મોંઘવારી અંગે RBI ગવર્નર શક્તિકાંત દાસની વધુ એક ચેતવણી...બેંકોને આપ્યો ખાસ સંદેશ

રિઝર્વ બેંક ઓફ ઈન્ડિયાના ગવર્નર શક્તિકાંત દાસે ફરી એકવાર મોંઘવારી અંગે ચેતવણી આપી છે. તેમણે કહ્યું કે મોંઘવારી હજુ પણ RBIના લક્ષ્યાંકથી ઉપર છે. આવી સ્થિતિમાં, અમે મોંઘવારી પ્રત્યે સાવચેત છીએ અને ભવિષ્યમાં પણ તેના પર ધ્યાન કેન્દ્રિત કરીશું. તેમણે કહ્યું કે, રિટેલ ફુગાવાને લઈને ઘણા પગલાં લેવામાં આવ્યા છે. વૃદ્ધિને બદલે મોંઘવારી ઘટાડવા પર વધુ ધ્યાન આપવામાં આવ્યું છે. મોનેટરી પોલિસીમાં ફુગાવા અંગે ઘણી ચર્ચા થઈ છે. જો કે, ખાદ્ય ફુગાવો હજુ પણ ચિંતાનો વિષય છે, જે ભારતની સાથે અન્ય દેશોમાં પણ સમસ્યા બનેલો છે.

RBIના ગવર્નર શક્તિકાંત દાસે બુધવારે જણાવ્યું હતું કે, ભાવમાં તાજેતરની નરમાઈ હોવા છતાં, ભારત હવામાનની ઘટનાઓ અને વૈશ્વિક પરિબળોથી ખાદ્યપદાર્થોના ભાવના આંચકા માટે સંવેદનશીલ છે. બેન્કર્સની એક કોન્ફરન્સમાં બોલતા દાસે કહ્યું હતું કે, ભલે મોંઘવારી ઘટી હોય, MPCએ ફુગાવા અંગે સાવધાન રહેવું જોઈએ. એક મહિનામાં ફુગાવાના જોખમને લઈને RBI ગવર્નરની આ બીજી ચેતવણી છે. અગાઉ 8 નવેમ્બરે શક્તિકાંત દાસે જાપાનમાં ચિંતા વ્યક્ત કરી હતી.

મંગળવારે નાણા મંત્રાલયના અહેવાલમાં કહેવામાં આવ્યું છે કે, તે વિકાસને લઈને આશાવાદી છે, પરંતુ ફુગાવા અંગે સાવચેત છે. સરકારને આશા છે કે, આવનારા સમયમાં કિંમતોમાં મોટો ઘટાડો થઈ શકે છે અને એશિયાના ત્રીજા સૌથી મોટા અર્થતંત્રમાં માંગ વધી શકે છે. દાસે વધુમાં જણાવ્યું હતું કે, ફુગાવાના લક્ષ્યાંકની સાથે, બેલેન્સ શીટને મજબૂત કરવા અને બેંકિંગ સિસ્ટમ સાથે સંબંધિત જોખમો પર સંપૂર્ણ ધ્યાન કેન્દ્રિત કરવામાં આવ્યું છે.

બેંકો સંબંધિત જોખમો વિશે વાત કરતા RBI ગવર્નરે કહ્યું કે બેંકો અને NBFCએ તણાવ પરીક્ષણ ચાલુ રાખવું જોઈએ. એસેટ લાયેબિલિટી મેનેજમેન્ટને મજબૂત રાખવું પડશે. કેટલાક ધિરાણકર્તાઓએ લોનની મુદત પણ લંબાવી છે. આવી સ્થિતિમાં, જવાબદારી જાળવવા માટે, બેંકોએ વધુ પડતી લોન વહેંચવી જોઈએ નહીં.

અત્રે ઉલ્લેખનીય છે કે, જો આપણે સપ્ટેમ્બરના ફુગાવાના ડેટા પર નજર કરીએ તો શાકભાજીના ભાવમાં નરમાઈના કારણે ભારતનો છૂટક ફુગાવો 5.02 ટકાના ત્રણ મહિનાના નીચા સ્તરે આવી ગયો છે. જો કે, તે હજુ પણ 4 ટકાના લક્ષ્યાંક કરતાં વધુ છે. ઓક્ટોબરમાં ગ્રાહક ફુગાવો 4.87 ટકાના લક્ષ્યની નજીક પહોંચી ગયો છે, જે ચાર મહિનામાં સૌથી નીચો સ્તર છે. જોકે, ઓક્ટોબરમાં ખાદ્ય અને પીણાંનો ફુગાવો અગાઉના મહિનાની સરખામણીએ 6.24 ટકા પર યથાવત રહ્યો હતો. સેન્ટ્રલ બેંકે છેલ્લી ચાર મીટિંગ દરમિયાન પોલિસી રેટ યથાવત રાખ્યા છે. એવી અપેક્ષા છે કે, 2023-24માં સરેરાશ ફુગાવો 5.4 ટકા રહેશે, જે ગયા નાણાકીય વર્ષના ફુગાવાના દર કરતા ઓછો છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.