વિપક્ષના નેતા બનવા માટે ઠરાવ પાસ થયો ત્યારે રાહુલે કહ્યું- મને...

લોકસભા ચૂંટણી 2024માં 99 બેઠકો જીતીને રાષ્ટ્રીય રાજનીતિમાં પોતાની ભૂમિકાને મજબૂત બનાવ્યા બાદ કોંગ્રેસે શનિવારે પાર્ટીની વર્કિંગ કમિટીની બેઠક બોલાવી હતી. નવી દિલ્હીની અશોકા હોટલ ખાતે કોંગ્રેસની ટોચની નિર્ણય લેતી સંસ્થા CWCની વિસ્તૃત બેઠક યોજાઈ હતી, જેમાં લોકસભા ચૂંટણીના પરિણામો અને ભાવિ વ્યૂહરચના અંગે મહત્વપૂર્ણ ચર્ચાઓ કરવામાં આવી હતી. આ બેઠકમાં પાર્ટીના વડા મલ્લિકાર્જુન ખડગે, સોનિયા ગાંધી, રાહુલ ગાંધી અને પ્રિયંકા ગાંધી વાડ્રા ઉપરાંત પાર્ટીના અન્ય ટોચના નેતાઓએ હાજરી આપી હતી.

બેઠક દરમિયાન રાહુલ ગાંધીને લોકસભામાં વિપક્ષના નેતા બનાવવાની સર્વાનુમતે માંગ કરવામાં આવી હતી. કોંગ્રેસ વર્કિંગ કમિટીના સભ્યોએ એક ઠરાવ પસાર કર્યો છે કે, રાહુલ ગાંધીને લોકસભામાં પાર્ટીના નેતા તરીકે નિયુક્ત કરવામાં આવે. લોકસભામાં વિપક્ષના નેતા માટે તેમના નામનો પ્રસ્તાવ પસાર થયા બાદ રાહુલ ગાંધીએ કોંગ્રેસ વર્કિંગ કમિટીના સભ્યોને આ અંગે થોડો સમય આપી વિચારવા કહ્યું હતું. કોંગ્રેસ અધ્યક્ષ મલ્લિકાર્જુન ખડગેએ તેમની શરૂઆતની ટિપ્પણીમાં કહ્યું, 'હું તમારું ધ્યાન એ હકીકત તરફ દોરવા માંગુ છું કે, જ્યાં પણ ભારત જોડો યાત્રા ગઈ ત્યાં અમે કોંગ્રેસ પાર્ટીની મત ટકાવારી અને બેઠકોની સંખ્યામાં વધારો જોયો.'

સભા દરમિયાન પોતાના સંબોધનમાં તેમણે કહ્યું, 'મણિપુરમાં આપણે બંને બેઠકો જીતી. આપણે નાગાલેન્ડ, આસામ અને મેઘાલયમાં પણ સીટો જીતી. આપણે મહારાષ્ટ્રમાં સૌથી મોટા પક્ષ તરીકે ઉભરી આવ્યા છીએ. દેશની લોકશાહી અને બંધારણને બચાવવા માટે તમામ ક્ષેત્રના લોકોએ કોંગ્રેસ પાર્ટીને ટેકો આપ્યો હતો. વધુમાં, આપણે SC, ST, OBC અને લઘુમતી મતદારો તેમજ ગ્રામીણ વિસ્તારોમાં પ્રભુત્વ ધરાવતી બેઠકોમાં આપણી બેઠકોમાં વધારો જોયો છે. આગળ વધીને આપણે શહેરી વિસ્તારોમાં પણ આપણી હાજરી સ્થાપિત કરવી પડશે. તેમણે વધુમાં કહ્યું કે, જ્યારે પાર્ટી તેના પુનરુત્થાનની ઉજવણી કરી રહી છે, ત્યારે કોંગ્રેસના નેતાઓ અને કાર્યકરોએ થોડો વિરામ લેવો જોઈએ, કારણ કે કેટલાક રાજ્યોમાં આપણે આપણી ક્ષમતાઓ અને અપેક્ષાઓ મુજબ પ્રદર્શન કર્યું નથી.

મલ્લિકાર્જુને વધુમાં જણાવ્યું હતું કે, 'આપણે તે રાજ્યોમાં આપણા પ્રદર્શનને પુનરાવર્તિત કરી શક્યા નથી જ્યાં આપણે અગાઉની વિધાનસભા ચૂંટણીમાં સારું પ્રદર્શન કર્યું હતું અને સરકાર બનાવી હતી... આપણે ટૂંક સમયમાં આવા દરેક રાજ્ય વિશે અલગથી ચર્ચા કરીશું. આપણે તાત્કાલિક ઉપચારાત્મક પગલાં લેવા પડશે. આ એવા રાજ્યો છે જે પરંપરાગત રીતે કોંગ્રેસને સમર્થન આપે છે, જ્યાં આપણી પાસે તકો છે, જેનો ઉપયોગ આપણે આપણા પોતાના ફાયદા માટે નહીં પરંતુ આપણા લોકોના હિત માટે કરવાનો છે. હું બહુ જલ્દી આવા રાજ્યોની સમીક્ષા બેઠકનું આયોજન કરવાનો પ્રસ્તાવ મૂકું છું. જો હું INDIA એલાયન્સના ભાગીદારોની વાત નહીં કરું તો હું મારી ફરજમાં નિષ્ફળ જઈશ. INDIA બ્લોકના દરેક પક્ષે અલગ-અલગ રાજ્યોમાં પોતાની ભૂમિકા ભજવી, દરેક પક્ષે બીજાની જીતમાં ફાળો આપ્યો.'

કોંગ્રેસના મહાસચિવ (સંગઠન) KC વેણુગોપાલે CWCની બેઠક દરમિયાન લેવાયેલા નિર્ણયોની માહિતી આપતાં એક પ્રેસ કોન્ફરન્સ યોજી હતી. તેમણે કહ્યું, 'લોકસભા ચૂંટણી પર ચર્ચા કરવા માટે વિસ્તૃત CWC બેઠક યોજાઈ હતી, 37માંથી 32 નેતાઓએ બેઠકમાં હાજરી આપી હતી. કાયમી સભ્યો અને ખાસ સભ્યોએ પણ ભાગ લીધો હતો. અમે સાડા ત્રણ કલાક ચર્ચા કરી. આપણે ચૂંટણી પ્રચાર અને આપણી ગેરંટી યોજનાઓની ચર્ચા કરી છે. ચૂંટણી સમયે નરેન્દ્ર મોદી સરકાર દ્વારા આપણા માટે ઘણી સમસ્યાઓ ઉભી કરવામાં આવી હતી. આપણે પહેલેથી જ કહ્યું હતું કે, આ સંસદીય ચૂંટણી કેટલીક બાબતોમાં નવી હતી. આપણે સમાન તકની માંગ કરી રહ્યા હતા, જે આપણને ન મળી. તેઓએ આપણું કામ બંધ કરી દીધું, આપણા એકાઉન્ટ્સ ફ્રીઝ કર્યા. તેઓ CBI અને ED દ્વારા આપણા નેતાઓને બ્લેકમેલ કરતા હતા. કેટલાક નેતાઓ જાળમાં ફસાઈ ગયા. આટલા પડકારો છતાં આપણે અદ્દભૂત પ્રદર્શન કર્યું છે.'

નીચે આપેલી લીંક પર ક્લિક કરીને જોડાઓ khabarchhe.com ન્યૂઝ સાથે.

તમે અમને ફેસબુક, ટ્વીટર, ટેલીગ્રામ, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો khabarchhe.com ની મોબાઇલ એપ્લિકેશન.