હવે LIC પણ હેલ્થ ઈન્શ્યોરન્સ પોલિસી વેચશે

દેશની સૌથી મોટી જીવન વીમા કંપની LIC સ્વાસ્થ્ય વીમા ક્ષેત્રમાં પ્રવેશવાની યોજના બનાવી રહી છે. દેશમાં ઝડપથી વિકસતા સ્વાસ્થ્ય વીમા ક્ષેત્રમાં પ્રવેશવા માટે, કંપની મણિપાલ સિગ્ના હેલ્થ ઈન્સ્યોરન્સનો અડધો ભાગ ખરીદવાનો પ્રયાસ કરી રહી છે. આ ડીલની કિંમત 4,000 કરોડ રૂપિયા હોઈ શકે છે. જો સિગ્ના હેલ્થ ઈન્સ્યોરન્સ અને LIC વચ્ચે કોઈ ડીલ થશે તો, જીવન વીમા કંપની સ્વાસ્થ્ય વીમા ક્ષેત્રમાં પ્રવેશ કરી શકશે. અહીં તમને જણાવી દઈએ કે, મણિપાલ સિગ્ના મણિપાલ ગ્રુપ અને સિગ્ના કોર્પોરેશનનું સંયુક્ત સાહસ છે.

એક અખબારમાં છપાયેલા સમાચાર અનુસાર, જો આ કરાર પર હસ્તાક્ષર થશે તો બંને પોતાનો હિસ્સો ઘટાડી દેશે. LICના MDએ પણ તાજેતરમાં આ જોડાણ અંગે સંકેત આપ્યા હતા. આ બાબત સાથે જોડાયેલા લોકોએ જણાવ્યું કે, દેશની સૌથી મોટી વીમા કંપની ઓછા ખર્ચે ઝડપથી વિકસતા સ્વાસ્થ્ય વીમા ક્ષેત્રમાં પ્રવેશ કરવા માંગે છે. આ માટે મણિપાલસિગ્ના હેલ્થ ઈન્સ્યોરન્સમાં અડધો હિસ્સો ખરીદવા માટે વાતચીત ચાલી રહી છે.

મણિપાલસિગ્નામાં મણિપાલ એજ્યુકેશન એન્ડ મેડિકલ ગ્રૂપ અને US સ્થિત સિગ્ના કોર્પોરેશન હિસ્સો ધરાવે છે. બેંગલુરુ સ્થિત મણિપાલ એજ્યુકેશન ગ્રૂપ આરોગ્ય વીમા કંપનીમાં 51 ટકા હિસ્સો ધરાવે છે, જ્યારે સિગ્ના કોર્પોરેશનનો બાકીનો 49 ટકા હિસ્સો છે. જો આ ડીલ ફાઇનલ થાય છે, તો તે સરકારી વીમા કંપની LICને તેના જીવન વીમા પોર્ટફોલિયોથી અલગ બિઝનેસ કરવાની તક આપશે. અહીં તમને જણાવી દઈએ કે દેશના વીમા ક્ષેત્રમાં સ્વાસ્થ્ય વીમાનો 37 ટકા હિસ્સો છે.

આ બાબત સાથે સંકળાયેલા એક વ્યક્તિએ જણાવ્યું કે, બંને પક્ષોએ નોન-ડિસ્કલોઝર એગ્રીમેન્ટ પર હસ્તાક્ષર કર્યા છે. LIC આ સાહસમાં 50 ટકા હિસ્સો મેળવવા માટે વાટાઘાટો કરી રહી છે. પ્રારંભિક વાટાઘાટો મુજબ, મણિપાલ ગ્રૂપ અને સિગ્ના કોર્પોરેશન પ્રમાણસર વીમા કંપનીમાં તેમનો હિસ્સો ઘટાડી દેશે. અન્ય એક વ્યક્તિએ કહ્યું કે, આ ડીલથી હેલ્થ ઈન્સ્યોરન્સ કંપનીને લગભગ 4,000 કરોડ રૂપિયા મળી શકે છે.

જો કે, આ અંગે મણિપાલસિગ્ના અને LICના પ્રવક્તા દ્વારા કોઈ માહિતી આપવામાં આવી નથી. અહીં તમને જણાવી દઈએ કે, તાજેતરમાં 8 નવેમ્બરે LICના MD અને CEO સિદ્ધાર્થ મોહંતીએ કહ્યું હતું કે, LIC સ્વાસ્થ્ય વીમા માર્કેટમાં પ્રવેશવાની યોજના બનાવી રહી છે. તેમણે તે સમયે કહ્યું હતું કે, અમે આ માટે તૈયારી કરી રહ્યા છીએ. જો કે તેમણે તે સમયે તેના વિશે વધુ માહિતી આપી ન હતી.

નોન-લિસ્ટેડ કંપની મણિપાલસિગ્નાના મૂલ્યાંકન વિશે કોઈ જાહેર માહિતી ઉપલબ્ધ નથી. પરંતુ લિસ્ટેડ સ્ટેન્ડઅલોન હેલ્થ ઈન્સ્યોરન્સ કંપનીઓનું મૂલ્યાંકન તેમના ગ્રોસ લિખિત પ્રીમિયમ (GWP) કરતાં બેથી ત્રણ ગણું છે. બુધવારના ટ્રેડિંગ સત્રના અંતે, નિવા બુપા હેલ્થ ઈન્સ્યોરન્સ, જે શેરની કિંમતના આધારે આશરે રૂ. 13,740 કરોડનું માર્કેટ કેપ ધરાવે છે, તેણે નાણાકીય વર્ષ 2024 માટે રૂ. 5,600 કરોડનો GWP નોંધાવ્યો હતો. એ જ રીતે, સ્ટાર હેલ્થ એન્ડ એલાઈડ ઈન્સ્યોરન્સ, જેની GWP રૂ. 15,251 કરોડ છે, તેનું માર્કેટ કેપ રૂ. 26,843 કરોડ છે.

આ મેટ્રિકના આધારે, મણિપાલસિગ્નાએ ગયા નાણાકીય વર્ષમાં રૂ. 1,691 કરોડનો GWP નોંધાવ્યો હતો. આ હિસાબે કંપનીનું વેલ્યુએશન 3,500-4,000 કરોડ રૂપિયાની આસપાસ હોઈ શકે છે. જો LIC કંપનીમાં 50 ટકા હિસ્સો હસ્તગત કરવાનું પસંદ કરે છે, તો તેણે આ મૂલ્યાંકન પર આશરે રૂ. 1,750-2,000 કરોડની ચુકવણી કરવી પડશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.