ગુજરાતમાં શું થવાનું છે? PM મોદી-CM પટેલ વચ્ચે દિલ્હીમાં કલાકો સુધી બેઠક થઈ

ગુજરાતમાં વિપક્ષના ધારાસભ્યોના રાજીનામા વચ્ચે CM ભૂપેન્દ્ર પટેલ અને PM નરેન્દ્ર મોદી વચ્ચે દિલ્હીમાં લાંબી બેઠક યોજાઈ હતી. મોડી રાત સુધી ચાલેલી આ બેઠકમાં ગુજરાતના મુદ્દાઓ પર ચર્ચા કરવામાં આવી હતી. CM ભૂપેન્દ્ર પટેલે 12 ડિસેમ્બરે તેમની બીજી ઇનિંગનું પ્રથમ વર્ષ પૂર્ણ કર્યું.

ગુજરાતમાં 2022ની વિધાનસભાની ચૂંટણીમાં જંગી જીત પછી કેબિનેટ વિસ્તરણની અટકળો ચાલી રહી છે. આવી સ્થિતિમાં પાર્ટીએ લોકસભાની ચૂંટણીની તૈયારીઓ શરૂ કરી દીધી છે, ત્યારે ફરી એકવાર ગુજરાતમાં ઉત્તરાયણના તહેવાર પહેલા અનેક સવાલોના જવાબ મળી શકે તેવી ચર્ચા છે. 20 ડિસેમ્બરે ગુજરાતના CM ભૂપેન્દ્ર પટેલ અને PM નરેન્દ્ર મોદી વચ્ચે દિલ્હીમાં બેઠક થઈ હતી. સૂત્રોનું માનીએ તો આ બેઠકમાં ગુજરાતની ચર્ચા થઈ હતી. જ્યારે CM ભૂપેન્દ્ર પટેલે આવતા મહિને યોજાનારી વાઇબ્રન્ટ ગુજરાત ગ્લોબલ સમિટ 2024ની તૈયારીઓ અંગે PM મોદીને માહિતી આપી હતી, ત્યારે રાજ્યના અન્ય મુદ્દાઓ પર પણ ચર્ચા કરવામાં આવી હતી. PM મોદી અને CM પટેલની લાંબી મુલાકાતને લઈને રાજકીય વર્તુળોમાં ચર્ચા ચાલી રહી છે, કે શું ગુજરાતમાં કંઈક મોટું થવાનું છે. સરકાર અને સંગઠનના મોરચે મોટા ફેરબદલ થઈ શકે છે.

PM નરેન્દ્ર મોદી અને ગુજરાતના CM ભૂપેન્દ્ર પટેલ વચ્ચેની આ મુલાકાત લગભગ સાડા ત્રણ કલાક સુધી ચાલી હતી. રાજકીય વર્તુળોમાં ચર્ચા છે કે, આ બેઠકમાં સરકારની કામગીરી અને 2024ની ચૂંટણી પહેલા સંગઠનમાં ખાલી પડેલી જગ્યાઓ ભરવા અંગે ચર્ચા કરવામાં આવી હતી. ગુજરાત BJPની કોર ટીમમાં છ મોટી જગ્યાઓ ખાલી છે. જેમાંથી બે પદ રાજ્ય મહામંત્રીઓની છે. ભાર્ગવ ભટ્ટ અને પ્રદીપસિંહ વાઘેલાના રાજીનામા પછી આ જગ્યાઓ ખાલી પડી છે. પ્રદીપસિંહ વાઘેલા પ્રદેશ મહામંત્રી હોવા ઉપરાંત ગાંધીનગર સ્થિત કમલમના પ્રભારી પણ હતા. આવી સ્થિતિમાં, જ્યારે પાર્ટી 2024ની ચૂંટણીમાં 400 બેઠકો જીતવાના લક્ષ્ય સાથે આગળ વધી રહી છે, ત્યારે પાર્ટી સંગઠનને મજબૂત કરીને આગળ વધવા માંગે છે.

ગુજરાતની CM ભૂપેન્દ્ર પટેલની સરકારે ગયા અઠવાડિયે તેના બીજા કાર્યકાળનું પ્રથમ વર્ષ પૂર્ણ કર્યું. 2022ની ગુજરાત વિધાનસભા ચૂંટણીમાં BJPએ 156 બેઠકો જીતી હતી. CM ભૂપેન્દ્ર પટેલના નેતૃત્વમાં ફરી સરકાર રચાયા પછી ગુજરાત મંત્રીમંડળના વિસ્તરણને લઈને અટકળો ચાલી રહી છે. હવે જોવાનું એ રહે છે કે, રાજ્યમાં 2024ની ચૂંટણી પહેલા કેબિનેટનું વિસ્તરણ થાય છે કે નહીં. રાજ્યમાં અનેક કોર્પોરેશનોમાં ચેરમેનની જગ્યાઓ પણ ખાલી પડી છે. આના પર પણ નિમણૂકો થવાની બાકી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.