થઈ ગયું સ્પષ્ટ, જાણો વરુણ ગાંધી લોકસભા ચૂંટણી લડશે કે નહીં

વરુણ ગાંધી લોકસભાની ચૂંટણી નહીં લડે. તેમની ટીમે બુધવારે આ વિશે માહિતી આપતા કહ્યું કે, વરુણ તેની માતા મેનકા ગાંધી માટે સુલતાનપુરમાં ચૂંટણી પ્રચાર પર ધ્યાન કેન્દ્રિત કરશે. ભારતીય જનતા પાર્ટીએ આ વખતે પીલીભીતથી વરુણ ગાંધીને લોકસભા ચૂંટણીની ટિકિટ આપી નથી. તેમના સ્થાને BJPએ જિતિન પ્રસાદને મેદાનમાં ઉતાર્યા છે. BJPએ સુલતાનપુરથી વરુણની માતા મેનકા ગાંધીને ફરી ટિકિટ આપી છે. અહીં તમને જણાવી દઈએ કે, વરુણ ગાંધીએ નોમિનેશન પેપર ખરીદ્યું હતું, ત્યારપછી એવી ચર્ચાઓ થઈ હતી કે, તેઓ BJP સામે બળવો કરી શકે છે અને પીલીભીતથી અપક્ષ તરીકે લોકસભા ચૂંટણી લડી શકે છે. પરંતુ તેમની ટીમે નિવેદન બહાર પાડીને આ અટકળો પર પૂર્ણવિરામ મૂકી દીધું છે.

આ પહેલા UP BJP અધ્યક્ષ ચૌધરી ભૂપેન્દ્ર સિંહે વરુણ ગાંધીની ટિકિટ રદ્દ થવા પર કહ્યું હતું કે, આ વખતે પાર્ટીએ તેમને ચૂંટણી લડવાની તક આપી નથી, પરંતુ તેઓ અમારી સાથે છે. પાર્ટી નેતૃત્વએ તેમના વિશે કંઈક સારું વિચાર્યું હશે. અધીર રંજન ચૌધરીએ વરુણને કોંગ્રેસમાં જોડાવાનું આમંત્રણ આપતાં ભૂપેન્દ્ર સિંહે કહ્યું, 'વરુણ ગાંધી BJPના સાચા સૈનિક છે. તેઓ BJPમાં જ રહેશે તેવો પૂરો વિશ્વાસ છે. તેઓ ગાંધી પરિવારમાંથી આવે છે અને BJPએ તેમને ત્રણ વખત સાંસદ બનાવ્યા હતા. અધીર રંજન ચૌધરીએ આરોપ લગાવ્યો હતો કે, વરુણનો સંબંધ ગાંધી પરિવાર સાથે છે, તેથી BJPએ તેમની ટિકિટ રદ કરી છે.

અધીર રંજને કહ્યું, 'વરુણ ગાંધીએ કોંગ્રેસમાં જોડાવું જોઈએ. જો તેઓ કોંગ્રેસમાં જોડાશે તો અમને આનંદ થશે. વરુણ એક મજબૂત અને ખૂબ જ સક્ષમ નેતા છે. ગાંધી પરિવાર સાથે તેમના સંબંધો છે, તેથી BJPએ તેમને ટિકિટ આપી નથી. અમે ઈચ્છીએ છીએ કે, તેઓ હવે કોંગ્રેસમાં જોડાય.' છેલ્લા કેટલાક વર્ષોમાં વરુણ ગાંધી પોતાની જ સરકાર વિરુદ્ધ સતત નિવેદનો આપી રહ્યા હતા. ક્યારેક તેઓ કેન્દ્રની મોદી સરકાર પર તો ક્યારેક રાજ્યની યોગી સરકાર પર નિશાન સાધતા હતા. એવું માનવામાં આવે છે કે પાર્ટી લાઇનથી અલગ સ્ટેન્ડ લેવાને કારણે તેમની સ્થિતિ નબળી પડી ગઈ હતી અને BJPએ તેમને કોઈ મોટી જવાબદારી સોંપી ન હતી.

અહીં તમને જણાવી દઈએ કે, વરુણ ગાંધી 2004માં BJPમાં જોડાયા હતા. પાર્ટીએ તેમને 2009માં પહેલીવાર પીલીભીતથી લોકસભાની ટિકિટ આપી અને તેઓ સાંસદ બન્યા. વર્ષ 2013માં વરુણ ગાંધીને BJPના રાષ્ટ્રીય મહાસચિવ બનાવવામાં આવ્યા અને તે જ વર્ષે પાર્ટીએ તેમને પશ્ચિમ બંગાળના પ્રભારી બનાવ્યા. 2014માં, પાર્ટીએ વરુણને તેની માતા મેનકા ગાંધીની બેઠક સુલતાનપુરથી મેદાનમાં ઉતાર્યા હતા. મેનકા પોતે પીલીભીતથી ચૂંટણી લડ્યા હતા. બંને પોતપોતાની સીટ પરથી જીત્યા હતા. 2019માં BJPએ ફરીથી બંનેની સીટો બદલી. મેનકા સુલતાનપુર આવ્યા અને વરુણ પીલીભીત પાછા ગયા. માતા અને પુત્ર પોતપોતાની સીટ પરથી જીત્યા.

ગયા વર્ષે એક ઈન્ટરવ્યુ દરમિયાન રાહુલ ગાંધીને પૂછવામાં આવ્યું હતું કે, શું તેમના પિતરાઈ ભાઈ વરુણ કોંગ્રેસમાં પાછા ફરશે તો તેમનું સ્વાગત થશે? તેના પર પૂર્વ પાર્ટી અધ્યક્ષે કહ્યું હતું કે, અમારી વિચારધારાઓ મેળ ખાતી નથી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.