પાકિસ્તાનના બજેટ કરતા આપણે લગ્ન પર વધુ ખર્ચો કરી નાખીએ છીએ

દેવઉઠી એકાદશીથી દેશમાં લગ્નની સિઝન શરૂ થઈ ગઈ છે. દેશના ઉદ્યોગપતિઓની સંસ્થા કોન્ફેડરેશન ઓફ ઓલ ઈન્ડિયા ટ્રેડર્સ (CAIT) અનુસાર, આ વખતે 23 નવેમ્બરથી 15 ડિસેમ્બરની વચ્ચે 38 લાખ લગ્નો થવાની સંભાવના છે. તેનાથી 4.74 લાખ કરોડ રૂપિયાનું રેકોર્ડ ટર્નઓવર થવાની ધારણા છે, જે પાકિસ્તાનના કુલ બજેટ કરતાં વધુ છે. ભારતીય લોકો લગ્ન પાછળ ઘણો ખર્ચ કરે છે. આનાથી અર્થતંત્રને પણ વેગ મળે છે. આ સમયગાળા દરમિયાન, જ્વેલરીથી લઈને લક્ઝરી ડિઝાઈનર્સ તેમજ હોટેલ્સ સુધીની દરેક વસ્તુમાં ભારે નફો થવાની અપેક્ષા છે. ગયા વર્ષે આ સમયગાળા દરમિયાન લગભગ 32 લાખ લગ્નો થયા હતા, જેનાથી લગભગ 3.75 લાખ કરોડ રૂપિયાનો બિઝનેસ થયો હતો.

ભારતમાં લગ્નનું બજાર લગભગ 50 થી 60 અબજ ડોલરનું છે અને તે 25 થી 30ટકાના દરે વધી રહ્યું છે. આ વખતે માત્ર દિલ્હીમાં જ ચાર લાખથી વધુ લગ્નો થવાની ધારણા છે, જેનાથી આશરે રૂ. 1.25 લાખ કરોડનો બિઝનેસ થવાની ધારણા છે. લગ્નનો લગભગ 50 ટકા ખર્ચ સામાનની ખરીદી પર અને 50 ટકા સેવાઓ પર થાય છે. આ સિઝનમાં લગ્નનું બજેટ અલગ અલગ થઇ શકે છે. તેમાંથી 50 હજાર લગ્નોનું બજેટ 1 કરોડ કે તેથી વધુ રહેવાની ધારણા છે. આનાથી હોટલ ઉદ્યોગને પણ પ્રોત્સાહન મળવાની અપેક્ષા છે. ઉપરાંત, દેશમાં ડેસ્ટિનેશન વેડિંગની સંસ્કૃતિ ઝડપથી ઉભરી આવી છે.

લગ્નની સિઝનમાં દેશમાં 4.74 લાખ કરોડ રૂપિયાનો બિઝનેસ થવાની ધારણા છે, જે પાકિસ્તાનના બજેટ કરતાં વધુ છે. આર્થિક સંકટનો સામનો કરી રહેલા પાકિસ્તાનનું આ વર્ષનું બજેટ ભારતીય રૂપિયામાં 4.15 લાખ કરોડ રૂપિયા હતું. એટલે કે ભારતીય લોકો આ વર્ષે લગ્ન પર પાકિસ્તાનના કુલ બજેટ કરતાં વધુ ખર્ચ કરશે. નિષ્ણાતોના મતે, સામાન્ય રીતે લગ્નમાં થતા ખર્ચના 50 ટકા સામાનની ખરીદી પર અને બાકીના 50 ટકા સેવાઓ પર ખર્ચવામાં આવે છે. કપડાં, સાડી, લહેંગા અને ગાર્મેન્ટ્સની ખરીદી પર 10 ટકા, જ્વેલરી પર 15 ટકા, ઈલેક્ટ્રોનિક્સ, ઈલેક્ટ્રિકલ્સ અને કન્ઝ્યુમર ગુડ્સ પર 5 ટકા, ડ્રાય ફ્રુટ્સ, ફળો, મીઠાઈઓ અને નમકીન પર 5 ટકા, અનાજ, કરિયાણા અને શાકભાજી પર 5 ટકા, ભેટ પર 4 ટકા, અને બાકી વસ્તુઓ પર અને 6 ટકા ખર્ચ રહેવાનો અંદાજ લગાવવામાં આવી રહ્યો છે.

જ્યાં સુધી સેવા ક્ષેત્રની વાત છે, તેમાં અંદાજ મુજબ, 5 ટકા બેંક્વેટ હોલ, હોટલ અને અન્ય લગ્ન સ્થળો પર, 5 ટકા ઇવેન્ટ મેનેજમેન્ટ પર, 12 ટકા ટેન્ટ ડેકોરેશન પર, 10 ટકા કેટરિંગ સેવાઓ પર, 4 ટકા ફૂલની સજાવટ પર ખર્ચવામાં આવશે, 3 ટકા મુસાફરી અને કેબ સેવાઓ પર, 2 ટકા ફોટો અને વિડિયો શૂટ પર, 3 ટકા ઓર્કેસ્ટ્રા, બેન્ડ વગેરે પર, 3 ટકા લાઇટ અને સાઉન્ડ પર અને 3 ટકા અન્ય સેવાઓ પર ખર્ચવામાં આવે છે. આ સમયગાળા દરમિયાન હોટલોના બુકીંગમાં પણ તેજી રહેવાની ધારણા છે. જયપુરમાં હિલ્ટન ગ્રુપની હોટલોનો 60 ટકા બિઝનેસ લગ્નોમાંથી જ આવે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.