ટાટા ગ્રૂપ માટે ગુજરાત સૌથી મહત્વપૂર્ણ સ્થળોમાંનું એક છેઃ ટાટા સન્સ ચેરમેન

મહાત્મા મંદિર, ગાંધીનગર ખાતે વાઇબ્રન્ટ ગુજરાત ગ્લોબલ સમિટ 2024ના 10મા સંસ્કરણનું ઉદઘાટન કરવામાં આવ્યું હતું. આ પ્રસંગે ટાટા સન્સ લિમિટેડના ચેરમેન એન ચંદ્રશેખરને કહ્યું હતું કે, 'આટલા લાંબા સમય સુધી ગુજરાતની સ્થિર અને અદભૂત પ્રગતિ દૂરંદેશી નેતૃત્વ અને આપણા PM નરેન્દ્ર મોદીની માનસિકતાને સ્પષ્ટપણે દર્શાવે છે.' તેમણે ભારપૂર્વક જણાવ્યું હતું કે, આર્થિક વિકાસનાં પરિણામે જબરદસ્ત સામાજિક વિકાસ પણ થયો છે અને ગુજરાતે સ્પષ્ટપણે પોતાને ભવિષ્યનાં પ્રવેશદ્વાર તરીકે સ્થાપિત કર્યું છે. સ્થાપક જમશેદજી ટાટાનો જન્મ નવસારીમાં થયો હોવાથી તેમણે ગુજરાતમાં ટાટા જૂથની ઉત્પત્તિ પર પ્રકાશ પાડ્યો હતો. આજે રાજ્યમાં ટાટા ગ્રુપની 21 કંપનીઓની મજબૂત હાજરી છે.

તેમણે ગુજરાતમાં ઇવી વાહનો, બેટરી ઉત્પાદન, સી295 ડિફેન્સ એરક્રાફ્ટ અને સેમીકન્ડક્ટર ફેબ, એડવાન્સ મેન્યુફેક્ચરિંગ સ્કિલ બિલ્ડિંગના ક્ષેત્રોમાં ગ્રુપની વિસ્તરણ યોજના વિશે પણ વિસ્તૃત માહિતી આપી હતી. તેમણે જણાવ્યું હતું કે, ટાટા ગ્રૂપ માટે ગુજરાત સૌથી મહત્વપૂર્ણ સ્થળોમાંનું એક છે અને અમે તેની વિકાસ યાત્રામાં મુખ્ય ભૂમિકા ભજવીશું.

સમીટમાં જેફરી ચુન, સીઈઓ સિમ્મટેક, દક્ષિણ કોરિયાએ જણાવ્યું હતું કે સેમીકન્ડક્ટર એસેમ્બલી અને ટેસ્ટ સુવિધાઓમાં મુખ્ય સપ્લાય ચેઇન પાર્ટનર તરીકે ગુજરાત રાજ્યમાં તેમના મુખ્ય ગ્રાહક માઇક્રોનના પ્રોજેક્ટને પગલે કો-લોકેશન રોકાણ તરીકે તેમના ભારત પ્રોજેક્ટ માટે ઉત્તેજના વ્યક્ત કરી હતી. તેમણે જણાવ્યું હતું કે, વાઇબ્રન્ટ ગુજરાત ગ્લોબલ સમિટ ભારત જેવા ઝડપથી વિકસતાં દેશમાં નવા પુરવઠા ચેઈન નેટવર્કનું નિર્માણ કરવાની વૈશ્વિક ચળવળ પ્રદર્શિત કરે છે. તેમણે માહિતી આપી હતી કે તેઓ ભારતમાં કોલોકેશન રોકાણનો બીજો રાઉન્ડ તૈયાર કરી રહ્યા છે અને રાજ્ય અને કેન્દ્ર સરકારના જાણીતા સમર્થનની તૈયારી કરી રહ્યા છે. આ સેમીકન્ડક્ટર સપ્લાય ચેઇન નેટવર્કમાં ભારતની હાજરીને વધારે મજબૂત બનાવશે અને ભારતના સ્થાનિક ખેલાડીને વૈશ્વિક સપ્લાય ચેઇન ઇકોસિસ્ટમનો ભાગ બનવા માટે સક્ષમ બનાવશે.

