USમાં મંદી છે, તો ભારતમાં PM મોદી છે, રેકોર્ડ બનવાનો છેઃ વિજય કેડિયા

બેન્કિંગ કટોકટીને કારણે અમેરિકામાં આર્થિક મંદીનો ભય વધી ગયો છે. નિષ્ણાતોનું માનવું છે કે, જો અમેરિકામાં મંદી આવશે તો તેની અસર આખી દુનિયામાં જોવા મળશે. દરમિયાન, શેરબજારના અનુભવી રોકાણકાર વિજય કેડિયાનું માનવું છે કે, સરકાર દ્વારા ઈન્ફ્રાસ્ટ્રક્ચર, GST અને PLI (પ્રોડક્શન લિન્ક્ડ ઈન્સેન્ટિવ) યોજનાઓ પર ભાર મૂકવામાં આવ્યો છે, જ્યારે સ્થાનિક ઈક્વિટી માર્કેટ પર તેમનો આશાવાદી દૃષ્ટિકોણ જાળવી રાખ્યો છે અને તેની હકારાત્મક અસર દેશના અર્થતંત્ર પર દેખાઈ રહી છે.

વિજય કેડિયાએ ભારતીય અર્થવ્યવસ્થા વિશે આ વાત એવા સમયે કહી છે, જ્યારે અમેરિકા સહિત વિકસિત બજારોમાં મંદીની ચર્ચા ચાલી રહી છે. કેડિયાએ કહ્યું, 'જો અમેરિકામાં મંદી છે, તો આ પરિસ્થિતિનો સામનો કરવા માટે PM નરેન્દ્ર મોદીના નેતૃત્વમાં અમારી પાસે વ્યવહારિક નીતિઓ છે.' આ જ કારણ છે કે વૈશ્વિક બજારોમાં ચાલી રહેલી અનિશ્ચિતતાઓ છતાં, બેન્ચમાર્ક ઇક્વિટી ઇન્ડેક્સ તેના સર્વકાલીન ઉચ્ચ સ્તરથી માત્ર પાંચથી છ ટકા દૂર છે.

25 એપ્રિલના સવારના વેપારમાં 30 શેરનો સૂચકાંક BSE સેન્સેક્સ 60,171 પર ટ્રેડ કરી રહ્યો હતો. 1 ડિસેમ્બર, 2022ના રોજ ઇન્ડેક્સ 63,583ની સર્વકાલીન ઊંચી સપાટીએ પહોંચ્યો હતો. વિજય કેડિયાને લાગે છે કે, બજાર નવી ઊંચાઈની તૈયારી કરી રહ્યું છે. તેણે કહ્યું કે, મને લાગે છે કે, જો મંદી હશે તો તે હળવી હશે. Trendline પાસે ઉપલબ્ધ ડેટા દર્શાવે છે કે, વિજય કેડિયા પટેલ એન્જિનિયરિંગ, પ્રિસિઝન કેમશાફ્ટ્સ, એફોર્ડેબલ રોબોટિક્સ એન્ડ ઓટોમેશન, અતુલ ઓટો, નુલેન્ડ લેબોરેટરીઝ અને વૈભવ ગ્લોબલ જેવી કંપનીઓમાં એક-એક ટકાથી વધુ હિસ્સો ધરાવે છે.

વિજય કેડિયા એમ પણ માને છે કે, US ફેડ દ્વારા આગળ ઉપર વ્યાજના દરોમાં થનારો વધારો ભારતીય ઇક્વિટી માર્કેટને અસર કરશે નહીં. બેંકિંગ સેક્ટર પર પોતાના મંતવ્યો શેર કરતા વિજય કેડિયાએ કહ્યું કે, આગામી 2-3 વર્ષ ધિરાણકર્તાઓ માટે સારા રહેશે. જોકે, રોકાણકારોએ બેન્કિંગ સેક્ટરમાં સ્ટોક સ્પેસિફિક અભિગમ અપનાવવો જોઈએ. તેમણે કહ્યું કે, IT સેક્ટરમાં 3-6 મહિનાથી કોઈ તક દેખાઈ રહી નથી. કેડિયાએ કહ્યું, 'US અર્થતંત્ર અને બજારમાં કોઈપણ પ્રકારની રિકવરી IT સેક્ટરમાં રોકાણકારો માટે તકો ખોલી શકે છે.'

અમેરિકામાં બેંકિંગ કટોકટી એટલી પ્રબળ બની હતી કે, બે અઠવાડિયામાં બે બેંકોને તાળા લાગી ગયા હતા. સિલિકોન વેલી બેંક અને સિગ્નેચર બેંક ડૂબી ગઇ. સાન્ટા ક્લેરા, કેલિફોર્નિયા સ્થિત સિલિકોન વેલી બેંક (SVB) 10 માર્ચે નિષ્ફળ ગઈ. બેંકની આર્થિક સ્થિતિથી ચિંતિત, થાપણદારો તેમના પૈસા ઉપાડવા માટે લાઈનમાં લાગી ગયા હતા. 2008માં લેહમેન બ્રધર્સની નિષ્ફળતા પછી US બેંકિંગ ક્ષેત્રના ઇતિહાસમાં આ બીજી સૌથી મોટી બેંક નિષ્ફળતા હતી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.