BJPના ગઢ ગુજરાતમાં રાહુલ સક્રિય થશે... શક્તિસિંહે આપ્યા સંકેતો, કેવી છે તૈયારીઓ?

કોંગ્રેસ નેતા રાહુલ ગાંધી ટૂંક સમયમાં ગુજરાત મોરચે સક્રિય થશે. લોકસભામાં વિપક્ષના નેતા તરીકે બોલતા રાહુલ ગાંધીએ BJPને ગુજરાતમાં તેમને હરાવવાનો પડકાર ફેંક્યો હતો. આ પછી સવાલ એ ઊભો થયો કે રાહુલ ગાંધીએ BJPને આટલો મોટો પડકાર કેવી રીતે આપ્યો? હવે રાહુલ ગાંધી ગુજરાતમાં સક્રિય થવાના સંકેતો મળી રહ્યા છે. રાજ્યમાં હિંદુ નિવેદનોને લઈને કોંગ્રેસ અને BJP સામ-સામે છે, ત્યારે રાહુલ ગાંધી પ્રથમ વખત ગુજરાતની મુલાકાતે આવી શકે છે. તેવો સંકેત પક્ષના પ્રદેશ પ્રમુખ શક્તિસિંહ ગોહિલે આપ્યો છે. ગોહિલે કહ્યું કે, રાહુલ ગાંધી ટૂંક સમયમાં રાજ્યની મુલાકાતે એવા કાર્યકરોને મળશે જેઓ BJPના આક્રમણ દરમિયાન બબ્બર શેરની જેમ આગળ આવીને લડ્યા હતા. ગોહિલે જણાવ્યું હતું કે, કોંગ્રેસ કાર્યાલયની બહાર થયેલી અથડામણના કેસમાં પોલીસે એકતરફી કાર્યવાહી કરી છે. ગોહિલે સમગ્ર રાજ્યના કાર્યકરોને 6 જુલાઈના રોજ અમદાવાદ આવવા અપીલ કરી છે. એવી શક્યતા છે કે, જો અમદાવાદ પોલીસ BJPના કાર્યકરો સામે કાર્યવાહી નહીં કરે તો રાહુલ ગાંધી 6 જુલાઈના રોજ અમદાવાદમાં પહોંચી શકે છે, અમદાવાદમાં 7 જુલાઈએ ભગવાન જગન્નાથની 18 કિલોમીટર લાંબી રથયાત્રા યોજાનાર છે.

ગુજરાતમાં કોંગ્રેસ ત્રણ દાયકાથી સત્તાની બહાર છે, પરંતુ છેલ્લા ઘણા વર્ષોમાં રાજ્યમાં આવી કોઈ ઘટના બની નથી. જેમાં બંને પક્ષના કાર્યકરો વચ્ચે સીધી અથડામણ થઈ હોય. અમદાવાદમાં કોંગ્રેસ કાર્યાલયની બહાર પોલીસની હાજરીમાં પથ્થરમારો થયો હતો. 2013 સુધી વિદ્યાર્થી રાજકારણમાં બંને પક્ષોની યુવા પાંખ વચ્ચે આવી ઘટનાઓ બનતી હતી. કોંગ્રેસનું કહેવું છે કે, રાહુલ ગાંધીએ હિન્દુ ધર્મ વિશે જે પણ કહ્યું છે તે બિલકુલ સાચું છે. પ્રદેશ કોંગ્રેસ પ્રમુખ શક્તિસિંહ ગોહિલ રાહુલ ગાંધીના નજીકના ગણાય છે. ગોહિલે BJPને લોકસભામાં ક્લીન સ્વીપ કરતા અટકાવીને અને રાજકોટ આગની ઘટનાને લઈને સમગ્ર શહેર બંધ કરાવીને પોતાનું કદ વધાર્યું છે. માનવામાં આવી રહ્યું છે કે, હવે રાહુલ ગાંધી ખુદ ગુજરાતમાં તેમની સક્રિયતા વધારી શકે છે.

લોકસભાની ચૂંટણી દરમિયાન રાહુલ ગાંધીએ ગુજરાતની મુલાકાત લીધી ન હતી. પ્રિયંકા ગાંધીએ માત્ર વલસાડ અને બનાસકાંઠામાં જ સભાઓ કરી હતી. ગોહિલના નિવેદનને રાજકીય વર્તુળોમાં ભારે તૈયારી સાથે જોડવામાં આવી રહી છે. રાજ્યમાં પંચાયતની ચૂંટણી પહેલા રાહુલ ગાંધી સંપૂર્ણ રીતે સક્રિય થઈ શકે તેવી શક્યતાઓ છે. આ સાથે રાજ્યમાં કોંગ્રેસ પાર્ટીના સંગઠનને મજબૂત કરવાના પ્રયાસો પણ શરૂ થઈ શકે છે. કોંગ્રેસના એક નેતાએ કહ્યું કે, આગામી દિવસોમાં રાજ્યમાં બે વિધાનસભા બેઠકો પર પેટાચૂંટણી યોજાવાની છે. બંને બેઠકો પર પાર્ટી મજબૂતીથી લડશે. પાર્ટી ઈન્ડિયા એલાયન્સ હેઠળ માણાવદર બેઠક આમ આદમી પાર્ટી માટે છોડી શકે છે.

રાહુલ ગાંધીએ લોકસભામાં BJPને સીધો પડકાર ફેંક્યો હતો અને કહ્યું હતું કે, અમે તમને ગુજરાતમાં હરાવીશું. તેમના નિવેદનનો અર્થ 2027ની ચૂંટણી હતી. 182 સભ્યોની ગુજરાત વિધાનસભામાં બહુમતીનો આંકડો 92 બેઠકોનો છે. કોંગ્રેસે છેલ્લી ચૂંટણીમાં 17 બેઠકો જીતી હતી, જો કે, 2017ની ચૂંટણીમાં પાર્ટીને 77 બેઠકો મળી હતી. ત્યારે BJP છેલ્લા બે દાયકામાં પ્રથમ વખત બે આંકડામાં પહોંચ્યો હતો. BJPને 99 બેઠકો મળી હતી. તે ચૂંટણીમાં પાર્ટીને 41.44 ટકા વોટ મળ્યા હતા. 49.05 ટકા મત BJPના ખાતામાં ગયા. રાહુલ ગાંધી વિરોધ પક્ષના નેતા બન્યા પછી રાજ્ય એકમ ગુજરાતમાં તેમની સક્રિયતા વધારવા માંગે છે. તે આ મહિનામાં જ શરૂ થઈ શકે છે. એવી પણ ચર્ચા છે કે, રાહુલ ગાંધી તેમના પ્રવાસ દરમિયાન રાજકોટ TRP ગેમ ઝોનના પીડિતોને મળવા પણ જઈ શકે છે. રાહુલ ગાંધી તેમના પ્રવાસ દરમિયાન મોરબી બ્રિજ અકસ્માત અને વડોદરા હરણી બોટ દુર્ઘટનાના પીડિતોની મુલાકાત પણ લઈ શકે છે. ગુજરાત પ્રદેશ કોંગ્રેસ સમિતિ પીડિતોને ન્યાય આપવા માટે એક મોટા એક્શન પ્લાન પર કામ કરી રહી છે. સૂત્રોનું માનીએ તો પાર્ટી આગામી દિવસોમાં આ અંગેની જાહેરાત કરી શકે છે. ટીમ રાહુલ ગાંધીનો હિસ્સો જીગ્નેશ મેવાણી રાજકોટમાં સક્રિય છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.