ડી.પી. વર્લ્ડના ચેરમેન, સુલતાન અહમદ બિન સુલેયમે જણાવ્યું હતું કે, વાઇબ્રન્ટ ગુજરાત માટે PMનું વિઝન સાકાર થતાં આનંદ થાય છે, તેમણે સમિટનું આયોજન કરવા બદલ ગુજરાત સરકારને અભિનંદન આપ્યાં હતાં. તેમણે જણાવ્યું હતું કે, વાઇબ્રન્ટ ગુજરાત સમિટ ભારતનાં અગ્રણી બિઝનેસ ફોરમ સ્વરૂપે તેની ઝડપથી થઈ રહેલી વૃદ્ધિને પ્રદર્શિત કરે છે, જે PMનાં 'વિકસિત ભારત @ 2047'નાં વિઝનનાં માર્ગ દર્શાવે છે. તેમણે ગિફ્ટ સિટી, ધોલેરા સ્પેશિયલ ઇન્વેસ્ટમેન્ટ રિજિયન અને ગુજરાત મેરિટાઇમ ક્લસ્ટર જેવા વિવિધ ઔદ્યોગિક ક્લસ્ટર વિકસાવવા અને તેને પ્રોત્સાહન આપવા માટે સરકારને શ્રેય આપ્યો હતો અને જણાવ્યું હતું કે તે ભવિષ્યના પ્રવેશદ્વાર તરીકે કામ કરશે. ભારત અને UAE વચ્ચેના દ્વિપક્ષીય આર્થિક સંબંધો પર પ્રકાશ પાડતા તેમણે વર્ષ 2017થી અત્યાર સુધીમાં 2.4 અબજ ડોલરથી વધુનું રોકાણ કરનાર આ દેશ ગુજરાતના સૌથી મોટા વિદેશી રોકાણકારોમાંનો એક હોવાની માહિતી આપી હતી. તેમણે ઉલ્લેખ પણ કર્યો હતો કે, ગુજરાતે ગયા વર્ષે 7 અબજ અમેરિકન ડોલરથી વધારે કિંમતની ચીજવસ્તુઓની નિકાસ કરી હતી. ભારત દુનિયામાં સૌથી વધુ ઝડપથી વિકસતું મોટું અર્થતંત્ર છે તેની નોંધ લઈને સુલેયેમે ભારપૂર્વક જણાવ્યું હતું કે, PMના મજબૂત નેતૃત્વ હેઠળ આ વૃદ્ધિ ચાલુ રહેશે. તેમણે ગતિશક્તિ જેવી રોકાણની પહેલને પણ શ્રેય આપ્યો જે ભારત અને ગુજરાતને આર્થિક પાવરહાઉસ તરીકેની તેમની સંભવિતતાને સમજવામાં મદદ કરશે. તેમણે ગુજરાતના કંડલા ખાતે 20 લાખ કન્ટેનરની ક્ષમતા ધરાવતા અત્યાધુનિક કન્ટેનર ટર્મિનલ્સના રોકાણ અને વિકાસ માટે ડીપી વર્લ્ડની યોજના વિશે માહિતી આપી હતી. તેમણે ભારત સરકાર સાથે દેશના લોજિસ્ટિક્સ ઇન્ફ્રાસ્ટ્રક્ચરના વિસ્તરણમાં ભાગીદારી કરવા બદલ ગર્વની લાગણી વ્યક્ત કરી હતી અને વાઇબ્રન્ટ ગુજરાત સમિટનો ભાગ બનવાની તક આપવા બદલ ગુજરાત સરકારનો આભાર માન્યો હતો.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.