2000 કરોડના લાંચના આરોપો પર અદાણી ગ્રુપનું પહેલું સ્ટેટમેન્ટ આવ્યું

ગૌતમ અદાણીના અદાણી ગ્રુપની કંપની અદાણી ગ્રીન એનર્જીના ડિરેક્ટર્સ સામે અમેરિકામાં લાગેલા લાંચના આરોપો પર અદાણી ગ્રુપે એક સ્ટેટમેન્ટ જાહેર કર્યું છે, જેમાં કહેવામાં આવ્યું છે કે આ તમામ આરોપો પાયાવિહોણા છે. US ડિપાર્ટમેન્ટ ઓફ જસ્ટિસ પોતે કહે છે તેમ, લગાવવામાં આવેલા આરોપો માત્ર આરોપો છે અને જ્યાં સુધી દોષિત સાબિત ન થાય ત્યાં સુધી નિર્દોષ માનવામાં આવે છે. ગ્રુપે કહ્યું છે કે તમામ સંભવિત કાયદાકીય પગલા લેવામાં આવશે. આ સાથે શેરધારકોને ખાતરી આપતા નિવેદનમાં કહેવામાં આવ્યું છે કે અદાણી ગ્રુપે હંમેશાં તમામ ક્ષેત્રોમાં પારદર્શિતા અને નિયમનકારી નિયમોનું પાલન કર્યું છે અને કરવાનું ચાલુ રાખશે. અમે અમારા શેરધારકો, ભાગીદારો અને ગ્રુપની કંપનીઓમાં કામ કરતા કર્મચારીઓને ખાતરી આપીએ છીએ કે અમે કાયદાનું પાલન કરતી સંસ્થા છીએ, જે તમામ કાયદાઓનું સંપૂર્ણ પાલન કરે છે.

ભારતના સૌથી મોટા ઉદ્યોગપતિ ગૌતમ અદાણીની અમેરિકામાં મુશ્કેલીઓ વધી ગઈ છે. US સિક્યોરિટીઝ એન્ડ એક્સચેન્જ કમિશને અદાણી ગ્રુપના વડા પર મોટી છેતરપિંડી અને લાંચ આપવાનો આરોપ મૂક્યો છે. SECનો આરોપ છે કે, ગૌતમ અદાણીએ અમેરિકન રોકાણકારો સાથે છેતરપિંડી કરી છે. અમેરિકાના આ કેસમાં અદાણી ગ્રુપના અન્ય ઘણા સભ્યો પર પણ ગંભીર આરોપો લાગ્યા છે. સુનાવણી પછી અમેરિકન કોર્ટે ગૌતમ અદાણી અને તેમના ભત્રીજા સામે ધરપકડ વોરંટ પણ બહાર પાડ્યું છે.

આ મામલે US પ્રોસિક્યુટર્સે બુધવારે જણાવ્યું હતું કે, ગૌતમ અદાણી અને તેમના ભત્રીજા સાગર અદાણી સહિત અન્ય સાત લોકો પર 20 વર્ષમાં 2 બિલિયન ડૉલરનો નફો ધરાવતા કોન્ટ્રાક્ટ મેળવવા માટે ભ્રષ્ટાચારનો આરોપ છે. ભારતનો સૌથી મોટો સોલાર પાવર પ્લાન્ટ પ્રોજેક્ટ વિકસાવવા માટે ભારતીય સરકારી અધિકારીઓને આશરે 265 મિલિયન ડૉલરની લાંચ આપવાનો આરોપ છે. બીજી તરફ, અદાણી ગ્રુપે અમેરિકામાં રૂ. 600 મિલિયનના બોન્ડ્સ રદ કર્યા છે.

આ કેસમાં એવો પણ આરોપ છે કે, અદાણી અને અન્ય અદાણી ગ્રીન એનર્જી એક્ઝિક્યુટિવ, ભૂતપૂર્વ CEO વિનીત જૈને ધિરાણકર્તાઓ અને રોકાણકારોથી તેમના ભ્રષ્ટાચારને છુપાવીને 3 બિલિયન ડૉલરથી વધુની લોન અને બોન્ડ એકત્ર કર્યા હતા.

SECના આરોપમાં જણાવાયું છે કે, કેટલાક કાવતરાખોરોએ ગૌતમ અદાણીને નુમેરો ઉનો અને ધ બિગ મેન નામથી વ્યક્તિગત રીતે સંબોધિત કર્યા હતા, જ્યારે સાગર અદાણીએ કથિત રીતે લાંચ વિશે માહિતી મેળવવા માટે સેલફોનનો ઉપયોગ કર્યો હતો.

આ મામલે જ્યારે એક ઇન્ટરનેશનલ મીડિયા એજન્સીએ અદાણી ગ્રુપ સાથે આ બાબતે વાત કરવાનો પ્રયાસ કર્યો ત્યારે ગ્રુપ તરફથી કોઈ પ્રતિક્રિયા આપવામાં આવી ન હતી. SEC દ્વારા દાખલ કરવામાં આવેલી ફરિયાદમાં એમ પણ કહેવામાં આવ્યું છે કે, આ લોકો ફેડરલ સિક્યોરિટીઝ કાયદાની છેતરપિંડી વિરોધી જોગવાઈઓનું ઉલ્લંઘન કરી રહ્યા છે.

એટલું જ નહીં, ન્યૂયોર્કની ઈસ્ટર્ન ડિસ્ટ્રિક્ટ એટર્ની ઓફિસે ગૌતમ અદાણી, સાગર અદાણી અને અદાણી ગ્રીન અને એઝ્યુર સાથે સંકળાયેલા અન્ય લોકો સામે ફોજદારી આરોપો દાખલ કર્યા છે.

અત્રે ઉલ્લેખનીય છે કે ગૌતમ અદાણી અને અદાણી જૂથને અગાઉ US સ્થિત શોર્ટ-સેલર હિંડનબર્ગ રિસર્ચના અહેવાલને લઈને મુશ્કેલીઓનો સામનો કરવો પડ્યો હતો, જેના કારણે તેમના શેરના ભાવમાં ભારે ઘટાડો થયો હતો.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.