'BJP અને NCP અજિત જૂથના MLA શરદ પવારની NCPમાં જોડાવા માગે છે', દેશમુખનો દાવો

મહારાષ્ટ્રના ભૂતપૂર્વ ગૃહ પ્રધાન અનિલ દેશમુખે દાવો કર્યો હતો કે BJPના કેટલાક ધારાસભ્યો NCP (SP)માં જોડાવા ઈચ્છુક છે. તેમણે પિંપરી-ચિંચવડના વડા અજીત ગવહાણે અને DyCM અજિત પવારની આગેવાની હેઠળના NCPના બે ભૂતપૂર્વ કાઉન્સિલરોના રાજીનામાનો ઉલ્લેખ કર્યો. ગવહાણેએ બુધવારે કહ્યું હતું કે, તેઓ શરદ પવારના આશીર્વાદ લેશે.

મીડિયા સૂત્રોએ આપેલી માહિતી અનુસાર, અનિલ દેશમુખે દાવો કર્યો હતો કે, BJPના કેટલાક ધારાસભ્યો પણ તેમની પાર્ટીમાં જોડાવા માંગે છે, કારણ કે તેઓ સરકારમાં પ્રતિનિધિત્વ ન મળવાથી નારાજ છે. તેમણે એમ પણ કહ્યું કે, NCP (અજિત પવાર નેતૃત્વ) ધારાસભ્યો પણ પરત ફરશે. જોકે, NCP (SP)માં કોને લેવામાં આવશે તે શરદ પવાર નક્કી કરશે.

જ્યારે પૂછવામાં આવ્યું કે, શું DyCM અજિત પવાર પણ શરદ જૂથની NCPમાં જોડાશે, ત્યારે દેશમુખે કહ્યું કે, તેઓ પોતાની પાર્ટી બનાવી રહ્યા છે, તેમને તેનો વિસ્તાર કરવા દો. શરદ પવારે બુધવારે કહ્યું હતું કે, તેમની પાર્ટીમાં કોઈપણ નેતાના સંભવિત પ્રવેશ અંગેનો નિર્ણય સામૂહિક રીતે લેવામાં આવશે. જો DyCM અજિત પવાર પાછા ફરવા માંગતા હોય તો તેનો સમાવેશ કરવામાં આવશે કે કેમ, તેની પુષ્ટિ કરવાનો તેમણે ઇનકાર કર્યો હતો.

DyCM અજિત પવારની છાવણીમાં અશાંતિની અટકળો ત્યારે શરૂ થઈ ગઈ હતી જ્યારે તેમની આગેવાની હેઠળની NCPએ તાજેતરમાં યોજાયેલી લોકસભાની ચૂંટણીમાં લડેલી ચારમાંથી ત્રણ બેઠકો ગુમાવી હતી. તેનાથી વિપરીત, શરદ જૂથની NCPએ કોંગ્રેસ અને શિવસેના (UBT) સાથે જોડાણ કરીને 10માંથી 8 બેઠકો જીતી હતી.

નાગપુરમાં એક પત્રકાર પરિષદને સંબોધતા અનિલ દેશમુખે રાજ્ય સરકારને તેમની સામેના લાંચના આરોપોની તપાસ કરી રહેલા કમિશનના અહેવાલને સાર્વજનિક કરવા જણાવ્યું હતું અને ચેતવણી આપી હતી કે, જો તેમ કરવામાં નહીં આવે તો તેઓ કોર્ટમાં જશે.

તેમણે મહારાષ્ટ્ર સરકાર પર ચાંદીવાલ કમિશનના રિપોર્ટને આંતરરાષ્ટ્રીય સ્તરે દબાવી રાખવાનો આરોપ લગાવ્યો, જેમાં તેમણે દાવો કર્યો હતો કે, તેમને ક્લીનચીટ આપવામાં આવી છે. NCP (SP) નેતાએ જણાવ્યું હતું કે, મુંબઈના ભૂતપૂર્વ પોલીસ કમિશનર પરમબીર સિંહે જ્યારે તેઓ રાજ્યના ગૃહ પ્રધાન હતા ત્યારે તેમની સામે આક્ષેપો કર્યા હતા, જેના પગલે તેમણે પોતે તત્કાલિન CM ઉદ્ધવ ઠાકરેને તપાસ શરૂ કરવા જણાવ્યું હતું. તેમણે જણાવ્યું હતું કે, રાજ્યએ નિવૃત્ત ન્યાયાધીશ કૈલાશ ચાંદીવાલના નેતૃત્વ હેઠળ એક કમિશનની રચના કરી હતી, જેણે બે વર્ષ પહેલાં 11 મહિના પછી 1,400 પાનાનો અહેવાલ રજૂ કર્યો હતો. દેશમુખે જણાવ્યું હતું કે, વિનંતીઓ છતાં, અહેવાલ હજુ સુધી ન તો જાહેર કરવામાં આવ્યો છે કે ન તો રાજ્ય વિધાનસભા સમક્ષ મૂકવામાં આવ્યો છે.

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.