કોરોના સમયગાળા દરમિયાન શરૂ કરાયેલી આ સુવિધા પર પૂર્ણવિરામ, પૈસા ઉપાડી શકશે નહીં

એમ્પ્લોઈઝ પ્રોવિડન્ટ ફંડ ઓર્ગેનાઈઝેશન (EPFO)ના કરોડો ગ્રાહકો માટે મહત્વના સમાચાર આવ્યા છે. EPFOએ હવે કોવિડ એડવાન્સ ફેસિલિટી બંધ કરી દીધી છે, જે કોરોના સમયગાળા દરમિયાન શરૂ કરવામાં આવી હતી. કોરોના મહામારી દરમિયાન ખાતાધારકોને તેમના PF ખાતામાંથી એડવાન્સ સ્વરૂપે પૈસા ઉપાડવાની સુવિધા આપવામાં આવી હતી. હવે કોવિડ -19 રોગચાળાને જાહેર આરોગ્ય કટોકટી નહીં હોવાને કારણે આ સુવિધા બંધ કરવામાં આવી છે.

12 જૂન, 2024ના રોજ બહાર પડાયેલા નોટિફિકેશનમાં EPFOએ જણાવ્યું હતું કે, 'COVID-19 હવે રોગચાળો નથી રહ્યો, તેથી સક્ષમ અધિકારીએ તાત્કાલિક અસરથી આ એડવાન્સ સેવા બંધ કરવાનો નિર્ણય લીધો છે. આ નિર્ણય મુક્તિ પ્રાપ્ત ટ્રસ્ટોને પણ લાગુ પડશે અને તે મુજબ તમારા સંબંધિત અધિકારક્ષેત્રમાં આવતા તમામ ટ્રસ્ટોને આ અંગે જાણ કરવામાં આવશે.'

હકીકતમાં, વર્લ્ડ હેલ્થ ઓર્ગેનાઈઝેશન (WHO)એ થોડા દિવસો પહેલા એક નિવેદન બહાર પાડીને કહ્યું હતું કે, કોરોનાની ઈમરજન્સીની સ્થિતિ હવે સમાપ્ત થઈ ગઈ છે. તેથી, આ અંગે વિશ્વભરમાં લાગુ કરાયેલા પ્રોટોકોલને પણ નાબૂદ કરી શકાય છે. WHOના આ નિવેદન પછી EPFOએ પણ કોરોના સમયગાળા દરમિયાન શરૂ થયેલી તેની એક વિશેષ યોજનાને બંધ કરવાનો નિર્ણય લીધો છે.

કર્મચારી ભવિષ્ય નિધિ (EPF) ખાતાધારકો કોવિડ-19ને કારણે ઊભી થતી નાણાકીય જરૂરિયાતોને પહોંચી વળવા માટે બે વાર નાણાં ઉપાડી શકતા હતા. EPFOએ EPF સભ્યોને કોવિડ-19 રોગચાળાના પ્રથમ લહેર દરમિયાન બિન-રિફંડપાત્ર એડવાન્સ રકમ ઉપાડવાની સુવિધા પૂરી પાડી હતી. ત્યાર પછી, કોરોનાના બીજા લહેરના આગમન સાથે, 31 મે, 2021થી વધુ એક એડવાન્સ ઉપાડની મંજૂરી આપવામાં આવી હતી.

EPFOના બે કરોડથી વધુ ગ્રાહકોએ કોરોના એડવાન્સ ઉપાડની સુવિધાનો લાભ લીધો હતો. વર્ષ 2023 સુધીમાં કોરોના એડવાન્સ તરીકે 48,075.75 કરોડ રૂપિયા નીકાળવામાં આવ્યા હતા. EPFOના ડ્રાફ્ટ વાર્ષિક રિપોર્ટ 2022-23 અનુસાર, EPFOએ 2020-21માં 69.2 લાખ ગ્રાહકોને 17,106.17 કરોડ રૂપિયાનું વિતરણ કર્યું હતું. વર્ષ 2021-22માં, 91.6 લાખ સબ્સ્ક્રાઇબર્સે આ સુવિધાનો લાભ લીધો હતો અને એડવાન્સ તરીકે 19,126.29 લાખ કરોડ રૂપિયા ખાતામાંથી નીકાળવામાં આવ્યા હતા. તેવી જ રીતે, 2022-23માં, 62 લાખ ગ્રાહકોએ તેમના PF ખાતામાંથી રૂ. 11,843.23 કરોડ ઉપાડી લીધા હતા.

પાકતી મુદત પહેલા પણ PFમાંથી પૈસા ઉપાડી શકાય છે. તમે ઘર માટે જમીન ખરીદવા, ઘરનું સમારકામ કરવા, હોમ લોન ભરવા, પરિવારના કોઈ સભ્યના લગ્ન અથવા તમારા લગ્ન, બાળકોનું શિક્ષણ, નોકરી ગુમાવવા પર, અને તમારી અથવા પરિવારના કોઈ સભ્યની સારવાર માટે PF ખાતામાંથી પૈસા ઉપાડી શકો છો.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.