હરિયાણામાં શીખ સમાજે ટેન્શન આપી દીધું, આગામી ચૂંટણીમાં આટલી ટિકિટ માગી

હરિયાણામાં વિધાનસભાની ચૂંટણી નજીક આવી રહી છે તે પહેલા જ્યાં BJP OBC ચહેરા તરીકે CM નાયબ સિંહ સૈનીને આગળ કરી રહી છે, જ્યારે કોંગ્રેસ પૂર્વ CM અને અનુભવી નેતા ભૂપેન્દ્ર સિંહ હુડાને જાટ ચહેરા તરીકે આગળ કરી રહી છે, આવા સમયે હરિયાણામાં શીખ સમુદાય તેમને રાજ્યની રાજનીતિમાં તેમની વસ્તી પ્રમાણે હિસ્સો આપવામાં આવે તેવી માંગ પણ કરી છે.

રવિવારના રોજ, શીખ સમુદાયના લોકોએ કરનાલમાં એક મોટી બેઠક યોજી અને તમામ રાજકીય પક્ષો પાસેથી માંગ કરી કે, વિધાનસભા અને લોકસભા ચૂંટણીમાં તેમના સમુદાયને વસ્તી અનુસાર રાજકીય હિસ્સો આપવામાં આવે.

શીખ સમુદાયના લોકોએ માંગ કરી હતી કે 90 સભ્યોના હરિયાણા રાજ્યમાં વિધાનસભાની ચૂંટણીમાં તેમને 16 થી 20 બેઠકો આપવામાં આવે અને લોકસભામાં તેમના સમુદાયના લોકોને બે બેઠકો આપવામાં આવે અને રાજ્યસભાની ખાલી પડેલી સીટ પર પણ શીખ સમુદાયના એક વ્યક્તિને તક આપવી જોઈએ. શીખ સમુદાયની બેઠકમાં કરનાલ, હિસાર, પાણીપત, અંબાલા, કૈથલ, સિરસા અને યમુનાનગરના પ્રતિનિધિઓએ હાજરી આપી હતી. શીખ સમુદાયના લોકોએ દાવો કર્યો કે રાજ્યમાં 18 લાખ શીખ મતદારો છે.

હરિયાણામાં કયા સમુદાયની વસ્તી કેટલી છે: જાટ-27 ટકા, દલિત-20 ટકા, OBC-40.94 ટકા, મુસ્લિમ-7 ટકા, શીખ-5 ટકા.

લોકસભાની ચૂંટણીમાં BJP અને કોંગ્રેસે કોઈ પણ સીટ પર શીખ સમુદાયના કોઈ નેતાને ઉમેદવાર તરીકે ઉતાર્યા ન હતા. BJPએ પંજાબી સમુદાયના પૂર્વ CM મનોહર લાલ ખટ્ટરને કરનાલથી ટિકિટ આપી હતી, જ્યારે કોંગ્રેસે ગુરુગ્રામથી એ જ સમુદાયના રાજ બબ્બરને અને કરનાલથી દિવ્યાંશુ બુદ્ધિરાજાને ટિકિટ આપી હતી.

ઇન્ડિયન નેશનલ લોકદળ (INLD)એ અંબાલા (આરક્ષિત) લોકસભા બેઠક પરથી શીખ ઉમેદવાર ગુરપ્રીત સિંહને ટિકિટ આપી હતી. અંબાલા લોકસભા મતવિસ્તારમાં પંચકુલા, અંબાલા અને યમુનાનગર જિલ્લાની નવ વિધાનસભા બેઠકોનો સમાવેશ થાય છે, જેમાં અનુક્રમે પંચકુલા, કાલકા, નારાયણગઢ, અંબાલા શહેર, અંબાલા છાવણી, મુલાના, સાઢોરા, જગાધરી અને યમુનાનગરનો સમાવેશ થાય છે. આ વિધાનસભા ક્ષેત્રોમાં શીખોની મોટી વસ્તી છે.

અત્રે ઉલ્લેખનીય છે કે, વર્ષ 2014માં જ્યારે BJPએ હરિયાણામાં પહેલીવાર પોતાના દમ પર સરકાર બનાવી ત્યારે પંજાબી સમુદાયમાંથી આવતા મનોહર લાલ ખટ્ટરને CM બનાવવામાં આવ્યા હતા. પરંતુ આ વર્ષે માર્ચમાં BJPએ પોતાની રણનીતિ બદલી અને OBC સમુદાયમાંથી આવતા નાયબ સિંહ સૈનીને CM પદ સોંપ્યું. પાર્ટીએ જાહેરાત કરી છે કે, વિધાનસભા ચૂંટણીમાં CM નાયબ સૈની જ પાર્ટીનો ચહેરો હશે.

