જુલાઈથી અમલમાં આવશે નવા નિયમ, જો ક્રેડિટ કાર્ડ દ્વારા ચુકવણી કરો છો ધ્યાન રાખજો

જો તમે પણ ક્રેડિટ કાર્ડનો ઉપયોગ કરો છો, તો આ સમાચાર તમારા માટે ખાસ છે. હકીકતમાં, ક્રેડિટ કાર્ડ પેમેન્ટ્સ સંબંધિત ફેરફારો સાત દિવસ પછી એટલે કે 1 જુલાઈ, 2024થી લાગુ થવા જઈ રહ્યા છે. આ પછી, કેટલાક પેમેન્ટ પ્લેટફોર્મ દ્વારા બિલ પેમેન્ટમાં સમસ્યા આવી શકે છે. આ પ્લેટફોર્મ્સમાં ક્રેડ, ફોનપે, બિલડેસ્ક જેવી કેટલીક ફિનટેકનો સમાવેશ થાય છે. ચાલો જાણીએ કે, રિઝર્વ બેંક ઓફ ઈન્ડિયા દ્વારા આવા કયા ફેરફારો કરવામાં આવ્યા છે અને તેની વપરાશકર્તાઓ પર શું અસર થશે?

જૂન મહિનો પૂરો થવાનો છે અને એક અઠવાડિયા પછી જુલાઈ મહિનો શરૂ થશે. આ દરમિયાન, દર મહિનાની જેમ, દેશમાં આવતા મહિને પણ કેટલાક મોટા ફેરફારો થવા જઈ રહ્યા છે અને તેમાંનો એક મોટો ફેરફાર ક્રેડિટ કાર્ડ દ્વારા કરવામાં આવતી બિલની ચુકવણી સાથે સંબંધિત છે. રિપોર્ટ અનુસાર, RBIના નવા નિયમ અનુસાર, 1 જુલાઈથી, તમામ ક્રેડિટ કાર્ડ બિલની ચુકવણી ભારત બિલ પેમેન્ટ સિસ્ટમ એટલે કે BBPS દ્વારા થવી જોઈએ. તે પછી દરેક વ્યક્તિએ ભારત બિલ પેમેન્ટ સિસ્ટમ (BBPS) દ્વારા બિલિંગ કરવાનું રહેશે.

સેન્ટ્રલ બેંક દ્વારા નિર્ધારિત કરેલી સમયમર્યાદા પછી પણ, ઘણી મોટી બેંકો છે, જેણે નવા ફેરફાર હેઠળ તેમના નિયમોમાં ફેરફાર કર્યો નથી અને તેમાં HDFC બેંક-ICICI બેંક અને એક્સિસ બેંક જેવા મોટા નામોનો સમાવેશ થાય છે. મીડિયા સૂત્રોના એક અહેવાલ મુજબ, RBIના નવા નિયમન મુજબ, લગભગ 8 બેંકો આ નિયમ લાગુ કરવા માટે આગળ વધી છે, જેમાં SBI કાર્ડ, બેંક ઓફ બરોડા કાર્ડ, કોટક મહિન્દ્રા બેંક, ફેડરલ બેંક અને ઇન્ડસઇન્ડ બેંકનો સમાવેશ થાય છે.

આ નવું નિયમન રિઝર્વ બેંક ઓફ ઈન્ડિયા દ્વારા ચૂકવણી પ્રક્રિયાને સુવ્યવસ્થિત બનાવવા અને ભારતની ચુકવણી પ્રણાલીને વધુ સુરક્ષિત બનાવવાના ઉદ્દેશ્ય સાથે લાવવામાં આવ્યું છે. નેશનલ પેમેન્ટ્સ કોર્પોરેશન ઓફ ઈન્ડિયા (NPCI)ના સહયોગથી, વિવિધ ચુકવણી સેવાઓ માટે એક જ પ્લેટફોર્મ બનાવવાનું લક્ષ્ય નક્કી કર્યું છે. હવે તેના અમલીકરણની સમયમર્યાદા નજીક આવી રહી છે અને જો બેંકો નિર્ધારિત સમયની અંદર તેનું પાલન નહીં કરે, તો તે તેમના માટે તેમજ ક્રેડિટ કાર્ડ પેમેન્ટ્સ પર નિર્ભર ફિનટેક પ્લેટફોર્મ માટે પણ મુશ્કેલીનું કારણ બની શકે છે.

અહીં એ જાણવું ખૂબ જ જરૂરી છે કે, આ BBPS એટલે કે ભારત બિલ પેમેન્ટ સિસ્ટમ શું છે, તો ચાલો અમે તમને જણાવી દઈએ કે, આ બિલ પેમેન્ટની એક સંકલિત સિસ્ટમ છે, જે ગ્રાહકોને ઓનલાઈન બિલ પેમેન્ટ સર્વિસ પૂરી પાડે છે. તે NPCIની દેખરેખ હેઠળ કામ કરે છે. ભારત બિલ પે એ એક ઇન્ટરફેસ છે જે ફોનપે, ક્રેડ સહિતના અન્ય ફિનટેક પ્લેટફોર્મ પર ઉપલબ્ધ છે અને તેના દ્વારા ક્રેડિટ કાર્ડ બિલની ચૂકવણીના તમામ પ્રકારો અલગ-અલગને બદલે એક જ પ્લેટફોર્મ પર કરી શકાય છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.