સ્માર્ટફોનનું માર્કેટ બદલાઈ જશે, 10,000થી ઓછી કિંમતના 5G ફોન માર્કેટમાં વેચાશે!

4G પછી 5G સ્માર્ટફોન માર્કેટમાં ધમાલ મચાવી રહ્યા છે. એરટેલથી લઈને જિયોએ પણ 5G ટેરિફ પ્લાન રજૂ કર્યા છે. કેટલાક લોકો 5G ફોન ખરીદવામાં અચકાય છે, કારણ કે તે મોંઘા છે. પરંતુ એવી અપેક્ષા છે કે આવનારા સમયમાં 5G સ્માર્ટફોનની કિંમતમાં મોટો ઘટાડો થઈ શકે છે. હા, આ ફોન હવે 10,000 રૂપિયાથી ઓછી કિંમતમાં બજારમાં ઉપલબ્ધ થવાની આશા છે. આ વાત તમને સાંભળવામાં અજીબ લાગશે, પરંતુ ભવિષ્યમાં આ વાત સાચી થવા જઈ રહી છે. હવે દેશમાં 10,000 રૂપિયાથી ઓછી કિંમતના સ્માર્ટફોન મળી શકશે.

ચિપસેટ મેન્યુફેક્ચરિંગ કંપની Qualcomm ભારત જેવા ઊભરતાં બજારોમાં 5Gને પ્રોત્સાહન આપવા માટે એન્ટ્રી-લેવલ 5G ચિપસેટ્સ લાવી રહી છે. 5G સ્ટેન્ડઅલોન આર્કિટેક્ચર પર કામ કરતું ક્વોલકોમનું ચિપસેટ 2024ના અંત સુધીમાં માર્કેટમાં આવવાની ધારણા છે. આ પ્રથમ Xiaomi ઉપકરણોમાં જોવા મળશે. HMD ગ્લોબલ અને મોટોરોલા જેવી અન્ય સ્માર્ટફોન બ્રાન્ડ્સે કહ્યું કે, તેઓ આ ચિપસેટ સાથે ફોન લોન્ચ કરતા પહેલા અન્ય વિકલ્પો પર પણ વિચાર કરશે. Qualcomm દેશમાં સસ્તા 5G ફોન બનાવતી કંપનીઓને ચિપસેટ આપવા માંગે છે.

આ પહેલા ચીનની અન્ય કંપની Unisoc દ્વારા પણ આવો જ દાવો કરવામાં આવ્યો હતો. બંને કંપનીઓ દેશમાં 120 ડૉલર એટલે કે આશરે રૂ. 10,000થી ઓછી કિંમતના 5G ફોન બનાવતી કંપનીઓને ચિપસેટ આપવા માંગે છે. ગ્રાહકો મોંઘા અને સારા ફોન ખરીદી રહ્યા છે, આવી સ્થિતિમાં 100 ડૉલરથી ઓછી કિંમતના ફોનનું વેચાણ સતત ઘટી રહ્યું છે. રિસર્ચ કંપની IDCએ જણાવ્યું કે ગયા વર્ષની સરખામણીમાં આ વર્ષે માર્ચ ક્વાર્ટરમાં આવા ફોનના વેચાણમાં 14 ટકાનો ઘટાડો થયો છે. હવે તે કુલ વેચાણના માત્ર 15 ટકા છે. એક વર્ષ પહેલા આ આંકડો 20 ટકા હતો.

નવા ચિપસેટનું નામ Snapdragon 4s Gen 2 છે. આવી સ્થિતિમાં, ફોકસ સૌથી સસ્તા ફોન સેગમેન્ટ પર છે, જ્યાં ક્વાલકોમ તેના પ્રતિસ્પર્ધી મીડિયાટેકથી પાછળ હતી. છેલ્લા કેટલાક વર્ષોમાં, અમેરિકન ચિપ મેન્યુફેક્ચરિંગ કંપનીનું ધ્યાન પ્રીમિયમ સેગમેન્ટ પર હતું, કારણ કે મોટાભાગે મોંઘા ફોન વિશ્વભરના સ્માર્ટફોન માર્કેટમાં વેચવામાં આવતા હતા. ભારત જેવા ઉભરતા બજારમાં હજુ પણ ઘણા લોકો ફીચર ફોનનો ઉપયોગ કરે છે. IDC અનુસાર, આવા યુઝર્સની સંખ્યા 340 મિલિયન (34 કરોડ)થી વધુ છે. નિષ્ણાતોનું કહેવું છે કે, ફોન મેન્યુફેક્ચરિંગ કંપનીઓ ક્વાલકોમની મદદથી આ લોકોને નવા સ્માર્ટફોન આપવાનો પ્રયાસ કરશે.

ક્વોલકોમના વરિષ્ઠ એક્ઝિક્યુટિવ ક્રિસ પેટ્રિકે કહ્યું, 'અમે અમારી પોતાની ટેક્નોલોજી વિકસાવીએ છીએ. તેથી, અમે તેમને બદલી શકીએ છીએ અને સસ્તા ફોન માટે પણ ઉપયોગ કરી શકીએ છીએ, જે અમારા હરીફો કરી શકતા નથી. તેણે એ પણ જણાવ્યું કે, કંપનીએ ફોન બનાવવાની કિંમત ઘટાડવાનો પ્રયાસ કર્યો છે, જેથી કરીને 100 ડૉલરથી ઓછી કિંમતના ફોન બનાવી શકાય. કંપનીએ કહ્યું કે નવા ચિપસેટને કારણે સ્માર્ટફોન મેન્યુફેક્ચરિંગ કંપનીઓ પ્રિન્ટેડ સર્કિટ બોર્ડ (PCB)ની કિંમતમાં ઘટાડો કરી શકે છે, જે મોબાઈલનો આવશ્યક ભાગ છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.