આ બિલ પર સરકાર કેવી રીતે આગળ વધશે? TDP નેતાના નિવેદનથી BJP ટેન્શનમાં

સંસદના શિયાળુ સત્રમાં વકફ સંશોધન બિલ રજૂ કરવાની તૈયારીઓ ચાલી રહી છે. તેની તરફેણમાં અને વિરુદ્ધમાં બંને તરફ અવાજ ઉઠાવવામાં આવી રહ્યો છે. આ અંગે BJPના સાથી પક્ષોના અભિપ્રાય પર પણ ઘણું નિર્ભર રહેશે. TDP નેતાઓના નિવેદનો કંઈક અલગ જ સંકેત આપી રહ્યા છે.

NDAમાં સામેલ TDP BJPની ટેન્શન વધારી શકે છે. હકીકતમાં TDPના ઉપાધ્યક્ષ નવાબ જાન ઉર્ફે અમીર બાબુએ એક કાર્યક્રમ દરમિયાન કહ્યું હતું કે, વકફ સંશોધન બિલને નકારવાનું છે. TDP ઉપાધ્યક્ષના નિવેદન પછી ચર્ચા શરૂ થઈ ગઈ છે કે, હવે આ અંગે BJPનું વલણ શું હશે. એવું કહેવામાં આવી રહ્યું હતું કે, સરકાર તેને સંસદના આગામી સત્રમાં ગૃહમાં રજૂ કરશે.

આ બિલ થોડા સમય પહેલા જ કેન્દ્ર સરકાર દ્વારા લોકસભામાં રજૂ કરવામાં આવ્યું હતું. સરકારે કહ્યું કે, આ સંશોધન બિલ મુસ્લિમોના હિતમાં છે. જો કે ગૃહમાં વિપક્ષી સાંસદોએ તેનો વિરોધ કર્યો હતો. વિપક્ષી સાંસદોના વિરોધ પછી તેને JPCમાં મોકલવામાં આવ્યો હતો. સરકારે વકફ સુધારા બિલ પર દેશની જનતાનો અભિપ્રાય પણ માંગ્યો હતો.

જો કે મુસ્લિમ સંગઠનો પણ આ બિલ સામે સતત અવાજ ઉઠાવી રહ્યા છે. પરંતુ, TDP ઉપાધ્યક્ષના નિવેદન પછી રાજકારણ તેજ થઈ ગયું છે. TDPના ઉપાધ્યક્ષે કહ્યું, આ દેશની આઝાદીમાં સૌથી વધુ હિસ્સો મુસ્લિમોનો છે. અમે વકફ બિલને સંપૂર્ણપણે નકારીએ છીએ.

તેમાં જે પણ પરિવર્તન લાવવાનો પ્રયાસ કરવામાં આવી રહ્યો છે. તે કોઈપણ બાબતમાં મુસ્લિમોના પક્ષમાં નથી. અમારા નેતા CM ચંદ્રબાબુ નાયડુ બિનસાંપ્રદાયિક વિચારધારાવાળા છે. અમારી સરકાર મુસ્લિમોના બાળકોને શિક્ષણ માટે 15 લાખ રૂપિયા સુધી આપી રહી છે. જો કેન્દ્ર સરકાર દ્વારા વકફ બિલ લાવવાનો પ્રયાસ કરવામાં આવશે તો અમે તેનો વિરોધ કરીશું.

આ દેશ પર દરેકનો અધિકાર છે. અમે સૌએ શહીદી આપી છે. જો કોઈ આપણા દેશને વિભાજિત કરવાનો પ્રયાસ કરશે તો તેને રોકવા માટે આપણે આપણા જીવનનું બલિદાન પણ આપી દઈશું. આપણા CM ચંદ્રબાબુ નાયડુની વિચારધારા બિનસાંપ્રદાયિક છે. 15મી ડિસેમ્બરે આંધ્રપ્રદેશમાં વકફ બિલના વિરોધમાં કાર્યક્રમ યોજાશે. જેમાં CM ચંદ્રબાબુ નાયડુ પણ ભાગ લેશે.

નવાબ જાને આગળ કહ્યું કે, CM ચંદ્રબાબુ નાયડુના મતે આ બિલ અંગે દરેકનો અભિપ્રાય લેવા જોઈએ. તેમણે કહ્યું કે, આ મુદ્દે દેશભરમાં પરામર્શ ચાલી રહી છે અને CM ચંદ્રબાબુ નાયડુએ આ વિશે સર્વે હાથ ધરવા માટે દરેકને વિનંતી કરી છે. તેમનું માનવું છે કે આ મુદ્દે તમામ પક્ષોને સાંભળવામાં આવે તે જરૂરી છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.