38 કરોડની ઘડિયાળ, વર્ષમાં 5300 બને છે, અનંતના કાંડા પર શોભતી રિચર્ડ મિલની વાત

રિચાર્ડ મિલે બ્રાન્ડની ઘડિયાળો વિશ્વભરમાં વૈભવી શોખના પ્રતીક તરીકે ઉભરી આવી છે. આ કંપની એક વર્ષમાં માત્ર 5,300 ઘડિયાળો જ બનાવે છે, જેની સરેરાશ કિંમત 250,000 ડૉલર છે. રાફેલ નડાલ સહિત વિશ્વભરના ઘણા ખેલાડીઓ આ બ્રાન્ડની ઘડિયાળો પહેરે છે. આ ઘડિયાળ ફેરેલ વિલિયમ્સ અને Ice-T જેવા પ્રખ્યાત સંગીતકારોના કાંડા પર પણ જોઈ શકાય છે. આ ઘડિયાળો તેમની અલગ ડિઝાઈનને કારણે ઘડિયાળોની દુનિયામાં એક વિશેષ સ્થાન ધરાવે છે. તે ટાઇટેનિયમ અને કાર્બન ફાઇબર જેવી સામગ્રીમાંથી બનાવવામાં આવે છે. તેના Rm52-05 મેન્યુઅલ વિન્ડિંગ ટૂરબિલન ફેરેલ વિલિયમ્સ 49.94 Mm મોડલની કિંમત આશરે રૂ. 37.71 કરોડ છે.

રિચાર્ડ મિલે બ્રાન્ડ 2001માં બજારમાં પ્રવેશી હતી અને તેની આવક 2022માં 1.5 બિલિયન ડૉલર સુધી પહોંચી ગઈ. છેલ્લા બે દાયકામાં આ બ્રાન્ડે જે પ્રકારની સફળતા મેળવી છે, તે સ્વિસ ઘડિયાળ ઉદ્યોગમાં અજોડ છે. બ્રાન્ડના સહ-સ્થાપક રિચાર્ડ મિલે 1970ના દાયકામાં ફ્રેન્ચ ઘડિયાળ નિર્માતા ફિનહોર સાથે તેમની કારકિર્દીની શરૂઆત કરી હતી. તેણે ડોમિનિક ગુએનાટ સાથે મળીને પોતાની નવી કંપની બનાવી. 2001માં તેણે તેની પ્રથમ ઘડિયાળ, RM 001 Troubillon લોન્ચ કરી. તેની કિંમત 135,000 ડૉલર હતી. તેણે ઘડિયાળ ઉદ્યોગમાં હલચલ મચાવી દીધી.

પાટેક ફિલિપને ઘડિયાળ ઉદ્યોગની રોલ્સ રોયસ ગણવામાં આવે છે. તેનું કારણ એ છે કે તેની ઘડિયાળોની કિંમત ઘણી વધારે છે. પરંતુ રિચાર્ડ મિલ્સની ઘડિયાળો તેનાથી વધુ મોંઘી છે. આ અંગે મિલે કહ્યું હતું કે, 'અમે પાટેક ફિલિપ કે અન્ય કોઈ કંપની સાથે સ્પર્ધા કરતા નથી.' આજે આ કંપનીની ઘડિયાળો સ્ટેટસ સિમ્બોલ બની ગઈ છે. તે અબજોપતિઓની બ્રાન્ડ માનવામાં આવે છે. તેમાં ટાઇટેનિયમ અને કાર્બન ફાઇબર જેવી સામગ્રીનો ઉપયોગ કરવામાં આવે છે, જે ખૂબ ખર્ચાળ માનવામાં આવે છે.

શરૂઆતમાં, રિચાર્ડ મિલે પાર્ટીઓમાં જતો અને ઘડિયાળને જમીન પર ફેંકી દઈને એવું બતાવતો કે, તે કેટલી મજબૂત છે. તેમનો ધ્યેય એક સ્ટાઇલિશ ઘડિયાળ બનાવવાનો હતો, જે ટકાઉ અને મજબૂત હોય. બ્રાન્ડની ઘડિયાળોનું પરીક્ષણ મશીન દ્વારા તેમજ હાથ દ્વારા કરવામાં આવે છે. આ ઉપરાંત, તેઓ અલ્ટ્રાવાયોલેટ અને ભેજ પરીક્ષણમાંથી પણ પસાર થાય છે. એકવાર ચાવી ભરાઈ ગયા પછી, તે 72 કલાક ચાલે છે, જ્યારે અન્ય કંપનીઓની ઘડિયાળોમાં 48 કલાકનો પાવર હતો. આ ઉપરાંત, આ ઘડિયાળોની ડિઝાઇન પણ અન્ય ઘડિયાળોથી સંપૂર્ણપણે અલગ છે.

કંપનીએ ઘણા જાણીતા ખેલાડીઓ સાથે ભાગીદારી કરી છે. તેની શરૂઆત 2010માં સ્પેનના દિગ્ગજ ટેનિસ ખેલાડી રાફેલ નડાલ સાથે થઈ હતી. આ ઉપરાંત, આ ઘડિયાળ ફોર્મ્યુલા વન ફેરારી ડ્રાઇવર ચાર્લ્સ લેક્લેર્ક, ગોલ્ફર ક્રિસ્ટી કેર અને ડાયના લુના, સ્કીઅર એલેક્સિસ પિન્ટુરાલ્ટ ઔક અને જોહાનસ થિંગનેસ બો, શો જમ્પર્સ કાર્લોસ હેન્ક ગ્યુરેરો અને ફ્લોર ગિરાઉડના કાંડાને પણ શણગારે છે. અમેરિકન રેપર J-Z, મલેશિયન અભિનેત્રી મિશેલ યોહ, અમેરિકન રેકોર્ડ નિર્માતા ફેરેલ વિલિયમ્સ, અમેરિકન કોમેડિયન વિન હાર્ટ, બ્રિટિશ ગાયક અને ગીતકાર એડ શીરાન પણ આ ઘડિયાળના શોખીન છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.