કૌટુંબિક મિલકત 40 કરોડ, કોણ છે IAS પૂજા ખેડકર, કેમ છે વિવાદોમાં

મહારાષ્ટ્રની પ્રખ્યાત IAS ઓફિસર પૂજા ખેડકરે સિવિલ સર્વિસ પરીક્ષા પાસ કરવા માટે પોતાને નોન-ક્રીમી OBC ઉમેદવાર જાહેર કર્યા હતા. જોકે, તેમના પિતાએ તેમના ચૂંટણી એફિડેવિટમાં 40 કરોડ રૂપિયાની સંપત્તિ જાહેર કરી હતી. આવી સ્થિતિમાં IAS પૂજા OBC નોન-ક્રીમી લેયર ઉમેદવાર હોવા અંગે સવાલો ઉઠી રહ્યા છે કે જો ઉમેદવારના પિતાની સંપત્તિ 40 કરોડ રૂપિયા હોય તો તેના બાળકને OBC નોન ક્રીમી લેયરમાં કેવી રીતે ગણી શકાય.

ચૂંટણી એફિડેવિટ મુજબ, પૂજા ખેડકરના માતા-પિતા પાસે 110 એકર ખેતીની જમીન છે, જે કૃષિ જમીન ટોચમર્યાદા કાયદાનું ઉલ્લંઘન કરે છે. આ સિવાય છ દુકાનો, સાત ફ્લેટ (હિરાનંદાનીમાં એક), 900 ગ્રામ સોનું, હીરા, 17 લાખ રૂપિયાની સોનાની ઘડિયાળ, ચાર કાર છે. આ સાથે તેમની પાસે બે ખાનગી કંપનીઓ અને એક ઓટોમોબાઈલ કંપનીમાં હિસ્સો છે. આટલું જ નહીં IAS પૂજા ખેડકર પોતે 17 કરોડ રૂપિયાની સંપત્તિ ધરાવે છે.

એટલું જ નહીં, એ પણ પ્રકાશમાં આવ્યું છે કે, UPSCમાં સબમિટ કરવામાં આવેલા એફિડેવિટમાં પૂજા ખેડકરે દાવો કર્યો હતો કે તે નેત્રહીન અને માનસિક રીતે બીમાર છે. ખેડકરે આ વિકલાંગતા પ્રમાણપત્રનો ઉપયોગ UPSCમાં પસંદગી માટે વિશેષ છૂટ મેળવવા માટે કર્યો હતો. સિવિલ સર્વિસ પરીક્ષામાં ઓછા માર્કસ હોવા છતાં પૂજા ખેડકરે છૂટને કારણે પરીક્ષા પાસ કરી લીધી હતી.

પૂજા ખેડકરે યુનિયન પબ્લિક સર્વિસ કમિશન (UPSC)ની પરીક્ષામાં 841મો રેન્ક મેળવ્યો હતો. પૂજાની માતા અહેમદનગર જિલ્લાના ભાલગાંવની સરપંચ છે. પૂજાના પરિવારમાં તેના પિતા અને દાદા બંને વહીવટી સેવામાં છે. તેમના પિતા પણ પુણેમાં આસિસ્ટન્ટ કલેક્ટર હતા.

IAS પૂજા ખેડકરની પુણેથી વાશિમ જિલ્લામાં બદલી કરવામાં આવી છે. સત્તાના દુરુપયોગની ફરિયાદને કારણે મહારાષ્ટ્ર સરકારે પૂજા ખેડકરની બદલી કરી છે. પુણેના કલેક્ટર ડૉ. સુહાસ દીવસેએ મુખ્ય સચિવને પત્ર લખીને પૂજા ખેડકરની ફરિયાદ કરી હતી. હવે તેમને વાશિમ જિલ્લાના અધિક મદદનીશ કલેક્ટર તરીકે નિયુક્ત કરવામાં આવ્યા છે.

પુણેમાં તેના પ્રોબેશન સમય દરમિયાન પૂજા ખેડકરે ઘણા વિશેષાધિકારોની માંગણી કરી હતી, જે પ્રોબેશનરી અધિકારીઓને મળતી નથી. આ દરમિયાન પૂજા ખેડકરે લાલ-વાદળી લાઇટ અને VIP નંબર પ્લેટવાળી તેની અંગત ઓડી કારનો ઉપયોગ કર્યો, તેની કાર પર 'મહારાષ્ટ્ર સરકાર'નું બોર્ડ લગાવ્યું અને સત્તાવાર કાર, રહેઠાણ, ઓફિસ રૂમ અને વધારાના સ્ટાફની માંગણી કરી. ત્યાં સુધી કે તેઓએ તેમની ગેરહાજરીમાં અધિક કલેકટરની ચેમ્બર પર પણ કબજો જમાવ્યો હતો. ડો. ખેડકરના પિતા, એક નિવૃત્ત વહીવટી અધિકારી છે, પૂજાની માંગણીઓ પૂરી કરવા માટે તેમણે કથિત રીતે જિલ્લા કલેક્ટર કચેરી પર દબાણ કર્યું હતું. એટલું જ નહીં, તેમણે એવી ધમકી પણ આપી હતી કે, જો તેમની માંગણીઓ નહીં સંતોષાય તો તેણે પરિણામ ભોગવવા પડશે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.