સૌથી મોટા અને સૌથી મોંઘા પ્રોપર્ટી માર્કેટ તરીકે ટોચ પર રહ્યું. આ વર્ષના પ્રથમ પાંચ મહિનામાં દરેકમાં નોંધણી 10,000થી ઉપર રહી હતી. ઑગસ્ટ 2023થી શરૂ થતા સળંગ દસ મહિનાઓ સુધી નોંધણીઓમાં વર્ષ-દર-વર્ષ વૃદ્ધિ જોવા મળી છે. દેશના સૌથી મોંઘા વિસ્તારો પૈકીના દક્ષિણ અને મધ્ય મુંબઈમાં પ્રોપર્ટીના વેચાણમાં સતત સુધારો જોવા મળી રહ્યો છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.