રાજ્યમાં પહેલીવાર ફેફસાનું દાન સુરતમાંથી કરવામાં આવ્યું

સુરતને સિલ્ક સિટી અને ડાયમંડ સિટી તરીકે ઓળખવામાં આવે છે, ત્યારે હવે સુરતને લાઈફ ડોનેટ સિટી તરીકે ઓળખાય તો પણ નવાઈ નહીં. કારણ કે, દરેક પ્રકારનું દાન આપવામાં સુરતીઓ હંમેશાં તત્પર રહે છે. એ પછી રક્તદાન હોઈ કે, કોઈ પણ જગ્યા પર કુદરતી આફતના કારણે આર્થિક સહાય કરવાની વાત હોય ત્યારે સુરતીઓ ક્યારેય પાછી પાની કરતા નથી. હવે અંગદાનમાં પણ સુરત અગ્રેસર રહ્યું છે. ત્યારે હવે રાજ્યમાં ફેફસાનું પહેલીવાર દાન પણ સુરત શહેરમાંથી જ કરવામાં આવ્યું છે.

એક રીપોર્ટ અનુસાર અડાજણમાં IT ટ્રેનિંગ એકેડમી ચલાવતા 42 વર્ષીય વ્રજેશ શાહને 12 તારીખના રોજ તેમને માથાનો દુઃખાવો થતા તેમને ખેંચ આવવાના કારણે તેઓ બેભાન થઇ ગયા હતા. જેના કારણે તેમને સારવાર માટે હોસ્પિટલમાં ખસેડવામાં આવ્યા હતા. હોસ્પિટલમાં તેમનું સીટી સ્કેન કરાવતા જાણવા મળ્યું હતું કે, તેમના મગજની નસ ફાટી જવાના કારણે તેમના મગજમાં લોહીનો ગઠ્ઠો જામી ગયો છે. ત્યારબાદ 15 મેના રોજ હોસ્પિટલના ડૉક્ટરો દ્વારા તેમને બ્રેનડેડ જાહેર કરવામાં આવ્યા હતા. આ સમગ્ર વાતની જાણ અંગદાન માટે જાણીતી સંસ્થા ડોનેટ લાઈફના સભ્યોને થતા તેમણે વ્રજેશ શાહના પરિવારજનોનો સંપર્ક કર્યો હતો અને તેમને ઓર્ગન ડોનેટનું મહત્ત્વ સમજાવ્યું હતું. જેના કારણે વ્રજેશ શાહના પરિવારજનોએ અંગદાન કરવાની સહમતિ દર્શાવી હતી.

જેના કારણે વ્રજેશ શાહના ફેફસાનું દાન બેંગ્લોરના એક દર્દીને કરવામાં આવ્યું હતું, હદયનું દાન મુંબઈમાં, કિડની અને લીવરનું દાન અમદાવાદમાં અને ચક્ષુનું દાન લોક્દૃષ્ટિ ચક્ષુ બેંક સુરતમાં આપવામાં આવ્યું હતું. ગ્રીન કોરીડોરના માધ્યમથી ફેફસાં સુરતથી 1239 કિલોમીટરના અંતરે આવેલા બેંગ્લોરમાં માત્ર 195 મિનિટમાં ટ્રાન્સપ્લાન્ટ કરવામાં આવ્યા હતા. હ્રદય 90 મિનીટમાં મુંબઈમાં ટ્રાન્સપ્લાન્ટ કરાયું હતું.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.