NCP પછી શિવસેના શિંદે જૂથ નારાજ, કહ્યું- 7 સાંસદોમાંથી એક પણ કેબિનેટ મંત્રી નથી

મોદી કેબિનેટમાં સ્થાન ન મળવા પર DyCM અજિત પવારના જૂથની NCPની નારાજગી પછી હવે CM એકનાથ શિંદે જૂથની શિવસેનાની નારાજગી પણ સામે આવી રહી છે. પાર્ટીના ચીફ વ્હીપ શ્રીરંગ બારને કહે છે કે, એક તરફ જ્યાં, ચિરાગ પાસવાન, જીતન રામ માંઝી અને HD કુમારસ્વામીની પાર્ટીને ઓછી બેઠકો મળવા છતાં કેબિનેટ મંત્રાલય આપવામાં આવ્યું છે, તો બીજી તરફ સાત સાંસદો હોવા છતાં તેમની પાર્ટીને માત્ર સ્વતંત્ર પ્રભાર સાથે રાજ્યકક્ષાનું મંત્રી પદ આપવામાં આવ્યું છે.

શ્રીરંગ બારનેએ કહ્યું કે, 'અમે કેબિનેટમાં સ્થાનની અપેક્ષા રાખતા હતા. ચિરાગ પાસવાન પાસે પાંચ સાંસદ છે, માંઝી પાસે એક સાંસદ છે, JDS પાસે બે સાંસદ છે, તેમ છતાં તેમને કેબિનેટ મંત્રાલય મળ્યું છે. તો પછી લોકસભાની 7 બેઠકો મળ્યા પછી પણ શું શિવસેનાને માત્ર એક જ રાજ્યમંત્રી (સ્વતંત્ર હવાલો) મળ્યો?'

શિવસેનાના ચીફ વ્હીપે કહ્યું, 'અમારી શિવસેનાના સ્ટ્રાઈક રેટને ધ્યાનમાં રાખીને અમને કેબિનેટ મંત્રી પદ આપવું જોઈતું હતું.' આમ કહીને શિંદે જૂથના સાંસદ શ્રીરંગ બારનેએ ખુલ્લેઆમ પોતાની નારાજગી વ્યક્ત કરી છે.

શ્રીરંગ બારનેએ કહ્યું કે, NDAના અન્ય ઘટક પક્ષોમાંથી એક-એક સાંસદ ચૂંટાયા હતા, પરંતુ તેમને કેબિનેટ પ્રધાન પદ આપવામાં આવ્યું છે, તો પછી BJP એ શિંદે જૂથ પ્રત્યે આવું અલગ વલણ કેમ અપનાવ્યું?

શિવસેના સાંસદે કહ્યું કે, જો આવું થાય છે તો પરિવારની વિરુદ્ધમાં જઈને મહાગઠબંધનમાં સામેલ થયેલા અજિત પવારને મંત્રી પદ આપવું જોઈતું હતું. તેમજ BJP એ આ મંત્રી પદ સતારાના સાંસદ ઉદયનરાજે ભોસલેને આપવું જોઈતું હતું.

શિવસેના સાથે શિંદે જૂથની નારાજગી પહેલા NCPના અજિત જૂથે પણ મંત્રીપદ ન મળતાં નારાજગી વ્યક્ત કરી હતી. પાર્ટીના નેતા પ્રફુલ્લ પટેલે કહ્યું, '...ગઈ રાત્રે (શપથગ્રહણ પહેલા) અમને કહેવામાં આવ્યું હતું કે, અમારી પાર્ટીને સ્વતંત્ર પ્રભાર સાથે રાજ્યમંત્રી મળશે. હું અગાઉ કેન્દ્ર સરકારમાં કેબિનેટ મંત્રી હતો, તેથી આ પદ મારા માટે ડિમોશન જેવું હતું. અમે BJPના નેતૃત્વને જાણ કરી છે અને તેઓએ અમને થોડા દિવસો રાહ જોવાનું કહ્યું છે, તેઓ સુધારાત્મક પગલાં લેશે.'

લોકસભા ચૂંટણી 2024માં, BJPએ મહારાષ્ટ્રમાં શિંદે જૂથની શિવસેના અને અજિત જૂથની NCP સાથે ચૂંટણી લડી હતી. ઉદાહરણ તરીકે, BJPએ 31 બેઠકો પર ચૂંટણી લડી હતી અને 9 બેઠકો જીતી હતી, અજિત જૂથની પાર્ટી NCPએ ચાર બેઠકો પર ચૂંટણી લડી હતી અને એક બેઠક જીતી હતી અને શિંદે જૂથની શિવસેનાએ 13 બેઠકો પર ચૂંટણી લડી હતી અને સાત બેઠકો જીતી હતી.

જ્યાં ચિરાગ પાસવાનની પાર્ટીએ ચૂંટણીમાં પાંચ બેઠકો જીતી છે, જેમાં ચિરાગને કેબિનેટ મંત્રાલય આપવામાં આવ્યું છે, જીતન રામ માંઝીએ તેમની પાર્ટીમાંથી એકલા હાથે ચૂંટણી જીતી છે અને તેમને કેબિનેટ મંત્રાલય પણ મળ્યું છે અને JDSને બે બેઠકો મળી છે, જેમાં HD કુમારસ્વામીને કેબિનેટ મંત્રીનો દરજ્જો આપવામાં આવ્યો છે. શિવસેના તરફથી પ્રતાપરાવ જાધવને સ્વતંત્ર પ્રભાર સાથે રાજ્યમંત્રીનું પદ આપવામાં આવ્યું છે, જેનાથી પાર્ટી ખુશ નથી.

અત્રે ઉલ્લેખનીય છે કે, મહારાષ્ટ્રમાં બળવા દરમિયાન CM એકનાથ શિંદે શિવસેનાના ડઝનબંધ ધારાસભ્યો સાથે NDA ગઠબંધનમાં જોડાયા હતા. ત્યાર પછી તેમણે પાર્ટી અને તેના ચૂંટણી ચિન્હ પર પણ દાવો કર્યો હતો. કોર્ટરૂમ ડ્રામા પછી, એકનાથ શિંદે જૂથને અસલી શિવસેના માનવામાં આવી હતી. ત્યાર પછી DyCM અજિત પવાર પણ એક ડઝનથી વધુ ધારાસભ્યો સાથે BJPના નેતૃત્વ હેઠળના NDAમાં જોડાયા હતા. તેમણે પાર્ટી અને ચૂંટણી ચિહ્ન પર પણ દાવો કર્યો અને DyCM અજિત પવારને પણ પાર્ટીની કમાન મળી.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.