કોણ છે મોહસીન અખ્તર મીર? ઉર્મિલા માતોંડકર લગ્નના 8 વર્ષ પછી પતિથી અલગ થઈ રહી છે

બોલિવૂડ એક્ટ્રેસ ઉર્મિલા માતોંડકરના ફેન્સ માટે એક નિરાશાજનક સમાચાર સામે આવ્યા છે. એવું કહેવામાં આવી રહ્યું છે કે, ઉર્મિલા માતોંડકર તેના પતિ મોહસીન અખ્તર મીર સાથે છૂટાછેડા લેવા જઈ રહી છે. અભિનેત્રીએ લગ્નના આઠ વર્ષ પછી બિઝનેસમેન-મોડલ મોહસીન અખ્તર મીરથી છૂટાછેડા માટે અરજી કરી છે. મુંબઈની એક કોર્ટમાં એક સૂત્રએ નામ ન આપવાની શરતે જણાવ્યું હતું કે, 50 વર્ષીય અભિનેત્રીએ છૂટાછેડા માટે અરજી કરી છે. અહીં તમને જણાવી દઈએ કે, ઉર્મિલાએ માર્ચ 2016માં એક કાશ્મીરી બિઝનેસમેન સાથે લગ્ન કર્યા હતા. આ કપલના લગ્ન ઘણા કારણોસર હેડલાઇન્સમાં રહ્યા હતા. આંતર-ધાર્મિક લગ્ન અને તેમની વચ્ચે 10 વર્ષની ઉંમરના તફાવતને કારણે ઘણો હોબાળો થયો હતો.

ઉર્મિલા માતોંડકર અને મોહસીન અખ્તર મીરે 3 માર્ચ 2016ના રોજ લગ્ન કર્યા હતા. પરંતુ હવે 8 વર્ષ પછી તેમના છૂટાછેડાના સમાચાર છે. જોકે, આ અંગે દંપતી તરફથી હજુ સુધી કોઈ સત્તાવાર નિવેદન બહાર આવ્યું નથી. તેમના અલગ થવાના કારણો હજુ સ્પષ્ટ નથી, પરંતુ સૂત્રોનું કહેવું છે કે અલગ થવું પરસ્પર સંમતિથી થયું ન હતું. કાશ્મીરી બિઝનેસમેન અને ભૂતપૂર્વ મોડલ મોહસિને બિઝનેસમાં આવતા પહેલા એક્ટિંગ શરૂ કરી હતી.

દંપતીના નજીકના એક સૂત્રએ મીડિયાને જણાવ્યું કે, અભિનેત્રીએ મુંબઈની બાંદ્રા કોર્ટમાં છૂટાછેડા માટે અરજી કરી છે. એવું પણ કહેવામાં આવી રહ્યું છે કે, છૂટાછેડા પરસ્પર સહમતિથી થયા છે. આ છૂટાછેડાની અરજી ચાર મહિના પહેલા જ દાખલ કરવામાં આવી હતી. મીડિયા સૂત્રના જણાવ્યા અનુસાર, 50 વર્ષીય અભિનેત્રીએ આ નિર્ણય કાળજીપૂર્વક વિચાર્યા પછી લીધો હતો. મુંબઈ કોર્ટના એક સૂત્રએ મીડિયાને જણાવ્યું કે, અલગ થવાનું કારણ હજુ સુધી જાણી શકાયું નથી.

ઉર્મિલા ઈન્સ્ટાગ્રામ પર કુલ 150 લોકોને ફોલો કરે છે. જોકે, મોહસીન તેમાં સામેલ નથી. જો કે અભિનેત્રીએ મોહસીન સાથેની તસવીરો હટાવી નથી. તેમની છેલ્લી પોસ્ટમાં આ કપલ સાથે જોવા મળ્યું હતું. મોહસીન સાથેની એક તસવીર શેર કરતા ઉર્મિલાએ લખ્યું, 'શાંતિ અને સંવાદિતા માટે તમામ પ્રાર્થનાઓ સ્વીકાર કરો... પ્રેમ, દયા અને કરુણાની જીત થાય!'

ઉર્મિલા અને 40 વર્ષીય મોહસીન, 2016માં તેમના મુંબઈના ઘરે એક ખાનગી સમારંભમાં લગ્ન કર્યા હતા. તે એક ખાનગી સમારંભ હતો, જેમાં ફેશન ડિઝાઈનર મનીષ મલ્હોત્રાએ હાજરી આપી હતી, જે ફિલ્મ ઈન્ડસ્ટ્રીના થોડા લોકોમાંના એક હતા. તેમના લગ્ન એટલા માટે ચર્ચામાં આવ્યા, કારણ કે તેમની વચ્ચે ઉંમરમાં 10 વર્ષનો તફાવત છે.

અભિનેત્રીએ 2019માં કોંગ્રેસ સાથે રાજકારણમાં પ્રવેશ કર્યો અને પછી 2020માં, તે શિવસેનામાં જોડાઈ. ઉર્મિલા છેલ્લે 2018માં આવેલી ફિલ્મ 'બ્લેકમેલ'ના ગીત 'બેવફા બ્યુટી...'માં સ્ક્રીન પર જોવા મળી હતી. તે પછી, તે TV પર બાળકોના ડાન્સ રિયાલિટી શોના જજ તરીકે પણ જોવા મળી હતી. મોહસીનને કાશ્મીરી ભરતકામ અને કારીગરીમાં રસ છે.

ઉર્મિલા માતોંડકર ભારતીય સિનેમાનું જાણીતું નામ છે. પરંતુ મોહસીન અખ્તર મીરે પોતાના લગ્ન દરમિયાન બહુ ઓછા લોકોને આકર્ષ્યા છે. મૂળ કાશ્મીરનો મોહસીન બોલિવૂડમાં મોટું નામ બનાવવાની આકાંક્ષા સાથે 21 વર્ષની ઉંમરે મુંબઈ આવ્યો હતો. તેણે ઈટ્સ અ મેન્સ વર્લ્ડ (2009), લક બાય ચાન્સ (2009) અને મુંબઈ મસ્ત કલંદર (2011) જેવી ફિલ્મોમાં કામ કર્યું. જો કે, તેમ છતાં તેની અભિનય કારકિર્દીને વધુ વેગ મળ્યો ન હતો.

આખરે, મોહસિને પોતાનું ધ્યાન ધંધા તરફ વાળ્યું. હાલમાં, તે હવે પ્રખ્યાત ફેશન ડિઝાઇનર મનીષ મલ્હોત્રાના લેબલ સાથે સંકળાયેલા છે, જે કાશ્મીરી કારીગરીનું પ્રદર્શન કરે છે. 2014માં મનીષ મલ્હોત્રા દ્વારા આયોજિત પારિવારિક લગ્નમાં મોહસીન ઉર્મિલાને પહેલીવાર મળ્યો હતો. તેમના સંબંધો ટૂંક સમયમાં ગાઢ થયા અને બે વર્ષ પછી તેઓએ ગુપ્ત રીતે લગ્ન કર્યા.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.