ચાંદીનો વપરાશ ક્યાં વધ્યો, કે જેથી તેની કિંમત 1 લાખ રૂપિયા પ્રતિ કિલો થઈ રહી છે?

છેલ્લા કેટલાક દિવસોથી, ચાંદીના ભાવમાં સતત વધારો થઈ રહ્યો છે (સોના ચાંદીના ભાવમાં વધારો). ઈન્ડિયા બુલિયન એન્ડ જ્વેલર્સ એસોસિએશન (IBJA)ની વેબસાઈટ અનુસાર 22 મેના રોજ ચાંદીની કિંમત 93 હજાર રૂપિયા પ્રતિ કિલોની આસપાસ પહોંચી ગઈ છે. એક દિવસ પહેલા 21 મેની સાંજે ચાંદીનો ભાવ 92,873 રૂપિયા પ્રતિ કિલો હતો. હવે આપણે એ જાણીશું કે, ચાંદીના ભાવ શા માટે વધી રહ્યા છે અને આ સમયે આટલો મોટો ઉછાળો શા માટે આવ્યો છે.

13 મેના રોજ ચાંદીનો ભાવ 83 હજાર 494 રૂપિયા પ્રતિ કિલો હતો. ત્યારથી આજ સુધી એટલે કે 22મી મે સુધી આ કિંમતમાં 9600 રૂપિયાનો વધારો થયો છે. તેની પાછળનું કારણ ચાંદીના ઉપયોગ સાથે જોડાયેલું છે. બુલિયન વેપારી કુમાર જૈન આ વિશે કહે છે, 'ચાંદીનો વપરાશ વધ્યો છે. તેથી તેની કિંમતમાં પણ વધારો થયો છે. ઇલેક્ટ્રિક વાહનો (EV) અને સોલાર પેનલમાં ચાંદીનો ઉપયોગ વધ્યો છે. EV અને સોલાર પેનલના ઉત્પાદનમાં હવે ચાંદીનો વપરાશ વધ્યો છે. બીજી ઘણી વસ્તુઓમાં પણ વધારો થયો છે, તેથી ભાવ પણ વધી રહ્યા છે.'

કુમાર જૈને કહ્યું કે, ચાંદીની કિંમતમાં વધુ વધારો થશે અને તે પ્રતિ કિલો રૂ. 1 લાખ સુધી પહોંચી શકે છે. ઘણા મીડિયા અહેવાલોમાં છેલ્લા કેટલાક સમયથી આવા જ દાવા કરવામાં આવી રહ્યા હતા.

ચાંદીનો ઉપયોગ માત્ર જ્વેલરી બનાવવા માટે જ થતો નથી, તેના ઘણા ઔદ્યોગિક એકમોમાં પણ તેનો ઉપયોગ વધ્યો છે. સમગ્ર વિશ્વમાં ઇલેક્ટ્રિક વાહનોની બેટરીમાં ચાંદીનો ઉપયોગ થાય છે. પેટ્રોલ અને ડીઝલ વાહનોના ઉત્પાદનમાં પણ, ચાંદીનો ઉપયોગ તેમની ઘણી સિસ્ટમોમાં થાય છે, જેમ કે ઇન્ફોટેનમેન્ટ સિસ્ટમ, નેવિગેશન સિસ્ટમ, ઇલેક્ટ્રિક પાવર સ્ટીયરિંગ. આ સિવાય વાહનોના સેફ્ટી ફીચર્સમાં ચાંદીનો ઉપયોગ થાય છે. જેમ કે એરબેગ ડિપ્લોયમેન્ટ સિસ્ટમ, ઓટોમેટિક બ્રેક અને ડ્રાઈવર એલર્ટ સિસ્ટમ.

સિલ્વર ઇન્સ્ટિટ્યૂટના રિપોર્ટ અનુસાર, બેટરીવાળી ઇલેક્ટ્રિક કાર સરેરાશ 25 થી 50 ગ્રામ ચાંદીનો વપરાશ કરે છે. જ્યારે હાઇબ્રિડ વાહનોમાં વાહન દીઠ 18 થી 34 ગ્રામ ચાંદીનો ઉપયોગ થાય છે. વિશ્વ હવે ઓટોમેટિક ડ્રાઇવિંગ સિસ્ટમવાળા વાહનો તરફ આગળ વધી રહ્યું છે. આવી સ્થિતિમાં આ વાહનોમાં ચાંદીનો વધુ વપરાશ થશે.

તેવી જ રીતે, સોલાર પેનલના ઉત્પાદનમાં પણ ચાંદીનો ઉપયોગ થાય છે. ‘વી રિસાયકલ સોલાર’ના 2020ના અહેવાલમાં જણાવાયું છે કે, લગભગ 2 ચોરસ મીટરની સરેરાશ સોલાર પેનલમાં 20 ગ્રામ ચાંદીનો ઉપયોગ થાય છે. આ સિવાય પાવર સેક્ટરમાં પણ ચાંદીનો મોટાપાયે ઉપયોગ થાય છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.