હરિયાણાની સરહદે આવેલ રાજ્ય પંજાબ છે અને પંજાબમાં 58 ટકા શીખ વસ્તી છે. આવી સ્થિતિમાં પંજાબના હરિયાણાની સરહદે સિરસા, અંબાલા, કુરુક્ષેત્ર, કૈથલ જેવા વિસ્તારોમાં શીખ સમુદાયની વસ્તી છે અને લોકસભા અને વિધાનસભા ચૂંટણીમાં પણ તેમનો પ્રભાવ છે.

હરિયાણાના ચાર લોકસભા મતવિસ્તાર અંબાલા, કરનાલ, કુરુક્ષેત્ર અને સિરસામાં લગભગ 20 ટકા શીખ વસ્તી છે. આ ચાર લોકસભા મતવિસ્તારમાં 36 વિધાનસભા બેઠકો છે. આ સિવાય ફરીદાબાદ અને ગુરુગ્રામના શહેરી વિસ્તારોમાં પણ શીખ સમુદાયના લોકો રહે છે.

પંજાબ અને હરિયાણામાં BJP અને શિરોમણી અકાલી દળ લાંબા સમયથી એકસાથે વિધાનસભા ચૂંટણી લડતા હતા અને દિલ્હીમાં પણ વિધાનસભા ચૂંટણીમાં BJP અકાલી દળ માટે કેટલીક બેઠકો છોડતી હતી, પરંતુ હવે બંને પક્ષોનું ગઠબંધન સમાપ્ત થઈ ગયું છે.

2019ની વિધાનસભા ચૂંટણીમાં બહુમતી ન મળતાં BJPએ જનનાયક જનતા પાર્ટી (JJP) સાથે મળીને સરકાર બનાવી હતી, પરંતુ થોડા મહિના પહેલા તેણે JJP સાથેનું ગઠબંધન તોડી નાખ્યું હતું.

પંજાબની જેમ હરિયાણામાં પણ શીખ સમુદાયના લોકો ખેતી અને ખેડૂતોને લગતા કામ સાથે સંકળાયેલા છે. માત્ર પંજાબના જ નહીં પરંતુ હરિયાણાના પણ શીખ સમુદાયના લોકોએ ખેડૂતોના આંદોલનમાં ઉત્સાહપૂર્વક ભાગ લીધો હતો.

BJP છેલ્લા ઘણા મહિનાઓથી પંજાબની સરહદે હરિયાણાના જિલ્લાઓમાં રહેતા શીખ અને પંજાબી સમુદાયના લોકોનો સતત સંપર્ક કરી રહ્યું છે.

આ સિવાય હરિયાણાના શીખ સમુદાયના સભ્યોએ CM નાયબ સિંહ સૈની પાસે માંગ કરી છે કે, હરિયાણા શીખ ગુરુદ્વારા પ્રબંધન સમિતિની ચૂંટણી વિધાનસભા ચૂંટણી પહેલા કરાવવામાં આવે. આ અંગે CMને આવેદનપત્ર પણ આપવામાં આવ્યું છે.

BJP પંજાબ અને હરિયાણાના શીખ સમુદાયના લોકોમાં મોદી સરકારની તમામ ઉપલબ્ધિઓનો પ્રચાર કરી રહી છે. આમાં કરતારપુર કોરિડોરને ફરીથી ખોલવો, ગુરુ ગોવિંદ સિંહને શ્રદ્ધાંજલિ આપવા માટે 26 ડિસેમ્બરને 'વીર બાલ દિવસ' તરીકે જાહેર કરવો, 1984ના રમખાણોમાં સામેલ લોકોને દોષિત ઠેરવવા વગેરેનો સમાવેશ થાય છે. આ ઉપરાંત રમખાણોથી પ્રભાવિત શીખ પરિવારોને વળતર આપવાનો સંદેશ પણ શીખોમાં ફેલાવવામાં આવી રહ્યો છે.

BJP અને કોંગ્રેસ શીખ સમુદાયની આ માંગને કેટલી ગંભીરતાથી લે છે અને વિધાનસભાની ચૂંટણીમાં આ સમુદાયના લોકોને કેટલી રાજકીય ભાગીદારી આપશે તે જોવું રહ્યું.

હરિયાણાની લોકસભા ચૂંટણીના પરિણામો સ્પષ્ટપણે દર્શાવે છે કે, આ વખતે વિધાનસભાની ચૂંટણીમાં BJP અને કોંગ્રેસ વચ્ચે જબરદસ્ત મુકાબલો થવાનો છે, કારણ કે હરિયાણામાં 90 બેઠકોમાંથી BJP 44 બેઠકો પર આગળ રહી છે જ્યારે INDIA ગઠબંધન 46 બેઠકો પર આગળ રહી છે. INDIA ગઠબંધનમાં કોંગ્રેસ 42 વિધાનસભા બેઠકો પર અને AAP ચાર વિધાનસભા બેઠકો પર આગળ રહી છે. પરંતુ વિધાનસભા ચૂંટણીમાં કોંગ્રેસ અને AAP એકલા હાથે ચૂંટણી લડશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.