અદાણીના તમામ શેર આજે લાલ નિશાન પર! રોકાણકારોને થયું આટલું નુકસાન, જાણો કારણ

રજા પછી આજે શેરબજારમાં નબળાઈ જોવા મળી રહી છે. બજાર ઘટાડા સાથે ખુલ્યું છે. ગઈકાલે એટલે કે ગુરુવારે ઈદના કારણે બજારમાં રજા હતી. આ પછી આજે સવારથી જ બજારમાં ઘટાડો જોવા મળી રહ્યો છે. બપોરે 1 વાગ્યાની આસપાસ BSE સેન્સેક્સ 614 પોઈન્ટના ઘટાડા સાથે 74,435ના સ્તરે ટ્રેડ થતો જોવા મળ્યો હતો. બીજી તરફ, નિફ્ટી 172 પોઈન્ટ અથવા 0.80 ટકા નબળો પડીને 22,573ના સ્તરે ટ્રેડ થઈ રહ્યો હતો. US ફુગાવાના આંકડા જાહેર થયા પછી શુક્રવારે ભારતીય બેન્ચમાર્ક સૂચકાંકો ઘટાડા સાથે ખુલ્યા હતા. રોકાણકારોનું ધ્યાન હવે સ્થાનિક બજારમાં કંપનીઓના આગામી ત્રિમાસિક પરિણામો પર છે. દરમિયાન ગૌતમ અદાણીની મોટાભાગની કંપનીઓના શેરમાં પણ ઘટાડો જોવા મળી રહ્યો છે. અદાણીની 9 કંપનીઓના શેર ઘટીને લાલ નિશાનમાં ટ્રેડ થઈ રહ્યા છે. આમાં સૌથી મોટો ઘટાડો ACCમાં જોવા મળી રહ્યો છે. અદાણીના શેરમાં ઘટાડો થવાને કારણે રોકાણકારોને ભારે નુકસાન થઈ રહ્યું છે.

આજે અદાણી ગ્રુપની કંપનીઓના શેરમાં ઘટાડો જોવા મળી રહ્યો છે. જેમાં બપોરે 1 વાગ્યાની આસપાસ અદાણી ટોટલ ગેસમાં 0.50 ટકા,  ACC સિમેન્ટમાં 1.27 ટકા, ગ્રૂપની હોલ્ડિંગ કંપની અદાણી એન્ટરપ્રાઈઝમાં 0.97 ટકા, અંબુજા સિમેન્ટમાં 1.64 ટકા, અદાણી પોર્ટ્સ અને સ્પેશિયલ ઈકોનોમિક ઝોનમાં 0.51 ટકા, અદાણી પાવરમાં 1.33 ટકા, અદાણી વિલ્મર 0.98 ટકા અને અદાણી ગ્રીન એનર્જી 0.36 ટકા ઘટાડો જોવા મળી રહ્યો છે, માત્ર અદાણી એનર્જી સોલ્યુશન્સમાં જ વૃદ્ધિ જોવા મળી રહી છે. આ શેર 1.20 ટકાના ઉછાળા સાથે લીલા રંગમાં ટ્રેડ થઈ રહ્યો છે.

આજે એટલે કે 12 એપ્રિલે બેન્ચમાર્ક સૂચકાંકો નિફ્ટી, સેન્સેક્સ અને બેન્ક નિફ્ટી નબળાઈ સાથે ટ્રેડ થઈ રહ્યા છે. ક્ષેત્રીય સૂચકાંકોમાં, નિફ્ટી IT ઈન્ડેક્સ, નિફ્ટી ફાર્મા ઈન્ડેક્સ, નિફ્ટી ઓટો અને નિફ્ટી મિડકેપ ઈન્ડેક્સમાં ઘટાડો જોવા મળ્યો હતો. આ સેક્ટરના સૂચકાંકો લાલ નિશાનમાં ટ્રેડ થતા જોવા મળી રહ્યા છે.

નોંધ : અહીં આપેલી જાણકારી માત્ર માહિતી માટે છે. શેરબજારમાં રોકાણ બજારના જોખમોને આધીન હોવાથી, રોકાણ કરતા પહેલા કૃપા કરીને તમારા રોકાણ સલાહકારની સલાહ અવશ્ય લો.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.