કેજરીવાલે જણાવ્યું તેઓ PM પદની રેસમાં છે કે નહીં

દિલ્હીના CM અરવિંદ કેજરીવાલે AAP પાર્ટી ઓફિસમાં પ્રેસ કોન્ફરન્સ કરી હતી. આ દરમિયાન તેમણે કહ્યું હતું કે આજે ઈમાનદાર લોકોને જેલમાં મોકલવામાં આવી રહ્યા છે, ભાજપ બેઈમાન લોકોને પોતાની પાર્ટીમાં સામેલ કરીને રક્ષણ આપે છે. આ સિસ્ટમ પણ બંધ થઈ જશે અને અસલી બેઈમાન લોકો પકડાઈ જશે. આ સિવાય તેમણે કહ્યું હતું કે તેઓ PM પદની રેસમાં નથી, પરંતુ જે પણ સરકાર બનશે તેમની પાસે તેઓ કામ કરાવડાવશે. તેમણે કહ્યું કે PoK એ ભારતનો ભાગ છે, અમે તેને પણ પાછું લઈશું. CM કેજરીવાલે કહ્યું હતું કે મેં ગઈકાલે કહેલું કે 2014માં વડાપ્રધાને ભાજપ માટે નિયમ બનાવ્યો હતો કે 75 વર્ષની ઉંમર પછી ભાજપ પોતાના કોઈપણ નેતાને કોઈ જવાબદારી નહીં આપે, તેમને નિવૃત્ત કરવામાં આવશે. તેના આધારે અડવાણીજી, મુરલી મનોહર જોશી, યશવંત સિંહા, સંતોષ ગંગવાર, સુમિત્રા મહાજન નિવૃત્ત થયા. આવતા વર્ષે 17 સપ્ટેમ્બરે જ્યારે વડાપ્રધાન 75 વર્ષના થશે ત્યારે તેઓ પણ નિવૃત્ત થઈ જશે. આ પછી ભાજપના ઘણા નેતાઓએ કહ્યું કે મોદીજી પર 75 વર્ષ વાળો નિયમ લાગુ નહીં થાય. પરંતુ વડાપ્રધાને આ અંગે કશું કહ્યું નથી. હું માનું છું કે વડાપ્રધાન આ નિયમને તેમના પર લાગુ થવાથી રોકશે નહીં.

CM કેજરીવાલે આ 10 ગેરંટી આપી

આ છે CM કેજરીવાલની 10 ગેરંટીઃ વીજળીની ગેરંટી-દેશભરમાં 24 કલાક વધુ મફત વીજળી આપશે. જે રીતે દિલ્હીમાં કર્યું તે જ રીતે દેશમાં કરીશું. ક્યાંય પણ પાવર કટ નહીં થાય. 1.25 લાખ કરોડનો ખર્ચ થશે. દેશભરના ગરીબોને 200 યુનિટ મફત વીજળી મળશે.

શિક્ષણની ગેરંટી-દિલ્હી-પંજાબની જેમ અમે દેશની સરકારી શાળાઓને ખાનગી શાળાઓ કરતા વધુ સારી બનાવીશું. મફત શિક્ષણની વ્યવસ્થા કરવામાં આવશે. આ માટે 5 લાખ કરોડ રૂપિયાનો ખર્ચ કરવામાં આવશે.

સ્વાસ્થ્યની ગેરંટી-લોકો સ્વસ્થ હશે તો દેશ આગળ વધશે. એક PM નહીં, દેશને આગળ લઈ જનારા લોકો છે. ખાનગી હોસ્પિટલો લૂંટી રહી છે અને સરકારી હોસ્પિટલોની હાલત ખરાબ છે. સરકારી હોસ્પિટલો ખાનગી હોસ્પિટલ જેવી હશે. વીમા આધારિત યોજના એક કૌભાંડ છે. આ માટે 5 લાખ કરોડ રૂપિયાનો ખર્ચ કરવામાં આવશે.

રાષ્ટ્ર સર્વોપરી- ચીને આપણી જમીન પર કબજો કર્યો. આને છુપાવવાથી સમસ્યા હલ નહીં થાય. દેશની જમીનને ચીનના કબજામાંથી મુક્ત કરાવાશે. સેનાને રોકવામાં આવશે નહીં.

અગ્નિવીર યોજના બંધ થશે-અગ્નિવીર યોજના બંધ કરવાથી તમામ સૈન્ય ભરતી જૂની પ્રક્રિયા અનુસાર કરવામાં આવશે. અત્યાર સુધી ભરતી કરાયેલા તમામ અગ્નિવીર યોદ્ધાઓને કાયમી કરવામાં આવશે.

દેશના ખેડૂતો-સ્વામીનાથન કમિશન મુજબ, તમામ પાક પર MSP નક્કી કરવામાં આવશે અને તેમને પાકના પૂરા ભાવ આપવામાં આવશે.

લોકશાહી-દિલ્હીને પૂર્ણ રાજ્યનો દરજ્જો આપીશું.

બેરોજગારી-બેરોજગારી માટે વિગતવાર આયોજન છે. આને વ્યવસ્થિત રીતે દૂર કરવામાં આવશે. આગામી એક વર્ષમાં 2 કરોડ નોકરીઓનું સર્જન કરવામાં આવશે.

ભ્રષ્ટાચાર-BJPના વોશિંગ મશીનને ચોકમાં ઉભા કરીને તોડી નાખશે. અમે અપ્રમાણિક લોકોને રક્ષણ આપવાની વ્યવસ્થાને ખતમ કરીશું. દેશને ભ્રષ્ટાચાર મુક્ત કરશે.

કેન્દ્ર સરકાર વેપારીઓને ડરાવી રહી છે. GSTને સરળ બનાવાશે. દેશમાં ઉદ્યોગો ખોલી શકશે. અમારું લક્ષ્ય ચીનના વેપારને પાછળ છોડી દેવાનું છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.