'ટ્રેકમાં ખામી કલાક પહેલા ખબર પડી ગઈ હતી, JEને જાણ પણ કરી હતી'

ઉત્તર પ્રદેશના ગોંડા જિલ્લામાં મોતીગંજ-ઝિલાહી રેલ્વે સ્ટેશન વચ્ચે પીકૌરા ગામ પાસે 18 જુલાઈના રોજ ચંદીગઢ-ડિબ્રુગઢ એક્સપ્રેસના અકસ્માતનું કારણ સામે આવ્યું છે. દુર્ઘટનાના તપાસ અહેવાલમાં કહેવામાં આવ્યું છે કે, રેલવેના એન્જિનિયરિંગ વિભાગની બેદરકારીને કારણે ડિબ્રુગઢ એક્સપ્રેસ ટ્રેન પાટા પરથી ઉતરી ગઈ હતી. એવું કહેવામાં આવી રહ્યું છે કે, જે જગ્યાએ ટ્રેન પાટા પરથી ઉતરી હતી ત્યાં ચાર દિવસથી ટ્રેક પર બકલિંગ થઈ રહ્યું હતું.

બકલિંગને કારણે 18મી જુલાઈના રોજ 70 Km પ્રતિ કલાકની ઝડપે પસાર થઈ રહેલી ચંદીગઢ-ડિબ્રુગઢ એક્સપ્રેસના કુલ 16 ડબ્બા પાટા પરથી ઉતરી ગયા હતા, ત્યારપછી ત્રણ AC કોચ પાટા પર પલટી ગયા હતા. આ અકસ્માતમાં 4 લોકોના મોત થયા છે અને 30થી વધુ લોકો ઘાયલ થયા છે. ડિબ્રુગઢ એક્સપ્રેસની દુર્ઘટના પહેલા, ઝિલાહીના કીમેનનું કામ જોઈ રહેલા રેલવે કર્મચારીએ ફોન પર જૂનિયર એન્જિનિયરને રેલવે ટ્રેકના નબળા પડવાના ભય વિશે જણાવ્યું હતું.

વિભાગના અધિકારીઓએ ટ્રેક પર કોઈ સાવચેતી સંદેશ પોસ્ટ કર્યો ન હતો, જેના કારણે પૂરપાટ ઝડપે દોડી રહેલી ડિબ્રુગઢ એક્સપ્રેસને અકસ્માત નડ્યો હતો. રેલવે દ્વારા રચવામાં આવેલી તપાસ સમિતિએ પોતાના રિપોર્ટમાં લખનઉ રેલવે ડિવિઝન હેઠળના ઝિલાહી વિભાગના એન્જિનિયરિંગ વિભાગને આ અકસ્માત માટે જવાબદાર ગણાવ્યો છે. રિપોર્ટમાં કહેવામાં આવ્યું છે કે, રેલવે ટ્રેકને ફાસ્ટનિંગ યોગ્ય નહોતું. મતલબ કે, ગરમીના કારણે વિસ્તરણને કારણે ટ્રેક ઢીલો થઈ ગયો હતો અને તેને યોગ્ય રીતે કડક કરવામાં આવ્યો ન હતો.

દુર્ઘટનાના લગભગ એક કલાક પહેલા, મોતીગંજ-ઝિલાહી વચ્ચે ટ્રેક ફોલ્ટ શોધી કાઢવામાં આવ્યો હતો, તે પછી પણ માર્ગ પર સાવચેતીનું બોર્ડ લગાવવામાં આવ્યું ન હતું. જો સાવચેતીનો સંદેશ પોસ્ટ કરવામાં આવ્યો હોત તો ડિબ્રુગઢ એક્સપ્રેસ 70 Km પ્રતિ કલાકના બદલે 30 Km પ્રતિ કલાકની ઝડપે દોડી હોત અને આ અકસ્માત ન થયો હોત. આ દુર્ઘટના 18 જુલાઈના રોજ બપોરે 14:28 વાગ્યે થઈ હતી. મોતીગંજના સ્ટેશન માસ્ટરને 14:30 વાગ્યે માહિતી (સાવધાન મેમો) આપવામાં આવી હતી.

ટ્રેક ફોલ્ટ શોધી કાઢ્યા પછી, અધિકારીઓએ સ્થળ સુરક્ષા અને સાવચેતી બોર્ડ લગાવવાની તસ્દી લીધી ન હતી અને ડિબ્રુગઢ એક્સપ્રેસને તે જ ટ્રેક પર પૂર ઝડપે પસાર થવા દીધી હતી, જેના કારણે અકસ્માત થયો હતો. નોર્થ ઈસ્ટર્ન રેલવેના 6 અધિકારીઓની એક ટીમે ચંદીગઢ-ડિબ્રુગઢ એક્સપ્રેસ ટ્રેનના લોકો પાઈલટ, મેનેજર, ઝિલાહી અને મોતીગંજના સ્ટેશન માસ્ટર્સ સહિત અનેક કર્મચારીઓના નિવેદન લીધા પછી અને ઘટના સ્થળનું ટેકનિકલ નિરીક્ષણ કર્યા પછી પોતાના અહેવાલમાં આ ટ્રેન દુર્ઘટનામાં જિલાહી વિભાગના એન્જિનિયરિંગ ડિપાર્ટમેન્ટની ખામી હોવાનું જાણવા મળ્યું છે.

ગોંડા, ડિબ્રુગઢ અને ગુવાહાટી (માલીગાંવ)ના 41 રેલ્વે અધિકારીઓ અને કર્મચારીઓને લખનઉ DRM ઓફિસમાં બોલાવવામાં આવ્યા છે. એવું માનવામાં આવે છે કે, તેમના નિવેદન નોંધ્યા પછી બેદરકારી માટે જવાબદાર અધિકારીઓ સામે કાર્યવાહી થઈ શકે છે. અકસ્માત સ્થળે રેલવે ટ્રેકની આસપાસ પાણી ભરાયા હોવાની પણ ચર્ચા છે. ગઈકાલે 30થી વધુ રેલ્વે કર્મચારીઓ સ્થળ પર તૈયાર હતા. જે જગ્યાએ પાણી એકઠું થયું હતું ત્યાં કાંકરી અને માટી ઉમેરીને ભરવાની કામગીરી કરવામાં આવી રહી હતી. એવું પણ શક્ય છે કે, પાણી ભરાઈ જવાને કારણે ટ્રેક નબળો થઈ ગયો હોય અને ટ્રેન પસાર થતી વખતે માટી અંદર ધસી ગઈ હોય, જે આ ટ્રેન દુર્ઘટનાનું કારણ બન્યું. જોકે, સંયુક્ત તપાસ ટીમના રિપોર્ટ પછી જ અકસ્માતનું સાચું કારણ બહાર આવશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.