નીતિશ કુમારે 11 વર્ષમાં 4 વખત પલટી મારી, MLAની સંખ્યા અડધી થઈ ગઈ

ત્રણ દિવસમાં બિહારની રાજનીતિ જે ઝડપે બદલાઈ ગઈ, તે નવાઈની વાત નથી. કારણ કે બિહારમાં આવું પહેલીવાર નથી થઈ રહ્યું.

CM નીતિશ કુમારે 17 મહિના પછી RJD છોડી દીધી. ગઠબંધનથી અલગ થયા પછી અને રવિવારે CM પદ પરથી રાજીનામું આપ્યા પછી, તેમણે કહ્યું, 'અમે ખૂબ મહેનત કરી રહ્યા હતા અને બીજા (RJD) તમામ શ્રેય લઈ રહ્યા હતા. હવે નવા જોડાણમાં જઈ રહ્યા છીએ.'

રાજીનામું આપ્યાના થોડા કલાકો પછી જ CM નીતીશ BJPના સમર્થનથી ફરી CM બન્યા. CM પદના શપથ લીધા પછી CM નીતિશે કહ્યું, 'હું પહેલા પણ તેમની સાથે હતો. અમે જુદા જુદા રસ્તાઓ પર ચાલ્યા, પરંતુ હવે અમે સાથે છીએ અને હંમેશા રહીશું. હું જ્યાં હતો ત્યાં પાછો આવ્યો છું (NDA) અને હવે બીજે ક્યાંય જવાનો પ્રશ્ન જ નથી.'

CM પદ પર રહીને CM નીતિશ કુમારનો આ ચોથો યુ-ટર્ન છે. લોકસભા ચૂંટણી પહેલા CM નીતિશનું પક્ષ બદલવું એ વિપક્ષી 'INDIA' ગઠબંધન માટે મોટો ફટકો માનવામાં આવી રહ્યો છે. જો કે, આંકડા દર્શાવે છે કે, જ્યારે પણ CM નીતીશ કુમારે 'પલટી મારી' છે, ત્યારે તેમની પાર્ટી જનતા દળ (યુનાઇટેડ)ને તેનો ભોગ બનવું પડ્યું છે. એક સમયે બિહારમાં JDUની સૌથી વધુ બેઠકો હતી, પરંતુ આજે તેની પાસે બહુ ઓછી બેઠકો છે.

BJP અને JDUએ 2005ની વિધાનસભા ચૂંટણી સાથે મળીને લડી હતી. આ ચૂંટણીમાં BJPએ 55 અને JDUએ 88 બેઠકો જીતી હતી.

આ પછી 2009ની લોકસભા ચૂંટણીમાં પણ BJP-JDU ગઠબંધને અહીં 40માંથી 32 બેઠકો જીતી હતી. જ્યારે 2004ની સામાન્ય ચૂંટણીમાં BJP-JDU ગઠબંધન માત્ર 11 બેઠકો જીતી શક્યું હતું.

2013માં જ્યારે BJPએ નરેન્દ્ર મોદીને PM પદના ઉમેદવાર જાહેર કર્યા ત્યારે CM નીતિશ કુમાર નારાજ થઈ ગયા. તેણે 17 વર્ષ જૂનું ગઠબંધન તોડી નાખ્યું.

JDUએ CPM સાથે ગઠબંધન કરીને 2014ની લોકસભા ચૂંટણી લડી હતી. જ્યારે, BJP અને LJP વચ્ચે ગઠબંધન હતું. JDU આ ચૂંટણીમાં માત્ર બે જ સીટો જીતી શકી હતી. જ્યારે BJP-NJP ગઠબંધનને 31 બેઠકો મળી હતી. આ હાર પછી CM નીતિશ કુમારે CM પદ પરથી રાજીનામું આપી દીધું હતું. તેમની જગ્યાએ જીતનરામ માંઝી CM બન્યા.

JDUએ 2015ની વિધાનસભા ચૂંટણી RJD અને કોંગ્રેસ સાથે ગઠબંધન કરીને લડી હતી. આ વખતે JDUએ 101 સીટો પર ચૂંટણી લડી હતી અને 71 પર જીત મેળવી હતી. જ્યારે, JDUએ BJP સાથે ગઠબંધન કરીને 2010ની ચૂંટણી લડી હતી અને ત્યારપછી CM નીતિશ કુમારની પાર્ટીએ 115 બેઠકો જીતી હતી.

