માન્યામાં નહીં આવે... દેશમાં પ્રદૂષણ દર વર્ષે 22 લાખ લોકોને જીવ લઇ લે છે

સંશોધન દર્શાવે છે કે, ખુલ્લી હવામાં રહેલું પ્રદૂષણ દર વર્ષે 83 લાખથી વધુ લોકોના જીવ લે છે, જેમાંથી 61 ટકા અશ્મિભૂત ઇંધણના ઉત્સર્જનને કારણે છે. બ્રિટિશ મેડિકલ જર્નલ (BMJ)માં પ્રકાશિત થયેલા એક સંશોધન મુજબ, ઘરો અને ઇમારતોની બહારના વાતાવરણમાં હાજર વાયુ પ્રદૂષણ ભારતમાં દર વર્ષે 21.8 લાખ લોકોના જીવ છીનવી રહ્યું છે. જો વૈશ્વિક સ્તરે જોવામાં આવે તો, ચીન પછી ભારત એવો બીજો દેશ છે જ્યાં વાયુ પ્રદૂષણ આટલી મોટી સંખ્યામાં લોકોના જીવ લઈ રહ્યું છે.

રિસર્ચમાં શેર કરવામાં આવેલા ડેટા અનુસાર, ચીનમાં પ્રદૂષણના કારણે દર વર્ષે 24.4 લાખ લોકોના મોત થઈ રહ્યા છે. જ્યારે, જો આપણે વૈશ્વિક સ્તર પર નજર કરીએ તો, અશ્મિભૂત ઇંધણના ઉપયોગથી થતા વાયુ પ્રદૂષણથી સમગ્ર વિશ્વમાં દર વર્ષે લગભગ 51.3 લાખ લોકો મૃત્યુ પામે છે. આ અશ્મિભૂત ઇંધણનો ઉપયોગ ઉદ્યોગ, વીજ ઉત્પાદન અને પરિવહન જેવા ક્ષેત્રોમાં થઈ રહ્યો છે. આ અભ્યાસમાં સંશોધકોએ ગ્લોબલ બર્ડન ઓફ ડિસીઝ સ્ટડી 2019 તેમજ નાસાના ઉપગ્રહોમાંથી મેળવેલા ડેટાની મદદથી વાતાવરણમાં પ્રદૂષણના સૂક્ષ્મ કણોની હાજરી વિશે માહિતી મેળવી છે.

આ ઉપરાંત, આ માટે તેઓએ આવા મોડલ્સનો ઉપયોગ કર્યો છે જે વાતાવરણની સ્થિતિ અને એરોસોલ્સની સાથે સાથે આરોગ્ય પર તેમની અસરોનું વિશ્લેષણ કરી શકે છે. તેમની મદદથી, સંશોધકોએ સમજવાનો પ્રયાસ કર્યો છે કે, અશ્મિભૂત ઇંધણના કારણે વાયુ પ્રદૂષણથી કેટલા લોકો માર્યા જાય છે અને જો અશ્મિભૂત ઇંધણને સ્વચ્છ અને નવીનીકરણીય ઉર્જા સ્ત્રોતો સાથે બદલવામાં આવે તો તે લોકોના સ્વાસ્થ્યને કેટલો ફાયદો કરશે. આ અભ્યાસના પરિણામો અનુસાર, સમગ્ર વિશ્વમાં 2019 દરમિયાન, તમામ સ્રોતોમાંથી હવાના પ્રદૂષણને કારણે 83.4 લાખ લોકો અકાળે મૃત્યુ પામ્યા હતા.

સૂક્ષ્મ રજકણો અને ઓઝોન જેવા પ્રદૂષકો આ માટે જવાબદાર હતા. આમાંના અડધાથી વધુ મૃત્યુ, લગભગ 52 ટકા, કાર્ડિયોવેસ્ક્યુલર રોગો અને ચયાપચય સાથે સંબંધિત હતા. જ્યારે, વાયુ પ્રદૂષણથી સંબંધિત હૃદય રોગ 30 ટકા મૃત્યુ માટે જવાબદાર છે. એ જ રીતે, 16 ટકા મૃત્યુ માટે સ્ટ્રોક, 16 ટકા માટે ફેફસાના રોગ અને છ ટકા માટે ડાયાબિટીસ જવાબદાર છે. જ્યારે, 20 ટકા મૃત્યુનું કારણ સ્પષ્ટ થઈ શક્યું નથી. હાઈ બ્લડ પ્રેશર અને અલ્ઝાઈમર અને પાર્કિન્સન જેવા ન્યુરોડીજનરેટિવ ડિસઓર્ડર આ માટે જવાબદાર હોઈ શકે છે. સંશોધનમાં વાયુ પ્રદૂષણને કારણે થયેલા આ 83.4 લાખ મૃત્યુમાંથી લગભગ 61 ટકા માટે એકલા અશ્મિભૂત ઇંધણ જવાબદાર છે.

આવી સ્થિતિમાં સંશોધકોનું કહેવું છે કે, જો સ્વચ્છ અને નવીનીકરણીય ઉર્જા જેવા ઉપાયોની મદદ લેવામાં આવે તો આ મૃત્યુને ટાળી શકાય છે. આ ઉપરાંત ક્લાઈમેટ ચેન્જના દૃષ્ટિકોણથી પણ તે ફાયદાકારક રહેશે. અહીં તમને જણાવી દઈએ કે, આ અભ્યાસમાં જારી કરવામાં આવેલા અશ્મિભૂત ઈંધણથી સંબંધિત મૃત્યુના નવા આંકડા અગાઉના મોટાભાગના અંદાજો કરતા ઘણા વધારે છે. આવી સ્થિતિમાં, સંશોધન મુજબ, અશ્મિભૂત ઇંધણનો ઉપયોગ તબક્કાવાર બંધ કરવાથી તેના કારણે થતા મૃત્યુ દર પર વધુ અસર પડી શકે છે. સંશોધકોએ ખુલાસો કર્યો છે કે, જો માનવીઓ દ્વારા થતા વાયુ પ્રદૂષણને સંપૂર્ણપણે નિયંત્રિત કરવામાં આવે તો તેના કારણે થતા 82 ટકાથી વધુ મૃત્યુને ટાળી શકાય છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.