RJD અને કોંગ્રેસ સાથે મહાગઠબંધનની સરકાર ચલાવી રહેલા CM નીતિશ કુમાર પણ જુલાઈ 2017માં આ ગઠબંધનથી અલગ થઈ ગયા હતા. ત્યારપછી તેમણે NDAએ સાથે મળીને સરકાર બનાવી.

JDUને લોકસભા ચૂંટણીમાં ફરીથી BJP સાથે આવવાનો ફાયદો મળ્યો, પરંતુ વિધાનસભામાં તેને મોટું નુકસાન થયું. 2019ની લોકસભા ચૂંટણીમાં JDUએ 16 બેઠકો જીતી હતી. જ્યારે NDA ગઠબંધનને 40માંથી 39 બેઠકો મળી હતી.

પરંતુ 2020માં જ્યારે બિહારમાં વિધાનસભાની ચૂંટણી થઈ ત્યારે JDU પચાસનો આંકડો પણ પાર કરી શકી ન હતી. આ ચૂંટણીમાં ચાર પક્ષો NDAની સાથે હતા. JDUએ 115 બેઠકો પર ચૂંટણી લડી હતી, પરંતુ માત્ર 43 બેઠકો જીતી હતી. તેની સામે BJPએ 110 બેઠકો પર ચૂંટણી લડી હતી અને 74 બેઠકો જીતી હતી.

ચૂંટણી પરિણામો પછી, LJD અને BSPમાંથી એક-એક ધારાસભ્ય JDUમાં જોડાયા. આ સાથે CM નીતીશ કુમારની પાર્ટીના ધારાસભ્યોની સંખ્યા વધીને 45 થઈ ગઈ છે.

CM રહીને નીતિશ કુમારનો U-ટર્નઃ પહેલી વાર- 2013માં જ્યારે BJPએ નરેન્દ્ર મોદીને PM પદના ઉમેદવાર બનાવ્યા ત્યારે CM નીતિશ આનાથી નારાજ થઈ ગયા અને NDA સાથે ગઠબંધન તોડી નાખ્યું. તેમણે RJD સાથે મળીને સરકાર બનાવી. 2014ની લોકસભા ચૂંટણીમાં JDUની હાર પછી CM નીતિશે પણ CM પદ પરથી રાજીનામું આપી દીધું હતું.

બીજી વાર- CM નીતિશે 2015ની ચૂંટણી RJD સાથે લડી અને મહાગઠબંધનની સરકાર બની. પરંતુ 2017માં તેજસ્વી યાદવ પર ભ્રષ્ટાચારનો આરોપ લાગ્યો હતો. CM નીતિશે 26 જુલાઈ 2017ના રોજ CM પદ પરથી રાજીનામું આપી દીધું હતું અને ગઠબંધન પણ તોડી નાખ્યું હતું. ત્યાર પછી તેમણે ફરી NDA સાથે મળીને સરકાર બનાવી.

ત્રીજી વખત- 2022માં, CM નીતીશ કુમારની BJP સાથે અણબનાવ ફરી શરૂ થયો. આ અણબનાવ એટલો વધી ગયો કે 9 ઓગસ્ટ 2022ના રોજ તેમણે BJP છોડી દીધું. તેણે તેને આત્માનો અવાજ કહ્યો. બાદમાં તેમણે RJD અને કોંગ્રેસ સાથે મળીને સરકાર બનાવી.

ચોથી વખત- જાન્યુઆરી 2024માં CM નીતિશ કુમાર અને RJD વચ્ચે તણાવ શરૂ થયો. આખરે CM નીતીશ કુમાર મહાગઠબંધનથી અલગ થઈ ગયા. CM નીતિશ કુમારનું કહેવું છે કે, તેમણે તેમના લોકોના મંતવ્યો સાંભળ્યા. હવે તેઓ BJP સાથે મળીને સરકાર બનાવી શકે છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.